Bakı Şəhər Baş Polis İdarəsinin keçmiş rəis müavini, polis general-mayoru Həsən Şirinov Bakının tıxac problemi ilə bağlı tənqidi yazı ilə çıxış edib.
O, tıxac probleminin körpülərin düz salınmaması, yol qovşaqlarında hərəkətin düzgün nizamlanmaması və bəzi tikililərlə bağlı olduğunu yazıb. Qeyd edilir ki, şəhərin daxilində, girişində və çıxışında nəqliyyatın hərəkətini iflic edən elə yol qovşaqları mövcuddur ki, onlar ya sökülüb yenidən tikilməli, ya da bərpa olunmalıdır: “Məsələn, elə götürək “Ekselsior hotel”lə “Yelkən hotel” arasındakı, necə deyərlər, “Bağırov körpüsü“ndən başlamış, Heydər Əliyev Mərkəzindən və ETN-dən tutmuş, Neftçilər prospekti, Cavanşir körpüsü, “Port Baku”ya qədər və Yusif Səfərovla Heydər Əliyev prospektində yaranan tıxac “dənizinin” “Dardanel” boğazı olan dəmir yol körpüsünün ətrafında qeyri- peşəkarcasına qondarılmış yol qovşağı, məncə, ilkin layihəyə uyğun tikilməmişdir. Ona görə ki, Yusif Səfərov küçəsi ilə Heydər Əliyev prospektinin birləşməsindən alınacaq əsas yolun rabitəsi qırılmış, hərəkət axını ikinci dərəcəli yollara paylanmışdır. Belə ki, Heydər Əliyev prospekti altı zolaqla - düzünə və əksinə, dəmiryol körpüsünün üzərindən keçib, hardasa, Bakı şəhər Baş Polis İdarəsi qarşısında Yusif Səfərov küçəsilə birləşməli idi. İkinci dərəcəli yollar və yol ötürücüləri isə əsas körpüyə uyğun çəkilməli idi.
Ümumiyyətlə, tıxacların aradan qaldırılmasının yeganə yolu yollarda və yol qovşaqlarındakı mövcud nöqsanları aradan qaldırmaqdır”.
Ekspertlər də qeyd edir ki, bu gün Bakı şəhərində yaşanan uzun-uzadı tıxac problemi böyükdən tutmuş kiçiyə qədər hər kəsin narahatlığa səbəb olur. Tıxacın qarşısını almq üçün bir sıra təkliflər irəli sürülür. Mütəxəssislər də hesab edir ki, şəhərdə yaşanan nəqliyyat sıxlığının qarşısını almaq üçün yollarda və yol qovşaqlarındakı mövcud nöqsanlar aradan qaldırılmalıdır. Belə olarsa tıxacın uzunluğu azalar.
“Yol və yolqovşaqlarında gərginliyə səbəb olan hər bir xırda detal analiz olunmalıdır”
Azərbaycan Texniki Universitetinin Avtomobil daşımaları və yol hərəkətinin təşkili kafedrasının dosenti, nəqliyyat eksperti Fərhad Eyyubov “Bakı-Xəbər”ə açıqlamasında qeyd etdi ki, tıxacın yaranmasının bir səbəbi də yol qovşaqlarında olan problemlərdir. Bu problemin həlli üçün proqram hazırlanmalıdır: “Yol və yol qovşaqlarında gərginliyə səbəb olan hər bir xırda detal analiz olunmalıdır”.
Həmsöhbətimizin sözlərinə görə, son zamanlar Bakı şəhərində müşahidə edilən tıxac hər kəsin səbrsizlənməsinə səbəb olub. Əvvəllər “pik saat” deyilən ifadə işlədilirdi. Ancaq indi “pik saat” anlayışı yoxdur. Günün istənilən vaxtında, istənilən küçədən uzun-uzadı tıxac müşahidə olunur: “Bu problemin həll olunması üçün böyük bir kompleks plan hazırlanmalıdır. Burda əsl mütəxəssislər çalışmalı, problemin dərinliyi araşdırılmalıdır. Tıxacın əsas səbəbi yolların buraxma qabiliyyətinin zəif olmasıdır. Danılmaz faktdır ki, bu gün şəhərdə nəqliyyat vasitəsi çoxdur. Həmin nəqliyyat vasitələrinin yolların dar yerlərindən buraxılmasında problem yaşandığı üçün tıxac yaranır. 3-4 zolaqlı yolun birdən-birə 2 zolaqlıya keçməsi avtomobillərin hərəkətinin çətinləşməsinə səbəb olur. Sürücülər çalışır ki, tez hərəkət zolağına keçsinlər, yollardakı basırıq da belə yaranır. Sürücülərin hərəkət zolağı kəskin dəyişən yolda manevr etmək imkanları məhdudlaşır. Avtomobilin manevr etməsinə sərf olunan zaman kəsiyində artıq tıxac yaranır”.
Günel CƏLİLOVA
