“Məktəblərin təhlükəsizliyini kafi olaraq qiymətləndirə bilərəm”. Bunu elm və təhsil naziri Emin Əmrullayev brifinqdə deyib. Onun sözlərinə görə, müxtəlif məktəblərdə təhlükəsizlik üçün addımlar atılıb: “Kiçik məktəblərdə isə təhlükəsizlik yüksək səviyyədə deyil. Bu sahədə müəyyən addımlar atılıb”.
Maraqlıdır, kiçik məktəblərdə təhlükəsizlik niyə təmin olunmur, məktəblərin təhlükəsizliyinin təmin olunmasında hansı problemlər var?
“Təhsil ocaqlarında təhlükəsizliyin təmin edilməsi daha çox məktəb rəhbərliyinin marağında olmalıdır”
Təhlükəsizlik məsələləri üzrə ekspert Elmar Nurəliyev bildirdi ki, bütün təhsil müəssisələrində təhlükəsizlik lazımi səviyyədə qorunmur: “Təhsil ocaqlarında təhlükəsizliyin təmin edilməsi daha çox məktəb rəhbərliyinin marağında olmalıdır. Məktəb direktoru şagirdlərin təhlükəsizliyini ön planda saxlamalıdır. Çünki təhsil müəssisələrində baş verən neqativ hadisələr şagirdlərə həm mənəvi, həm də psixoloji təsir edir. Bu gün ölkəmizdə 4500-dən çox orta məktəb, 1600-dən çox məktəbəqədər təhsil müəssisəsi var. Bəzi məktəblər DİN-in mühafizə polisi tərəfindən qorunur. Bəziləri isə özəl mühafizə xidməti göstərən şirkətlərlə müqavilə əsasında mühafizəni təmin edir. Elələri də var ki, növbətçi qaydada qapıya öz əməkdaşlarını qoymaqla məktəbin mühafizəsini təşkil edirlər. Bütün məktəblərin birmənalı şəkildə mühafizə polisi tərəfindən qorunması mümkün deyil. Məktəblərdə təhlükəsizliyin təmini ilə bağlı tədbirlər planı olmalıdır. Təhsil müəssisələrinin qorunması texniki təhlükəsizlik, əməyin mühafizəsi, yanğın təhlükəsizliyi, sanitar-gigiyenik təhlükəsizlik, qida təhlükəsizliyi, elektron informasiya təhlükəsizliyinin tətbiqi yolu ilə həyata keçirilməlidir. Eyni zamanda təhlükəsizliyin təmini üçün məkətblərdə nəzarət kameraları quraşdırılmalıdır”.
Ekspert hesab edir ki, məktəb pəncərələrinin bağlanması qanunauyğun deyil. Çünki məktəbdə hər hansı fövqaladə hadisə baş verərsə, şagirdlərin təhlükəsizliyi üçün ciddi problem yarana bilər. Yeni tikilən məktəblərdə fövqaladə hadisələrlə bağlı vəziyyətlər nəzərə alınır. Köhnə məktəblərdə cəmi bir giriş-çıxış qapısı var. Bu məktəblərdə ehtiyat çıxış kimi dəmir konstruksiyalar quraşdırılmalıdır. Təxliyyə qapısı məktəbin hər mərtəbəsi üçün nəzərdə tutulmalıdır: “İdman dəsrlərində, informatika, fizika-kimya laboratoriyalarında, əmək dərsi otağında və hərbi dərslərin tədris olunduğu siniflərdə texniki təhlükəsizlik, əməyin mühafizəsi, yanğın təhlükəsizliyi qaydalarına ciddi riayət edilməlidir. Bununla bağlı maarifləndirmə işlərinin aparılması vacibdir və ən azı ayda bir dəfə həyata keçirilməlidir”.
Günel CƏLİLOVA
