Gəncədə tələbələr arasında kütləvi dava olub. Hadisə ilə bağlı görüntülər sosial şəbəkələrdə yayılıb. Belə ki, Aqrar Universitetinin tələbələri ilə Gəncə Dövlət Universitetinin tələbələri arasında keçirilmiş futzal oyununda yaranan mübahisə davaya çevrilib. Videonu Azərbaycan Universitetləri səhifəsi yayıb.
Qeyd edək ki, son zamanlar universitet tələbələri arasında qeydə alınan xoşagəlməz halların sayı artıb. Tələbələr arasında kütləvi davalar, onların davranış qaydaları ilə bağlı narazılıqlar artır. Maraqlıdır, universitetlərdə çalışan aidiyyəti şəxslər tələbələr arasında təlim-tərbiyə işlərinə niyə nəzarət etmir ki, vəziyyət bu həddə çatır?
Ekspertlər hesab edir ki, universitetlərdə təlim-tərbiyə işləri, vətənpərlik hisslərinin təbliği lazımi səviyyədə deyil ki, bu gün ali təhsil ocaqlarında bu kimi hallar yaşanır.
“Gənclər siyasətinin əsas tələblərindən biri də Vətənə, doğma torpağa məhəbbət hissinin yüksəldilməsidir”
Psixoloq Könül İsmayılova bildirdi ki, son günlər təhsil sahəsində şagirdlərin, tələbələrin aqressiv davranışları və xüsusən də cinayət tərkibli əməllərə əl atması gündəmdədir: “Son zamanlar gənclər arasında şiddətə meylliliyin artımı müşahidə edilir. Tələbələr arasında baş verən kütləvi davalarda buna bir sübutdur. Bu işdə əsas məsuliyyət ali təhsil ocaqlarının rəhbər vəzifələrinin üzərinə düşür. əgər universitetdə kütləvi dava baş verirsə həmin təhsil ocaqlarının müəllim və işçiləri hara baxırdı? Onlar məsələyə niyə vaxtında müdaxilə etmirdilər ki, hadisə kütləvi şəkil almasın? Belə başa düşülür ki, universitetlər gənclərə vətənpərlik hissini deyil, şiddətini təbliğ edir. Şagird və tələbələrə vətənpərlik hissi aşılanmalıdır. Nəzərə almaq lazımdır ki, tələbə-gənclər nə qədər savadlı, nə qədər vətənpərvər, nə qədər yüksək dünyagörüşünə malik olarsa, dövlətin, millətin gələcəyi bir o qədər işıqlı və ümidverici olar. Hər bir dövlətin varlığı və gələcəyi həm də gənclərin tərbiyəsindən asılıdır. Gəncliyin mənəvi-ideoloji baxımdan hazırlığı isə fraqmental fəaliyyətin deyil, düşünülmüş, ardıcıl gənclər siyasətinin nəticəsidir”.
Həmsöhbətimiz onu da əlavə etdi ki, gənclər siyasətinin əsas tələblərindən biri də Vətənə, doğma torpağa məhəbbət hissinin yüksəldilməsi, eləcə də müasir dünyamızda qloballaşmanın geniş vüsət aldığı bir zamanda milli-mənəvi dəyərlərin qorunub saxlanmasıdır.
Günel CƏLİLOV
