"Son zamanlar uşaqlar arasında artıq çəki və piylənmə halları artıb" - Əhliman Əmiraslanov

Artıq çəki və piylənmə təkcə səhiyyənin yox, ümumilikdə cəmiyyətimizin çox ciddi problemidir. Trend-in məlumatına görə, bunu bu gün “Sağlam çəkiyə doğru” layihəsinin təqdimatı mərasimində Milli Məclisin Səhiyyə komitəsinin sədri Əhliman Əmiraslanov deyib.

O qeyd edib ki, bu gün dərmanların keyfiyyəti də cəmiyyətimizi narahat edir.

“Dünyada artıq çəki və piylənməyə məruz qalan insanların sayı atmaqdadır. Bəzi ölkələrdə bu rəqəm 50 faizin üzərindədir. Artıq çəki və piylənmə bir çox xəstəliklərin, xüsusilə, ankoloji, ürək xəstəlikləri, şəkərli diabet və digər bir çox xəstəlikərin yaramasına səbəb olur. Piylənmə və artıq çəki insan ömrünü azaldır”, - deyə komitə sədri vurğulayıb.

"Son zamanlar uşaqlar arasında artıq çəki və piylənmə halları artıb. Azərbaycan əhalisinin təxminən 20 %-ə yaxınının artıq çəkidən əziyyət çəkdiyi deyilsə də, hesab edirəm ki, bu say bir qədər də artıqdır. Çünki ÜST-ün sənədlərində bu göstərici 50-60 %-in üzərindədir" deyən Ə.Əmiraslanov qeyd edib ki, artıq çəki və piylənmə insan ömrünü ən azı 10 il qısaldır.

"ÜST-ün daha bir rəqəminə görə dünyada yaşayan 8 milyard əhalinin 20 milyonu artıq çəkidən əziyyət çəkir. Bu problemin nə dərəcə ağır və təhlükəli olduğu göz önündədir", - deyə o əlavə edib.