Azərbaycanda avtomobillərin sayı gündən-günə artır. Amma avtomobillər çoxaldıqca özü ilə problemləri də gətirir. Bu problemlərdən biri də avtomobillərin parklanmasıdır. Avtomobillər artır, avtomobili park etmək üçün yerlərin sayında isə, hələ ki, artım müşahidə olunmur.
Park üçün yeri olmadığından, çarəsiz qalan sürücü maşınını qanunsuz olaraq haradasa saxlamağa məcbur olur. Belə olan halda insanlar inzibati xətaya yol verirlər. Bu da nəticə etibarilə sonradan onlara problem yaradır. Yəni avtomobil sahibləri cərimələnir və bu narazılıqlara yol açır.
Tıxacların əsas səbəblərindən biri küçələrdən parklanma yeri kimi istifadə olunmasıdır. Araşdırmalar zamanı müəyyən edilib ki, qeyri-qanuni park etmə halları, sürücülərin dayanma-durma qaydalarını pozmaları istənilən halda küçələrdə tıxacın yaranmasına və ya nəqliyyat vasitələrinin sıxlığına səbəb olur.
Ərşad Hüseynov: “Avtomobillərin sayı artdıqca parkinq xidmət növünün də sayı artmalıdır”
Nəqliyyat üzrə ekspert Ərşad Hüseynov bildirdi ki, dünya praktikasında müasir texnologiyalar əsasında, daha çox, dəmir konstruksiyalı parklam yerlərindən istifadə olunur, hətta avtomobillər bəzən lift vasitəsilə müxtəlif mərtəbələrə qaldırılıb yerləşdirilir: “Avtomobillərin sayı artdıqca, bu kimi xidmət növünün də sayı artacaq. Bu gün Bakıda, bayram və istirahət günləri istisna olmaqla, mövcud parklama yerlərinin hamısında boş yerlər qalır. Məsələn, ticarət mərkəzlərindəki dayanacaqda boş yerlər olsa da, ətrafında xeyli sayda avtomobil saxlanılır. Bu isə bir tərəfdən bəzi vətəndaşlara görə həmin yerlər üçün xidmət haqqının baha olması, digər tərəfdən isə sürücü olaraq parklama yerlərindən istifadə etmək vərdişlərini özümüzə aşılaya bilməməmizdən irəli gəlir. Bu vərdişləri özümüzə aşılayandan sonra sektor investisiyalar üçün daha cəlbedici olacaq”.
Elməddin Muradlı: “Şirkətlər 200 mənzilli bina tikir, ən yaxşı halda isə 50-60 avtomobil üçün parklanma yeri yaradırlar, ancaq…”
Nəqliyyat eksperti Elməddin Muradlı bildirdi ki, Bakıda parklanma yerləri məhdud saydadır və bunun da səbəbi tikinti şirkətlərinin şəhərsalma qaydalarını kobud şəkildə pozmasıdır: “Aidiyyəti qurumlar da bu məsələyə biganə yanaşır. Sovet dövründə tikilən binalarda gələcəkdə avtomobilləşmə artımı nəzərə alınmayıb ki, bu maşınlar üçün parklanma şəraiti necə olacaq. İndi müasir dövrdə tikilən binalarda isə bu proses bir az fərqli formada tənzimlənir. Bu şirkətlər sanki acgözlük nümayiş etdirirlər. Tutaq ki, 200 mənzilli bina tikirlər. Bu halda, təxminən 200 maşın üçün park yeri tikilməlidir, yəni ən minimum bu qədər olmalıdır. Bunlar isə 200 mənzilli bina tikirlər, ən yaxşı halda isə 50-60 avtomobil üçün parklanma yeri yaradırlar.
Binaların zirzəmiləri bir-iki mərtəbə parkinq yeri kimi düzələ bilər, həyətində parklanma yeri üçün şərait yaradıla bilər, amma şirkətlər bir mərtəbəni parkinq edirlər, onu da sakinlərə baha qiymətə satırlar. Bu isə qanunsuzdur. Mənzil Məcəlləsinə görə, bu yerlər sakinlərin ixtiyarına verilməlidir. Şirkətlər qanunu pozaraq sakinlərə bunu pulla satırlar. Binanın birinci mərtəbəsini adətən ticarət mərkəzi, gözəllik salonu, fitnes salonu və sair məqsədlər üçün istifadə edirlər. Amma məntiqlə düşünəndə, nəzərə almırlar ki, bu mağazanı burda açırsansa, bura insanlar maşınla gəlirlər”.
Günel CƏLİLOVA
