30/01/2023 02:47
728 x 90

Məktəb direktoru və müavinlərin təyinatı üçün imtahanlar başlayıb – şəffaflığa şübhələr var...

img

Azərbaycanda son illər təhsilin keyfiyyətinin yüksəldilməsi, məktəb direktorlarının, digər rəhbər şəxslərin dəyişdirilməsi, imtahanla seçilməsi prosesi gedir. Ancaq xüsusilə direktorlarla bağlı məsələ həllini tapmır və bunun dərin səbəbləri olduğu üzə çıxır. Məktəb direktoru və onun müavinlərinin təyinatı ilə bağlı yaranan problemlərə son qoymaq üçün bu vəzifəyə işə qəbul müsabiqə formatında həyata keçirilir.

Məlumat üçün bildirək ki, yerli təhsili idarəetmə orqanları tərəfindən ümumi təhsil müəssisələrinə direktor, direktor müavini və təşkilatçı vəzifələrinə işə qəbul üzrə müsahibə mərhələsi keçirilir. Elm və Təhsil Nazirliyinin yaydığı məlumatda qeyd edilir ki, bu mərhələdə namizədlərin peşə üzrə nəzəri bilikləri, idarəetmə bacarıqları və şəxsi keyfiyyətləri qiymətləndirilir.

Iddia olunur ki, direktorların işə qəbulunda şəffaflıq və obyektivlik qorunub saxlanılmır.

Maraqlıdır, məktəb direktoru və direktor müavinlərinin işə qəbulunda hansı qanunsuzluqlar qeydə alınır:

  • Kamran Əsədov: “Müsabiqə və müsahibədən uğurla keçənlərin təyin olunmaması direktorların təyinatı sahəsindəki şəffaflığı şübhə altına alır”

Təhsil eksperti Kamran Əsədov qeyd etdi ki, Elm və Təhsil Nazirliyində ümumi təhsil müəssisələrinin direktoru vəzifəsinə işə qəbul və direktorların yerdəyişməsi qaydaları bir neçə ildir ki, yeni formatda həyata keçirilir. Tətbiq edilən yeni qaydalara əsasən, ümumi təhsil müəssisələrinin vakant olan direktor vəzifələrinin tutulması üçün Təhsil Nazirliyi tərəfindən mərkəzləşdirilmiş qaydada müsabiqə keçirilir. 4 mərhələdən ibarət olan müsabiqəni uğurla keçənlər sonda bu vəzifəyə təyin olunurlar: “Direktor vəzifəsinin tutulması üzrə müsabiqədə pedaqoji və ya idarəetmə sahəsi üzrə ali təhsili olan, azı 5 il pedaqoji staja malik hər bir şəxs iştirak edə bilər. Qeyd olunan göstəricilərə malik olan istənilən şəxs müsabiqədə iştirak üçün qeydiyyatda olduğu və ya faktiki yaşadığı rayon (şəhər) məktəblərinin vakant olan direktor vəzifəsini seçə bilmək hüququ verilib. Bundan başqa, əlavə olaraq, “Ümumi təhsil müəssisələrində rəhbər vəzifələrə namizədlərin müəyyənləşdirilməsi üzrə təlim kursları”nın əhatə etdiyi rayon və şəhərlərdə direktorların işə qəbulu üzrə müsabiqəyə bu kursları bitirərək “Uğur sertifikatı” əldə etmiş şəxslər müsabiqənin üçüncü mərhələsindən (imtahan) azad edilərək, birbaşa dördüncü mərhələyə (müsahibə) keçirlər. Bütün bunların fonunda hələ də  Bakı və regionlarda bütün mərhələləri keçib ehtiyatda qalan, təyin olunmayan kifayət qədər namizəd var. Bu o deməkdir ki, hazırda yüzlərlə məktəb əvəzedici şəxslər tərəfindən idarə olunur ki, bu da birbaşa təhsilin keyfiyyətinə mənfi təsir göstərir.  Belə ki, o vəzifədə daimiləşməyəcəyini bilən əvəzedici direktor tam şəkildə, yüksək səviyyədə vəzifəsini yerinə yetirmir. Hüquqi baxımdan da, əvəzedici direktorun uzun müddət o vəzifəni tutması düzgün deyil. Qanunvericiliyin tələblərinə görə, əvəzedici qaydada bu vəzifələr yalnız 6 aya qədər tutula bilər. Hələ də müsabiqə və müsahibədən uğurla keçənlərin təyin olunmaması direktorların təyinatı sahəsindəki şəffaflığı şübhə altına alır”.

  • Elçin Əfəndi: “Direktorların işə qəbulunda şəffaflıq və obyektivlik qorunub saxlanılmır”

Təhsil eksperti Elçin Əfəndi bildirdi ki, direktorların işə qəbulunda şəffaflıq və obyektivlik qorunub saxlanılmır: "Nəticə etibari ilə həmin vəzifələri haqqı çatmayan direktorlar tutur. Bir müddət sonra isə korrupsiya faktının, qanunvericiliyin tələblərinin kobud şəkildə pozulmasının, müəllim kollektivinə, yaxud şagirdlərə qarşı rəhbər işçinin özbaşınalıqlarının şahidi oluruq. Çünki müəyyən regional təhsil idarələri var ki, söhbət həm rayon, həm də kənd məktəblərindən gedir, orada bəzi məktəblərin rəhbər işçiləri ya yaş həddini keçsələr də, hələ fəaliyyət göstərirlər, ya da saxta diplomla çalışırlar. Əgər bura kimi regional təhsil idarələri işlərini şəffaf görsəydilər, təbii ki, bu məsələləri üzə çaxartmalı idilər. Amma görünən odur ki, hazırda onların apardıqları işə qəbul prosesində də neqativ hallar - tanışlıq, tapşırıqla işə düzəlmə, korrupsiya ilə işə düzəlmə halları öz əksini tapmış olacaq”.

Günel CƏLİLOVA

Peşə etikası

Son xəbərlər