07/02/2023 03:36
728 x 90

Hesablama Palatası DSMF-ni prokurorluğa niyə verir…

img

Hesablama Palatası Əmək və Əhalinin Sosial Müdafiəsi Nazirliyinin tabeliyindəki Dövlət Sosial Müdafiə Fondunda (DSMF) aparılan yoxlamaların nəticəsini açıqlayıb.

Palatanın məlumatında qeyd edilir ki, yoxlama 2021-ci ildə fondun gəlir və xərc göstəricilərinin hesabatlarda doğru əks olunması, eləcə də publik hüquqi şəxs qismində vəsaitlərin idarəolunması ilə bağlı fəaliyyətini əhatə edib. Hesabatda qeyd olunub ki, 2021-ci il üçün DSMF-nin icra olunmuş gəlir və xərc göstəriciləri cəmi məbləğ baxımından hesabatlarda düzgün əks etdirilsə də, ayrı-ayrı istiqamətlər üzrə bəzi uyğunsuzluqlar aşkar olunub.

Belə ki, Fondun xəzinədarlıq vasitəsilə icra edilmiş gəlirləri və xərcləri barədə məlumatların üzləşdirilməsi ilə bağlı hüquqi aktlarda qeyd edilmiş tələblər tam təmin olunmayıb, bu isə daxilolmaların məbləğinin hesabatlarda 8,7% çox göstərilməsi ilə nəticələnib.

Məlumatda o da qeyd edilir ki, təhrif edilmiş sənədlər əsasında 24 rayon (şəhər) üzrə 51 nəfərə 20 aprel 2013-cü il tarixədək pensiya təyin edilməklə 884 min manat məbləğində vəsait ödənilməsi halı və respublikanın digər rayon və şəhərlərində eyni hal üzrə cinayət tərkibinin əlamətlərinin olma ehtimalını diqqətə alaraq kənar dövlət maliyyə nəzarətinin nəticələri barədə müvafiq materialların Baş Prokurorluğa göndərilməsi qərara alınıb.

  • Rəşad Mehdili: “Hesabatın dərci Fondun fəaliyyətində şəffaflığın göstəricisidir”

Dövlət Sosial Müdafiə Fondunun (DSMF) İctimaiyyətlə əlaqələr şöbəsinin müdiri Rəşad Mehdili mövzu ilə bağlı açıqlamasında +bildirdi ki, Hesablama Palatasının Dövlət Sosial Müdafiə Fondunun (DSMF) kənar dövlət maliyyə nəzarəti tədbirinin nəticələri haqqında Baş Prokurorluğa göndərdiyi məlumatda qeyd olunan 51 nəfərin pensiyası 2013-cü ilin may ayınadək olan dövrdə təyin olunub: “Pensiya təyin olunmuş həmin şəxslərin şəxsiyyət vəsiqəsində doğum tarixi haqqında məlumatların saxtalaşdırması halları aşkarlanıb. Sığorta haqlarının şəxsi hesablarda əks etdirilməsi üçün son illər DSMF tərəfindən mühüm işlər aparılır. Hələ 2006-2016-cı illərdə ödənilən, lakin işçilərin fərdi hesabları üzrə bölüşdürülməmiş 1,2 milyard manat vəsait artıq fərdi hesablara bərkidilib ki, bu da sosial sığorta iştirakçılarının hüquqlarının qorunmasına yönələn mühüm addımdır. DSMF Maliyyə Hesabatlarının Beynəlxalq Standartlarına uyğun şəkildə bu il ilk dəfə konsolidə edilmiş maliyyə hesabatını audit rəyi ilə birlikdə dərc edib. Hesabatın dərci Fondun fəaliyyətində şəffaflığın göstəricisidir”.

  • Akif Nəsirli: “Audit sənədlərini təhlil edəndə aydın olur ki, makroiqtisadi göstəricilərdə kənarlaşma daha çoxdur”

Liberal İqtisadçılar Mərkəzinin rəhbəri Akif Nəsirli  bildirdi ki, əksər dövlət qurumlarında korrupsiya faktları var. Hesablama Palatası mütəmadi olaraq hər il cür məlumatlar yayır: “Hesablama Palatası elə halları açıqlayır ki, onu gizlətmək mümkün deyil. Audit sənədərini təhlil edəndə aydın olur ki, makroiqtisadi göstəricilərdə kənarlaşma daha çoxdur”.

Həmsöhbətimiz onu da əlavə etdi ki, Hesablama Palatası DSMF barəsində aşkar etdiyi qanunsuzluq barəsində Baş Prokurorluğa müraciət edib və Prokurorluq bu məsələni nəzarətə götürəcək.

Günel CƏLİLOVA

Peşə etikası

Son xəbərlər