Bakının Sabunçu qəsəbəsi, Xəstəxanayanı küçəsində yerləşən qəzalı binanın sökülməsinə başlanıb. Sökülən binanın yerinə tikiləcək bina istifadəyə verilənədək sakinlərə kirayə qalmaları üçün müəyyən təkliflər edilib.
Belə ki, kirayə qalmaları üçün sakinlərə 300 manat təklif edilir. Həmçinin, kimsə gələcəkdə sökülən binanın yerində tikiləcək çoxmərtəbəli binadan mənzil almaqdan imtina edərsə ona hər kvadratmetr üçün 1 000 manat təklif edilir. Ancaq sakinlər hər iki təklifdən narazılıq edir.
Redaksiyamıza müraciət edən sakinlər qeyd edir ki, binanın söküntüsü ilə bağlı rayon İcra Hakimiyyətindən başqa heç bir qurum sakinlərlə maraqlanmır: “Aylıq kirayə məbləği 300 manat verilir. Artıq pul verilməyəcək. İndi 300 manata kirayə ev var?
Tikiləcək çoxmərtəbəli binadan mənzil almaqdan imtina edilərsə o zaman mənzil sahibinə hər kvadratmetr üçün 1 000 manat təklif edilir. Ancaq hər kvadratmetr üçün 1000 manat da sərf etmir. 56 kvadratmetr mənzilim var. Ancaq otaqlar hesablanır, nə zirzəmi, nə mətbəx, nə də hamam otagı hesablanır. Bu pulla mənzil almaq mümkün deyil” .
Sabunçu RİH: “Hər kvadratmetrə görə müəyyənləşdirilən min manat və kirayə kimi verilən 300 manat məbləğin artırılması isə nəzərdə tutulmayıb”
Məsələ ilə bağlı Sabunçu Rayon İcra Hakimiyyətindən bildirildi ki, sakinlər çoxmənzilli yaşayış binalarında tam təmirli mənzillərlə təmin ediləcək: “Mənzildən imtina edən sakinlərə isə müvafiq kompensasiyalar veriləcək. Hər kvadratmetrə görə müəyyənləşdirilən min manat və kirayə kimi verilən 300 manat məbləğin artırılması isə nəzərdə tutulmayıb”.
Ramil Osmanlı: “Prezidentin fərmanına uyğun olaraq evləri sökülən, mənzillərindən köçürülən vətəndaşlara 20 faiz əlavə kompensasiya ödənməlidir”
Əmlak məsələləri üzrə ekspert Ramil Osmanlı bildirdi ki, Prezidentin fərmanına uyğun olaraq evləri sökülən, mənzillərindən köçürülən vətəndaşlara 20 faiz əlavə kompensasiya ödənməlidir: “Təəssüf ki, vətəndaşların çoxu bu fərmandan, orada vətəndaşların hüquqlarının təminatından, Fərmanın məhz vətəndaşların mövqeyini müdafiə etdiyindən xəbərsizdir. Hər kvadrat metrə görə 1000 manat ödənməsi əmlakın alqı-satqı dəyəridir. Amma harada, hansı ünvanda, neçə kvadrat metrlik yaşayış sahəsində yaşamalarından asılı olmayaraq vətəndaşlara bu tip söküntülər zamanı əlavə olaraq 20 faiz dəyərində kompensasiya ödənişi edilir. Yəni edilməlidir. Vətəndaş tutalım bunu bilmir, Fərmandan xəbərsizdir. İcra Hakimiyyəti ki bilir? İH vətəndaşların mövqeyindən çıxış etməli, vətəndaşın hüquqlarını qorumalıdır, Prezidentin fərmanına əməl edərək. Lakin təəssüf ki, bəzən biz İH-lərinin tikinti şirkətlərinin maraqlarına xidmət etdiyini görürük. Vətəndaşlar yaxşı olar ki, imzalanan fərmanlardan, sərəncamlardan xəbərdar olsunlar. Hüquqlarını tələb etsinlər.
Həmçinin, kirayə haqqı da ədalətli, optimal rəqəm deyil. Aylıq kirayə pulu hazırkı şərtlər nəzərə alınmaqla minimum 400 manat olmalıdır. Bəzən mənzillərin uçuq-sökük, istismar müddətini başa vurmuş olması, paytaxtın mərkəzi hissələrindən kənarda yerləşməsi bəhanə gətirilərək kirayə haqqı və mənzillərin alqı-satqısı aşağı qiymətlərlə aparılır. Bu düzgün deyil və qanuna ziddir. Vətəndaşın harada, necə yaşaması onun öz hüququdur. Lakin hansısa tikinti şirkəti ərazidə söküntü aparıb orada müasir yaşayış binası, yaşayış kompleksi tikir və bundan mənfəət əldə edirsə, vətəndaşın mənfəətini də nəzərə almalı və sakinləri razı salmalıdır. Ümumiyyətlə, hökumətin strategiyası belədir ki, söküntü işləri zamanı nağd ödəməyə deyil, əvəzlənməyə - mənzil əvəzinə mənzil variantına üstünlük verilsin”.
Günel CƏLİLOVA
