30/01/2023 01:24
728 x 90

Tovuzun Əsrik Cırdaxan kənd məktəbində dərslər bu gündə keçirilir...

img

Sosial şəbəkələrdə Tovuz rayonu, Əsrik Cırdaxan kəndi Məstan Əliyev adına tam orta məktəbindən fotolar yayılıb. Görüntülərdə şagirdlərin sinif otağında üst geyimi və papaqla oturduğunu görmək mümkündür.

Şagirdlərin üst geyimində dərsdə oturması o deməkdir ki, qeyd edilən təhsil ocağında istilik yoxdur. Baxmayaraq, təhsil müəssisələrinin istiliklə təmin olunması ilə bağlı hökumət tərəfindən tapşırıq verilmişdi. Bununla belə, zaman-zaman ucqar kənd məktəblərində istiliyin olmaması ilə bağlı məlumatlar yayılır.

  • Qazax-Tovuz Regional Təhsil İdarəsi: “İşıqlar söndüyü üçün məktəbdə istiliklə bağlı problem yaranıb və şagirdlər üst geyimləri ilə əyləşib”

Əsrik Cırdaxan kənd Məstan Əliyev adına tam orta məktəbdə istiliyin nə səbəbdən olmaması barədə Qazax-Tovuz Regional Təhsil İdarəsindən bildirildi ki, sözügedən şəkil dekabrın 2-si çəkilib: “Həmin məktəb istilik sistemi ilə yaxşı təmin edilib. Həmin gün kənddə işıqlar söndüyü üçün məktəbdə istiliklə bağlı problem yaranıb və şagirdlər üst geyimləri ilə əyləşib”.

  • Nizami Hüseynov: “Şagird soyuq sinif otağında müəllimin dediyini necə başa düşəcək?”

Təhsil eksperti Nizami Hüseynov qeyd etdi ki, kənd məktəblərində istiliklə bağlı problem yaşanır: “Azərbaycan Respublikasında istilik sistemi ilə bağlı qış mövsümü hər il 16 noyabrdan başlayaraq 15 apreldə bitir və 5 ay davam edir. Ölkə ərasizində soyuq havalar sentyabr ayının sonundan başlayır. Artıq uzun illərdir ki, bu tendensiya davam edir. Ölkəmizin dağlıq və dağətəyi rayonlarında havanın hərarəti Bakı ilə müqayisədə daha soyuqdur”.

Həmsöhbətimiz bildirdi ki, məktəblərin bir çoxunun həm istilik, həm su, həm də kanalizasiya sistemində bir çox prolemlər var. Bütün bunlar öz həllini gözləyən problemlərdir: “Danılmaz faktdır ki, ölkə rəhbərliyi təhsilə çox ciddi qayğı və diqqət göstərsə də, müəyyən qədər aidiyyəti dövlət qurumları bu sahəyə səhlənkar yanaşır. Mətbuatda hər hansı bir məsələ işıqlandırıldıqdan sonra həmin problemin həlli istiqamətində iş görülməsi təmin edilir. Ölkəmizdə modul tipli məktəblərin sürətlə inşası həyata keçirilərsə, uşaqlar yaxşı şəraiti olan təhsil müəssisələrində təhsilini davam etdirər. Tədrisin keyfiyyətinə birbaşa məktəbin infrastrukturu təsir göstərir. Şagird soyuq sinif otağında müəllimin dediyini necə başa düşəcək? Şagirdin fikri dərsdə deyil, necə isinmək barədə olacaq”.

Günel CƏLİLOVA

Peşə etikası

Son xəbərlər