07/02/2023 02:37
728 x 90

"Odlar Yurdu"nda tələbələr təlatümdə - təhsil xərcinin 50 faizini ödəyənlər...

Elçin Əfəndi: “Universitet rəhbərliyi tələbəni kənarlaşdırmalı deyil, əksinə, tələbəyə dəstək olmalıdır”

img

Azərbaycanda təhsil haqqını ödəməkdə çətinlik çəkən xeyli sayda tələbə var. Hazırda fəaliyyət göstərən  ali təhsil müəssisələrində 100 mindən çox tələbə təhsil alır. Tələbələrin əksəriyyəti ödənişli ixtisaslar üzrə təhsil alır.

Məlumat üçün qeyd edək ki, ölkəmizdəki təhsil ocaqlarının ixtisas üzrə ortalama təhsil haqqı 3 min manat təşkil edir. Hətta bəzi ixtisaslar üzrə bu rəqəm 6500, 5000, 4500 manat təşkil edir ki, bu məbləğin də ödənilməsi hər insan üçün asan deyil. Məhz buna görədir ki, son 5 il ərzində 7 min şəxs təhsil haqqını ödəyə bilmədiyi üçün ali təhsilini yarımçıq qoyub, ali təhsil almaqdan imtina edib.

Onu da qeyd edək ki, Təhsil Tələbə Krediti Fondunda bugünə qədər 5580 nəfər kredit almaq üçün müraciət edib. Onlardan 973 nəfərin müraciəti natamam olub. 682 nəfərin müraciəti emal mərhələsindədir. Habelə 576 nəfərin müraciətinə imtina cavabı verilib, 293 nəfərin müraciəti isə banka yönləndirilib.

Təhsil haqqını ödəyə bilməyən tələbələrin imtahana buraxılmama kimi problemi var. Ancaq qanunvericiliyə görə, təhsil haqqının müəyyən bir hissəsini ödəyən tələbə semestr imtahanına buraxılmalıdır. Və ya buna da gücü çatmayan tələbəyə universitet tərəfindən güzəşt edilməlidir. Ancaq təəssüf ki, bəzi universitetlər bu qaydalara əməl etmir. Belə ki, Odlar Yurdu Universitetindən tələbələrə mesaj göndərilib. Mesajda qeyd edilir ki, təhsil haqqının 50 faizindən az hissəsini ödəyənlər semestr imtahanına buraxılmayacaq. Bu qərar tələbələr arasında narahatlığa səbəb olub.

  • “Universitetlər tərəfindən tələbələri qorxudan və stresə salan qərarların verilməsi düzgün yanaşma deyil”

Təhsil eksperti Elçin Əfəndi bildirdi ki, universitetlər tərəfindən tələbələri qorxudan və stresə salan qərarların verilməsi düzgün yanaşma deyil: “Odlar Yurdu Universitetinin özəl təhsil müəssisəsi olduğunu nəzərə alsaq, nəzərdə tutulan qərarı uyğun hesab etmək olar. Çünki universitet özbaşına qərarlar verməkdə sərbəstdir. Hər bir halda universitet kompromisə getməyi bacarmalıdır. Əgər tələbənin hazırda təhsil haqqını ödəmək kimi imkanı yoxdursa, valideynləri ilə profilaktik söhbət aparıla bilər. Eyni zamanda, mövcud vəziyyətdə tələbə təhsil kreditinin götürülməsi ilə bağlı valideynlərə məlumat verilə bilər. Hesab edirəm ki, tələbənin üzərinə qorxuducu təkliflərlə getmək doğru yanaşma deyil. Universitet semestr imtahanına təhdid kimi yanaşmamalıdır. Universitet rəhbərliyi tələbəni kənarlaşdırmalı deyil, əksinə, tələbəyə dəstək olmalıdır. Artıq 1 ildən çoxdur ki, ölkə başçısının fərmanı ilə ölkədə Tələbə Təhsil Kredit Fondu fəaliyyət göstərir. Tələbələrin müəyyən hissəsi fondun yaratdığı imkanlardan yararlana bilib. Bundan başqa, ölkə başçısının fərmanına əsasən Elm və Təhsil Nazirliyinin tabeliyində Təhsilin İnkişafı Fondu yaradılıb. Tələbənin ödənişlə bağlı çətinliyi yarandıqda Elm və Təhsil Nazirliyinin rolu daha vacib əhəmiyyət kəsb edir”.

Günel CƏLİLOVA

Peşə etikası

Son xəbərlər