Rəqəmsal inkişaf və nəqliyyat nazirinin müavini Rəhman Hümmətov ictimai nəqliyyatın üzləşdiyi problemlərdən danışarkən maraqlı məqamlara toxunub.
O bildirib ki, bu gün ölkə ərazisində sərnişindaşıma qiymətləri onun maya dəyərindən iki dəfə azdır: “Metro və dəmir yolu dövlət tərəfindən subsidiyalaşdırılır. Avtobus fəaliyyəti isə qismən subsidiyalaşdırılır. Avtobus qiymətlərinin eyni saxlanması ilə daşıyıcılarının marağının azalmasını görürük. Bununla bağlı ciddi müzakirələr gedir, optimal bir variant tapılmalıdır. Ümumiyyətlə, ölkədə əhalinin 36 faizinin nəqliyyata çıxış imkanları məhduddur. Bu bizim avtobus şəbəkəsinin genişləndirilməsini tələb edir. Bunun üçün isə daşıyıcılara bu sahənin rentabelli olmasını təmin etmək vacibdir. Biz anlayırıq ki, məsələlər həssas təbəqəni narahat edir. Lakin dövlət tərəfindən düzgün tənzimlənmə yenə də vətəndaşların marağına xidmət edir. Ümumiyyətlə, ölkə üçün faydalı və dayanıqlı həll modelini seçib tapmalıyıq".
Nazir müavininin bu açıqlaması daşıyıcı şirkətlər tərəfindən dəstəklənib. Onlar hesab edirlər ki, çox nadir hallarda dövlət rəsmiləri ictimai nəqliyyatın üzləşdiyi çətinlikləri aydın şəkildə cəmiyyətə çatdırır.
Qeyd edək ki, son zamanlar ölkədə nəqliyyatda gediş haqlarının artırılması ilə bağlı müzakirələr gedir. Dəfələrlə daşıyıcılar bununla bağlı hökumətə müraciət ediblər. Lakin metro və avtobuslarda gediş haqlarının artırılması əhalinin narazılığına səbəb olur. Ekspertlər isə bildirir ki, yaxın müddət ərzində ictimai nəqliyyatda gediş haqqı artacaq. Əgər bu olmazsa daşıyıcılar xəttə çıxmaqdan imtina edəcək. Bir qisim ekspertlər isə düşünür ki, ictimai nəqliyyatda gediş haqqının artırılmasına ehtiyac yoxdur. Məlumdur ki, ictimai nəqliyyatdan aztəminatlı təbəqə və tələbələr istifadə edir. Onların maddi durumu nəzərə alınaraq, gediş haqqının artırılması düzgün deyil. Yaxşı olar ki, dövlət tərəfindən daşıyıcılara müəyyən dəstək göstərilsin.
“Sərnişinlərin ictimai nəqliyyatda daşınmasının xidmət səviyyəsi o qədər aşağıdır ki, təyin edilən 30 qəpik belə çoxdur”
Nəqliyyat eksperti Eldəniz Cəfərov bildirdi ki, bu gün Bakı şəhərində sərnişinlərin ictimai nəqliyyatda daşınmasının xidmət səviyyəsi o qədər aşağıdır ki, təyin edilən 30 qəpik belə çoxdur: “Danılmaz faktdır ki, vətəndaş bu gün avtobusu saatlarla dayanacaqda gözləyir. Ara intervalları çoxdur, belə olan halda daşınmada nəyin müqabilində qiymət qalxır? Uzunluğu 20-30 km olan marşrut xəttinə 6-7 avtobus buraxan özəl daşıyıcılar var. Keyfiyyət səviyyəsinin aşağı olduğu vaxtda necə və hansı xərclərdən danışmaq olar? İnsanlar daşınma xidmətlərindən razı deyil”.
Ekspert hesab edir ki, dövlət ictimai nəqliyyatda qiymətlərin yüksək olmasında maraqlı deyil. Dövlət maraqlıdır ki, ictimai nəqliyyat ucuz, cəlbedici olsun, vətəndaşlar ictimai nəqliyyatdan rahatlıqla istifadə edə bilsinlər.
Günel CƏLİLOVA
