05/02/2023 14:36
728 x 90

Ananın öz şəhid övladına yazdığı kitabın mürəkkəbi də göz yaşı ilədir – “…Nurlanmış xatirələr”…

img

Bir ananın balasına ağı deməyi qədər ağırdır ananın balasından kitab yazmağı. Elə ağırdır ki, bu ağrını daşımağa gərək ürək daşdan olsun. Anaların ürəyi daş olmaz ki... “Ruhən şəhid ananın Nurlanmış xatirələri” kitabını Rəhilə Ramazanova şəhid balası Nurlan Mustafayevin nurlu, işıqlı xatirəsinə həsr edib. Ana balasından kitab yazıb.

Laylalı, bayatılı, oxşamalı, ağılı, ahlı-naləli misralar, cümlələr ananın parçalanmış ürəyinin daman qanından yaranıb. Ana bağrının parasına, gözünün nuruna, Nurlanının şəkillərini oxşaya-oxşaya, xatirələrini yada sala-sala yazıb bu kitabı. Şəhid anasının balası haqda xatirələri o qədər çoxdur ki, kitaba, dəftərə sığmaz, ananın ürəyinə, yaddaşına sığar, sığallanar xatirələr, göz yaşında yuyular anılar, ağılarla anılar...   

Xüsusi Təyinatlı Qüvvələrin Kapitanı şəhid Mustafayev Nurlan Hamlet oğlu 1990-cı il iyul ayının 22-də Sumqayıt şəhərində doğulub. “Azərbaycan Bayrağı” ordenli şəhidimiz çox az yaşayıb, amma mənalı və zəngin ömür yolu keçib. Vətən müharibəsinin ilk günlərindən torpaqlarımızın azadlığı uğurunda döyüşlərdə iştirak edib, müxtəlif rayonların, strateji yüksəkliklərin azad olunması uğurunda qəhrəmanlıqla döyüşüb. Hadrutun azadlığı uğurunda qəhrəmanlıqla şəhid olan  Xüsusi Təyinatlı Qüvvələrin Kapitanı şəhid Mustafayev Nurlanın qəhrəmanlığı heç zaman undulmaz. Şəhdiliyindən sonra övladı dünyaya gəlib şəhid kapitanın. Oğluna onun öz adı verilib. Bu gün Mustafayevlər ailəsinə Nurlan adlı şəhid əmanəti nur saçır. Atasının adını  daşıyan balaca Nurlan qəhrəman atası ilə fəxr edəcək. Çünki onun atası peşəkar hərbiçi, qorxmaz, şücaətli Vətən oğludur.

II Fəxri Xiyabanda dəfn olunan Xüsusi Təyinatlı Qüvvələrin kapitanı Şəhid Nurlan Mustafayevə həsr olunan “Ruhən şəhid ananın Nurlanmış xatirələri” kitabının redaktoru Lamiyə Rövşənqızı, dizayneri Fariz Məhərrəmovdur. Kitab “Gənclik” nəşriyyatında işıq üzü görüb.

Rəhilə xanımının göz yaşı ilə yazdığı bu kitab ananın balaya duyğu və həsrət dolu məktublarıdır deyərdim. Bu məktublar bir ömürlükdür, heç bitib-tükənməz. Şəhidlərimiz barədə yazılan kitabları oxumaq çox ağrılıdır, illah da ki, bu kitabı ana yazıb, şəhid anası. Ananın yazdığı kitabın mürəkkəbi də göz yaşı ilədir...

İradə SARIYEVA

Peşə etikası

Son xəbərlər