Bakıda yaşayan, əslən Naxçıvandan olan Günel Mustafayeva adlı vətəndaş redaksiyamıza müraciət edib. G.Mustafayeva bizə ünvanladığı şikayət məktubunda Naxçıvanda ailəsinin yaşadığı problemlərin, üzləşdikləri haqsızlıqların qəzetimiz vasitəsilə ictimailəşdirilməsini istəyir.
G.Mustafayeva ümid edir ki, bu ciddi problem mətbuatda işıqlandırılarsa onun səsi əlaqədar dövlət qurumlarına çatar. “Əslən naxçıvanlıyıq, amma Bakıda yaşayırıq. İstəyirik ki, Naxçıvanda yasadığımız problemləri, bizə olunan haqsızlıqları işıqlandırasınız. Dərdimizi kimə deyək, kimdən kömək istəyək, bilmirik. Həyat yoldaşım Ramil Mustafayev 9 il Naxçıvanda hərbidə MAXE kimi işləyib, yaxşı işçilərdən biri olub”.
“...Kərəm Mustafayev həyat yoldaşımı qanunsuz olaraq işdən çıxardı”
Həyat yoldaşının MAXE kimi qüsursuz fəaliyyət göstərdiyini deyən G.Mustafayeva qeyd edir ki, yaxşı xidmət göstərdiyinə görə həyat yoldaşı medalla da təltif olunub. “İki övladımız var, biri anadangəlmə ürək qüsurlu olub. Övladımızın tez-tez narahatlığı olurdu və həkimə aparmalı olurduq, ağrıları, narahatlıqları çox vaxt axşamlar artdığı üçün həkimə aparmağa maşın da tapmırdıq. Uşağı vaxtında xəstəxanaya aparıb çatdırmaq üçün məcbur olub borc-xərc edib maşın aldıq. Amma general Kərəm Mustafayev hərbçilərə maşın sürməyə icazə vermirdi. Biz uşağımızı xəstəxanaya çatdırmaq məcburiyyəti qarşısında qaldığımız üçün maşın almışdıq. Maşın aldığımızı eşidən kimi Kərəm Mustafayev həyat yoldaşımı qanunsuz olaraq işdən çıxardı. Bu azmış kimi, hərbi biletinə də elə maddə yazdırdı ki, heç yerdə yoldaşıma iş verilmir. Dəfələrlə işə düzəlmək üçün hərbi bletinə yazılan maddəni sildirməkdən ötrü qəbula getdi, amma qəbul etmədilər. 4 ildir ki, yoldaşım heç yerdə işləmir. Məcburiyyət qarşısında qalıb Bakıya gəlmişik, yoldaşım Bakıda günü 15 manata işləyir. İki uşaqla kirayədə dolanmaq, yaşamaq çox çətindir. Bir sözlə yaşamırıq, sürünürük. Yoldaşım 1 həftə olar borc edib yenə Naxçıvana getdi ki, bəlkə bu dəfə onu hərbiyə qəbul edərlər, yenidən işinə qayıdar. Amma yenə də qəbul etmədilər. Bir maşın üçün hərbi biletə bu maddəni vurmaq nə qədər düzdür? Dövlətin malını yeyib onlar kimi rüşvət almayıb, Vətənə xainlik etməyib ki? Yoldaşımın hərbi biletinə hansı haqla o maddənin yazıldığını bilmirik”.
Şikayətçi qeyd edir ki, heç dövlət əmlakını dağıdanların, hərbiyə ayrılan pulları mənimsəyənlərin hərbi biletinə o cür ağır maddə yazılmır, amma bir maşına görə həyat yoldaşının hərbi biletini korlayıblar. “Hərbinin bir maşını xarab olan kimi işçi öz cibindən xərc çəkib o maşını düzəldir. Bəs dövlətin hərbiyə ayırdığı pullar kimin cibinə gedir? Hərbidə ancaq Kərəm Mustafayevin işləyən qohumu, dostu atını çapır. Hamını qarşısında “qul” edib. O insanlar niyə cəzalandırılmır, onların etdikləri niyə gözə görünmür?Amma Kərəm Mustafayev bir Allahı unudub. Çünki Allah hər bir yaxşılığı, pisliyi görür. İki uşağın ahı var. O qanun qarşısında cavab verməsə də, Allah qarşısında bir gün mütləq cavab verəcək”-deyə G.Mustafayeva şikayət məktubunda qeyd edib.
Sonda ümid edirik ki, G.Mustafayevanın şikayəti aidiyyəti qurumlar tərəfindən araşdırılacaq və həyat yoldaşı R.Mustafayev müvafiq işlə təmin olunacaq, o ailəyə problem yaradanlara qarşı isə müvafiq ölçü götürüləcək.
Şikayət məktubunda qarşı tərəfin də mövqeyini işıqlandıra bilərik.
Əli TURABOV
