Prezident İlham Əliyev 22 iyun 2016-cı il tarixli fərmanı ilə təsdiq edilmiş “İpoteka və Kredit Zəmanət Fondunun vəsaiti hesabına ipoteka kreditinin, o cümlədən güzəştli ipoteka kreditinin verilməsi Qaydası”nda dəyişiklik edib.
Dövlət başçısı bununla bağlı yeni fərman imzalayıb. Fərmana əsasən, Vətən Müharibəsi Qəhrəmanlarına, onların həyat yoldaşlarına və övladlarına güzəştli şərtlərlə ipoteka kreditindən istifadə etmək hüququ anlayışı dəqiqləşdirilib.
Beləliklə, Vətən Müharibəsi Qəhrəmanları və onların ailə üzvləri güzəştli ipoteka kreditindən yararlana biləcək.
“Məlum fərman sayəsində müharibə qəhrəmanları və ya onların ailə üzvlərinin evsizlik problemi həll ediləcək, həm də onların sosial həyatı normal səviyyədə olacaq”
“Vəfa” Sosial İctimai Birliyinin rəhbəri Fatimə Hacıbəyli qeyd etdi ki, Prezident İlham Əliyevin tapşırığına əsasən, aidiyyəti qurumlar tərəfindən Vətən müharibəsində şəhid olmuş qəhrəmanlarımızın ailə üzvlərinə və müharibə əlillərinə qayğı və diqqət nəinki dövlət qurumlarının, həm də cəmiyyətin vətəndaşlıq borcuna və vəzifəsinə çevrilib. Bu isə cəmiyyətdə birliyin və qarşılıqlı etimadın yeni təzahür forması kimi bütün təbəqədən olan insanlar tərəfindən xoş ovqatla qarşılanır, onların dövlətimizə və müzəffər Prezidentimizə inam hisslərini və məhəbbətini günü-gündən durmadan artırır”.
Birlik sədri onu da əlavə etdi ki, şəhid ailələrinin bir sıra üstünlükləri var, onların işə düzəlməsində güzəştlər olunur, şəhid ailələrinin övladlarının ali məktəbdə oxuması üçün dövlət təminatı var, güzəştli şərtlərlə mənzil tikmək üçün torpaq verilir, onlara güzəştli ipoteka kreditləri verilir: “Bütövlükdə Azərbaycanda şəhid ailələrinə həm maddi, həm də mənəvi diqqət göstərilir. Bütün bunlar dövlət başçısının şəhid ailələrinə olan diqqət və qayğısının ifadəsidir”.
F.Hacıbəylinin sözlərinə görə, ev almaq və tikmək şəhid ailə üzvləri üçün çox çətindir. İpoteka kreditlərinin şərtləri isə onlar üçün ağır olduğuna görə bundan yararlana bilmirlər. Bu kateqoriyadan olan şəxslərin mənzil problemlərini həll edə bilmək üçün güzəştli ipotekadan istifadə edə bilmələri çox vacib məsələdir. Məlum fərman sayəsində müharibə qəhrəmanları və ya onların ailə üzvlərinin evsizlik problemi həll ediləcək, həm də onların sosial həyatı normal səviyyədə olacaq.
Günel CƏLİLOVA
