05/02/2023 13:58
728 x 90

Gənclərin xaricdə təhsili üçün bu illik dövlət xərcləri 2 dəfə artırıldı... Tələbələrin sayı artacaqmı...

Kamran Əsədov: “Yeni proqramın icrası ölkəmizdə daha keyfiyyətli insan kapitalının formalaşmasına vəsilə olacaq”

img

Cari ildən maliyyələşdirilməsi nəzərdə tutulan “Gənclərin xarici ölkələrin nüfuzlu ali təhsil müəssisələrində təhsil almalarına dair 2022–2026-cı illər üçün Dövlət Proqramı” üzrə xərclər növbəti ildən təqribən 2,1 dəfə artırılıb ki, bu da Dövlət Proqramı çərçivəsində növbəti il daha çox gəncin dövlət proqramının imkanlarından istifadə etməsinə şəraitin yaradılması ilə əlaqədardır.

Bu barədə Hesablama Palatasının Dövlət Neft Fondunun 2023-cü il büdcə layihəsinə rəyində deyilir.

Qeyd edilib ki, “Gənclərin xarici ölkələrin nüfuzlu ali təhsil müəssisələrində təhsil almalarına dair 2022–2026-cı illər üçün Dövlət Proqramı” xərc maddəsi üzrə 2023-cü ildə 36,7 mln. manat proqnoz müəyyən edilib ki, bu da 2022-ci il proqnozundan 18,8 mln. manat və ya 105,0%, gözlənilən icra göstəricisindən isə 19,1 mln. manat və ya 108,5% çoxdur.

  • “Yeni proqram çərçivəsində xarici ölkələrə oxumağa gedəcək gənclərin rahatlığı üçün məbləğ artırılıb, bu yaxşı bir haldır”

Mövzu ilə bağlı fikir bildirən təhsil eksperti Kamran Əsədov “Bakı-Xəbər”ə açıqlamasında qeyd etdi ki, Azərbaycandan xarici ölkələrə oxumağa tələbələr  əsasən iki proqram üzrə gedir. “2019-2022-ci illər üçün Azərbaycan Respublikasında ali təhsil sisteminin beynəlxalq rəqabətliliyinin artırılması üzrə Dövlət Proqramı" və Prezident İlham Əliyev tərəfindən yeni təsdiq edilən “Gənclərin xarici ölkələrin nüfuzlu ali təhsil müəssisələrində təhsil almaları” üzrə. Buna qədər 2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı" çərçivəsində Azərbaycan vətəndaşlarının dünyanın 32 ölkəsinin 350-dən çox ən nüfuzlu ali təhsil müəssisəsində təhsil almaları məqsədilə, ümumilikdə, 3558 təqaüd verilib.

Azərbaycanda rəqabətə davamlı və dayanıqlı iqtisadiyyatın formalaşması üçün Prezident İlham Əliyev tərəfindən yeni xaricdə təhsil proqramı təsdiq edilib. Bu proqram çərçivəsində nəzərdə tutulur ki, 2000-dən artıq azərbaycanlı gənc dünyanın nüfuzlu universitetlərində  dövlət vəsaiti hesabına pulsuz ali təhsil alsın. Digər proqram çərçivəsində də gənclər xarici ölkələrə təhsil almağa göndərilir.

Məlumdur ki, hazırda dünyada iqtisadi pozuntular var. Xidmət sektorlarında, ictimai iaşə obyektlərində ciddi şəkildə qiymət artımı müşahidə edilir. Məhz bu səbəbdən yeni proqram çərçivəsində xarici ölkələrə oxumağa gedəcək gənclərin rahatlığı üçün məbləğ artırılıb. Bu yaxşı bir haldır. Qeyd edim ki, əvvəlki vəsait indiki dövr üçün yetərli deyil”.

Ekspert xüsusi olaraq vurğuladı ki, Prezident İlham Əliyev insan amilinə xüsusi önəm verir. Belə ki, yeni proqramın icrası ölkəmizdə daha keyfiyyətli insan kapitalının formalaşmasına vəsilə olacaq. Bu, peşəkar kadrların hazırlanmasına, ümumilikdə, ölkəmizin işıqlı gələcəyinə töhfə verəcək ən mühüm məsələlərdən biridir.

Günel CƏLİLOVA

Peşə etikası

Son xəbərlər