Azərbaycan mentalitetində qəbul olunmaz hallardan biri də cavan qızların özlərindən yaşca böyük kişilərlə ailə həyatı qurmasıdır. Bu günlərdə belə bir hadisə Gədəbəy rayonunda qeydə alınıb. Gədəbəy rayonunda 17 yaşlı qızın 50 yaşlı kişiyə ərə verildiyi iddia olunub.
Bu barədə məlumatlar sosial şəbəkələrdə yayılıb. İddia edilib ki, 17 yaşlı qız 50 yaşlı Elfaq Şəkərbəyli ilə ailə həyatı qurur. Məlumata görə, E.Şəkərbəyli dörd dəfə evlənib-boşanıb. Bu onun beşinci evliliyidir.
Qeyd edək ki, bu xəbər ölkə gündəmində narazılığa səbəb oldu. Maraqlıdır, 17 yaşlı qız özündən 33 yaş böyük şəxsə ərə verilirsə, bu hadisəyə rayon rəhbərliyi və əraziyə baxan aidiyyəti qurumlar niyə sakitlik nümayiş etdirir?
Gədəbəy RİH: “Yetkinlik yaşına çatmayan qız Gədəbəy rayon sakini deyil”
Gədəbəy rayon İcra Hakimiyyətinin Yetkinlik yaşına çatmayanların işləri və hüquqlarının müdafiəsi üzrə komissiyadan bildirildi ki, Gədəbəydə 17 yaşlı qızla ailə quran bəy Rusiyada yaşayır: “Bu məlumatı araşdırdıq. Məlum oldu ki, qızın nişan mərasimi olub. Yetkinlik yaşına çatmayan qız Gədəbəy rayon sakini deyil. Eyni zamanda qarşı tərəf, yəni 50 yaşında bəy Gədəbəy rayon sakini olsa da, uzun müddətdir Rusiyada yaşayır”.
Fatimə Hacıbəyli: “Ailədə qərarlar ortaq şəkildə qəbul olunmalı olduğu halda, yaşca böyük olan öz fikirlərini diqtə etməyə başlayır”
"Vəfa" Sosial İctimai Birliyinin rəhbəri Fatimə Hacıbəyli qeyd etdi ki, insanlar ailə qurmağa hazır olmalıdır. Təəssüf ki, bəzi valideynlər 14 yaşında qızları ərə verirlər. Hətta bu hərəkətlə fəxr edirlər: "Boşanmaların, sağlam uşaqların doğulmama səbəbləri erkən nikah qurbanlarıdır. Bəzən cütlüklər sevgi münasibətlərində yaş fərqinə varmadan evlənirlər. Amma müəyyən bir müddət keçdikdən sonra onlar arasındakı yaş fərqi özünü büruzə verməyə başlayır. Ailədə qərarlar ortaq şəkildə qəbul olunmalı olduğu halda yaşca böyük olan öz fikirlərini diqtə etməyə başlayır. Bu da münasibətlərdə gərginliyin artmasına gətirib çıxarır. Ailədə yaşca böyük olanın həyat təcrübəsi böyük olduğu üçün başlayır tövsiyələr, məsləhətlər verməyə. Bu da bir çox hallarda qarşı tərəfin xoşuna gəlmir, sanki özünü çərçivədə hiss edir. Yaş fərqi ən çox da bioloji baxımdan maneçilik törədir. Müəyyən bir müddətdən sonra qadınlar cinsi əlaqəyə girə bildiyi halda, kişilər üçün bu imkansız hala gəlir. Bu da yaşca böyük olan kişilərdə qısqanclığa səbəb olur, depressiyaya düşürlər. Ailədə qadın özündən gənc birisi ilə evləndikdə isə çox vaxt xəyanətə uğrayır. Təcrübə göstərir ki, aralarında çox da böyük yaş fərqi olmayan cütlüklərin dünyagörüşü, meylləri, davranışları bir-birini tamamlayır".
Birlik sədri onu da vurğuladı ki, gənc qız özündən 20-30 yaş böyük kişi ilə ailə həyatı qurmaq istəyirsə, bu o deməkdir ki, qızın travması, ata boşluğu və ata qayğısından məhrum olunmuşluğu var. Yəni o, ata qayğısı, ata obrazı axtarır. Bu qızlar ailədə travma alırsa, seçdiyi insanda da onun təzahürünü görə bilərik.
Günel CƏLİLOVA
