Son bir ildə Azərbaycanda tibbi müalicə xidmətlərinin əksəriyyəti bahalaşıb. Dövlət Statistika Komitəsinin yaydığı məlumata əsasən, qiymət artımı özünü bütün xidmətlərdə göstərib.
Belə ki, 2022-ci ilin oktyabrında terapevt xidmətinin qiyməti 15,69 manat olub. Sentyabr ayı ilə müqayisədə qiymətlər dəyişməsə də, ötən illə müqayisədə qiymət artımı 14%-i keçib. Belə ki, ötən ilin oktyabrında xidmətin qiyməti 13,73 manat idi. Nəticədə artım 1,96 manat və ya, 14,3% olub.
Göz həkimi xidmətində də sentyabr ayı ilə müqayisədə dəyişiklik qeydə alınmayıb. Ötən ilin müvafiq dövrü ilə müqayisədə qiymətlər 15,50 manatdan 19,34 manata yüksəlib. Bununla da 3,84 manat, yaxud 24,8%-lik artım baş verib.
Kardioloq xidmətində sentyabr ayı ilə müqayisədə 0,10 manat və ya 0,5%-lik, artım baş verib. Belə ki, qiymətlər 18,48 manatdan 18,58 manata doğru dəyişib. İllik müqayisədə isə fərq özünü 1,9 manat və ya 11,4%-lik göstərici ilə göstərib. Bununla da qiymətlər 16,68 manatdan 18,58 manata dəyişib.
Fizioterapevt xidməti haqqı üzrə sentyabr ayı ilə müqayisədə 0,10 manat və ya, 1,3% artım müşahidə olunub. Sentyabr ayında göstəricilər 7,60, oktyabr ayında isə 7,70 manat təşkil edib. Ötən ilin müvafiq dövrü ilə müqayisədə qiymətlər 0,71 manat və ya 10,3% artıb. Ötən ilin oktyabrında xidmət haqqı 6,89 manat olub.
Qeyd edək ki, icbari tibbi sığorta ilə bir çox müayinələr pulsuz olsa da, insanlar keyfiyyətli müayinə üçün özəllərə müraciət edir, özəllər isə ancaq ailə həkimi və tibbi sığortanın göndərişi olarsa, pulsuz xidmət göstərəcəyini deyir.
Bir çox tanınmış həkim və cərrahlar ümumiyyətlə icbari sığorta üzrə işləmir, pasiyent qəbul etmir.
“Tibb sahəsində istifadə edilən sərfiyyat materiallarının qiyməti artıb, bu da ümumi qiymətlərə təsir göstərir”
Professor, tibbi ekspert Adil Qeybulla bildirdi ki, qiymət artımı ictimai həyatın bütün sahələrində müşahidə edilir. Postpandemiya dövründə baş verən qiymət artımı bütün sektorlarda qeydə alınır. Bu hal tibb sektorunda da özünü göstərir: “Tibb sahəsində istifadə edilən sərfiyyat materiallarının qiyməti artıb. Nəzərə almaq lazımdır ki, həmin materiallar ölkəyə idxal olunur. Bu da ümumi qiymətlərə təsir göstərir. Onu da deyim ki, tibbi xidmətlərdə qeydə alınan qiymət artımının icbari tibbi sığortaya heç bir aidiyyəti yoxdur. İcbari Tibbi Sığortaya aid olunan xidmətlərdən əhali pulsuz yararlanır. Ancaq özəl sektorda vəziyyət başqadır. Hər halda azad rəqabətdir. Qiymətlərin bazarla tənzimlənməsi üçün müəyyən işlər görülməlidir. Çünki özəl sektor kommersiya təyinatlı tibb müəssisələridir. Bu tibb müəssisələrində həyata keçirilən prosedurların bazar qiyməti var. Və vətəndaş da öz hesabına həmin prosedurun qiymətini ödəyir”.
Günel CƏLİLOVA
