07/02/2023 03:41
728 x 90

Yanvarın 1-dək uçota alınmağa çalışın, qazi və şəhid ailələri - Prezident yeni mənzil layihəsinə qərar verdi…

Fatimə Hacıbəyli: “Bu gün şəhid ailələri və qazilər cəmiyyətimizin ən hörmətli, rəğbətlə qarşılanan ayrılmaz hissəsidir”

img

Azərbaycan Respublikasının ərazi bütövlüyünün, müstəqilliyinin, konstitusiya quruluşunun müdafiəsi ilə əlaqədar əlilliyi müəyyən edilmiş şəxslərin mənzil şəraiti yaxşılaşdırılacaq.

Bu, Prezident İlham Əliyevin imzaladığı müvafiq sərəncamla "Azərbaycan Respublikasının ərazi bütövlüyünün, müstəqilliyinin və konstitusiya quruluşunun müdafiəsi ilə əlaqədar əlilliyi müəyyən edilmiş şəxslərin və şəhid ailələrinin sosial-məişət şəraitinin yaxşılaşdırılması ilə bağlı bir sıra tədbirlər haqqında" Azərbaycan Respublikası Prezidentinin 2021-ci il 25 yanvar tarixli 2449 nömrəli Sərəncamına edilən dəyişiklikdə əksini tapıb.

Beləliklə, Əmək və Əhalinin Sosial Müdafiəsi Nazirliyində 2014-cü il yanvarın 1-dən 2023-cü il yanvarın 1-dək yerli icra hakimiyyəti orqanlarında yaşayış sahəsinə ehtiyacı olan qismində uçota alınan və Azərbaycan Respublikasının ərazi bütövlüyünün, müstəqilliyinin, konstitusiya quruluşunun müdafiəsi ilə əlaqədar əlilliyi müəyyən edilmiş şəxslər və şəhid ailələri mənzillə təmin olunacaq. Uçota alınma tarixindən asılı olmayaraq, Çernobıl AES-də qəzanın ləğvi (o cümlədən hərbi xidmət vəzifələrinin (xidməti vəzifələrin) yerinə yetirilməsi) ilə əlaqədar əlilliyi müəyyən edilmiş şəxslərin (ailələrin) də 2021–2025-ci illər ərzində mərhələlərlə mənzil və ya fərdi evlə təmin edilməsi üçün Azərbaycan Respublikasının Prezidenti ilə razılaşdırmaqla tədbirlər planını təsdiq edib həyata keçirəcək.

Bundan əvvəl 2014-cü il yanvarın 1-dən 2020-ci il yanvarın 1-dək yerli icra hakimiyyəti orqanlarında yaşayış sahəsinə ehtiyacı olan qismində uçota alınan və sadalanan kateqoriyadan olan şəxslər 2021–2025-ci illər ərzində mərhələlərlə mənzil və ya fərdi evlə təmin edilməli idi.

Eyni zamanda, sərəncama əsasən, yerli icra hakimiyyəti orqanlarında yaşayış sahəsinə ehtiyacı olan qismində uçota alınmış və 2020-2022-ci ildə aparılan hərbi əməliyyatlar zamanı Azərbaycan Respublikasının ərazi bütövlüyünün, müstəqilliyinin, konstitusiya quruluşunun müdafiəsi ilə əlaqədar əlilliyi müəyyən edilmiş şəxslər və şəhid ailələri də mənzil və ya fərdi evlə təmin ediləcək.

Məlumat üçün bildirək ki, 44 günlük Vətən müharibəsindən sonra şəhid ailələri və müharibə ilə əlaqədar əlilliyi olan şəxslərə 4100-ə yaxın, ümumilikdə ötən dövrdə 13 mindən çox mənzil və fərdi ev təqdim edilib.

2022-ci il üzrə də 1500 mənzil və fərdi ev verilməsi nəzərdə tutulub ki, artıq 1100-ə yaxını təqdim edilib.

Müharibə ilə əlaqədar əlilliyi olan şəxslərin avtomobillə təminatı tədbirləri çərçivəsində onlara postmüharibə dövründə 300-dən çox, ümumilikdə ötən dövrdə 7500-dən artıq avtomobil verilib.

  • “Dövlət tərəfindən şəhid ailələrinin və müharibə əlillərinin mənzil-məişət şəraitinin yaxşılaşdırılması, onlara fərdi evlərin verilməsi istiqamətlərdə mühüm addımlar atılır”

Mənzil ehtiyacı olan şəhid və qazi ailələrinin uçota alınmasının əhəmiyyəti haqqında “Vəfa” Sosial İctimai Birliyinin rəhbəri Fatimə Hacıbəyli qeyd etdi ki, Prezident İlham Əliyev şəhid ailələri, qaziləri daim diqqətdə saxlayır: “Onların sosial qayğılarının qarşılanması istiqamətində konkret proqramlar mövcuddur. Eyni zamanda, bu işlə bağlı dövlət büdcəsindən vəsait ayrılıb. Dövlət tərəfindən şəhid ailələrinin və müharibə əlillərinin mənzil-məişət şəraitinin yaxşılaşdırılması, onlara fərdi evlərin, mənzillərin verilməsi və digər bir sıra istiqamətlərdə mühün addımlar atılır. Prezident İlham Əliyevin müvafiq sərəncamı şəhid ailələri, müharibə əlilləri və digər həssas qrupa aid olan insanların mənzillə tam təminatının həyata keçirilməsi üçün dövlət proqramı təsdiqlənib”.

Birlik sədri onu da əlavə etdi ki, 2020-2022-ci ildə aparılan hərbi əməliyyatlar zamanı Azərbaycan Respublikasının ərazi bütövlüyü ilə əlaqədar əlilliyi müəyyən edilmiş şəxslər və şəhid ailələri də mənzil və ya fərdi evlə təmin ediləcək: “Şəhid ailələri və qazilər üçün mənzillər, evlər tikilir, onlara maşınlar verilir, bir çox sosial təminatları yerinə yetirilir. Onların övladlarının təhsilin müxtəlif dərəcələrində təhsil haqlarını dövlət özü ödəyir, bir sıra güzəştlər tətbiq edilir. Bu gün şəhid ailələri və qazilər cəmiyyətimizin ən hörmətli, rəğbətlə qarşılanan ayrılmaz hissəsidir”.

Günel CƏLİLOVA

Peşə etikası

Son xəbərlər