Bir vaxtlar riyaziyyatı bütün ixtisas qruplarına imtahan fənni kimi saldılar, indi də tarix və informatika...

Kamran Əsədov: “Bütün abituriyentlər texniki, təbiət və yaxud humanitar fənlər üzrə getmirlər”

img

“Azərbaycan tarixi" və "İnformatika" fənləri qəbul imtahanları zamanı bütün ixtisas qruplarına əlavə edilə bilər. Bununla bağlı sosial şəbəkələrdə, eləcə də təhsil ekspertləri arasında müzakirələr aparılır.

Qeyd edək ki, ötən il Dövlət İmtahan Mərkəzi (DİM) qəbul imtahanı ixtisas qruplarına daxil olan fənlərdə dəyişiklik edib. Dəyişikliklərə əsasən, coğrafiya fənni üçüncü ixtisas qrupuna əlavə ediləcək, birinci ixtisas qrupunda isə kimya fənni informatika ilə əvəz edilir.

Ancaq indi təklif edilir ki, bütün ixtisas qruplarına “Azərbaycan tarixi" və "İnformatika" fənləri əlavə edilsin. Ancaq bu fikir müəllim və abituriyentlərin narazılığına səbəb olub.

Ekspertlər bildirir ki, hazırda ölkədə ən ciddi müəllim çatışmazlığı informatika fənnindəndir. Bu problem daha çox bölgələrdə yaşanır. Belə ki, bölgələrdə informatika müəllimi çatışmazlığı yaşanır.  Baxmayaraq informatika ölkədə yeganə fənlərdəndir ki, Azərbaycan dili, riyaziyyat, xarici dillə yanaşı, 1-ci sinifdən 11-ci sinfə qədər tədris edilir. Amma Azərbaycanda bu fənn üzrə yetərincə dərslik, test bazası yoxdur.

Məlumdur ki, informatika magistratura pilləsi və dövlət qulluğuna qəbul var. Orada müəyyən hazırlıq kurslarının materiallarından istifadə edilir.

  • “Ali məktəblərə qəbul imtahanı zamanı bütün ixtisas qruplarına "Azərbaycan tarixi" və "İnformatika" fənlərinin əlavə edilməsi abituriyentlərin işini daha da çətinləşdirə bilər”

Mövzu ilə bağlı danışan təhsil eksperti Kamran Əsədov bildirdi ki, ali məktəblərə qəbul imtahanı zamanı bütün ixtisas qruplarına "Azərbaycan tarixi" və "İnformatika" fənlərinin əlavə edilməsi abituriyentlərin işini daha da çətinləşdirə bilər. Nəzərə almaq lazımdır ki, abituriyentlərin hər biri eyni istiqaməti seçmir, hamısı eyni ixtisasa sahiblənmək istəmir. O da məlumdur ki, şagirdlər 1-ci sinifdən 11-ci sinfə qədər informatika fənnini orta məktəbdə keçirlər, müəyyən zaman çərçivəsində BSQ imtahanı verirlər, deməli, onlar 11 il ərzində bu fənni mənimsəyirlər. Ayrıca olaraq, biz imtahanlara əlavə fənlər salmaqla abituriyentlərin işini çətinləşdirəcəyik. Çünki bütün abituriyentlər texniki, təbiət və yaxud humanitar fənlər üzrə getmirlər".

Günel CƏLİLOVA

Peşə etikası

Son xəbərlər