Bakıda sərnişindaşıma sahəsində kifayət qədər ciddi problemlər olduğu gizli deyil. Bu, xüsusən də özünü sürücülərin davranışında göstərir. Marşrut sürücülərinin çoxunun özünü anormal aparması, bəzilərinin sükan arxasında siqaret çəkməsi, telefonla danışması, sərnişinlərlə normal rəftar etməməsi kimi hallar tez-tez müşahidə edilir.
Ən böyük problem isə avtobus sürücüləri arasında narkomanların, nəşəxorların olmasıdır.
Bu günlərdə DİN-in Baş Dövlət Yol Polisi İdarəsinin Ekoloji Nəzarət Bölüyünün əməkdaşları tərəfindən görülən tədbirlər nəticəsində narkotik maddənin təsiri altında avtobus idarə edən Həzrətquliyev Kənan Aftandil oğlunun qanunazidd əməllərinin qarşısı alınıb.
Ekspertlər bildirir ki, son zamanlar narkotik qəbul edib avtobus idarə edən sürücülərin sayı artıb. Bunun səbəbi də sürücülərin xəttə çıxmadan əvvəl tibbi müayinədən keçməməsidir.
Emil Maqalov: “Hazırda sərnişindaşımada narkotestlərin olmaması bu cür halların yaranmasına əlverişli imkan yaradır”
Narkomaniya üzrə ekspert Emil Maqalov bildirdi ki, narkotik vasitələrdən istifadə edənlər digər yerlərdə iş tapmadıqları və ya sənətləri olmadığı üçün sürücülük vəsiqəsi alıb məcburi sərnişindaşıma ilə məşğul olurlar. Bu səbəbdən də narkotik istifadə edib ictimai nəqliyyata çıxan sürücülərin sayı artmağa başlayıb: “Hazırda sərnişindaşımada narkotestlərin olmaması bu cür halların yaranmasına əlverişli imkan yaradır. Hər gün mütləq test götürülməlidir, çünki narkotik vasitələr müxtəlif zaman çərçivəsində - 24 saat, 1 həftə və 1 ay qala bilir. Narkotik vasitə qəbul etmiş sürücülərin aşkarlanması, tapılması, cəzalandırılması və nəqliyyat vasitəsindən onların istifadə etməsinin qarşısının alınması birbaşa olaraq Dövlət Yol Polisinin səlahiyyətində qalır. Hansısa səbəbdən polis sürücünü saxladıqda mütləq şəkildə onları 5 dəqiqəlik testlərdən keçirir. Yaxşı olar ki, sərnişindaşımaya cavabdeh olanlar da gündəlik olaraq test yoxlaması keçirsinlər. O zaman narkotik istifadəçiləri biləcək ki, testlər var və məcburi bundan istifadə etməyəcək”.
Aytəkin Kamranqızı: “Narkotik maddə qəbul edərək avtomobil, avtobus sürən vətəndaşlara qarşı daha ciddi addımlar atılmalıdır”
Sosiloq Aytəkin Kamranqızı bildirdi ki, reysə narkotik vasitə təsiri ilə çıxan sürücülər sərt cəzalandırılmalıdır: “Adam narkotik aludəsidir. Aludəçilik isə davamlı xəstəlikdir. Belələrinə həbs cəzası verilməlidir. Çünki başqalarının həyatını risqə atır. Biri var, narkotik istifadə edib öz maşınını sürə, bir də var, narkotik maddənin təsiri altında 50-60 nəfərin həyatını təhlükəyə ata. Sürücülük hüququ da alına bilər. İctimai nəqliyyatdakı kateqoriyası geri qayıtmamalıdır. Narkotik maddə qəbul edərək avtomobil, avtobus sürən vətəndaşlara qarşı daha ciddi addımlar atılmalıdır. Mütəmadi olaraq reydlər keçirilməli və bunun qarşısı alınmalıdır”.
Ekspert hesab edir ki, avtobus sürücülərinə ciddi nəzarət edilməlidir. Onun sözlərinə görə, avtobus sürücülərinə nəzarət edilmədikdə onların sükan arxasına əyləşməsi sərnişinlərin həyatını təhlükəyə atmaqdır, ona görə də, bütün bunları qaydaya salmaq tələb olunur.
Günel CƏLİLOVA
