"İmtahanlarda yazı işlərini yoxlayan ekspertlərin sayı azdır". Bunu jurnalistlərə açıqlamasında Dövlət İmtahan Mərkəzinin Direktorlar Şurasının sədri Məleykə Abbaszadə deyib.
O bildirib ki, imtahanın yazı işləri ən azı iki dəfə yoxlanılır: "Müəyyən hallarda isə üç dəfə yoxlanılır. Müəyyən fənlərdən, xüsusən də rus bölməsində ekpertlərin sayı çox azdır. Şagirdlər kifayət qədərdir, amma ekspertlər azdır. Bu səbəbdən yoxlama prosesi uzanır. Bizdə 6 minə yaxın marker, ekspert var. Markerlərin sayı, məsələn, 20 min olsaydı, biz bu işi daha tez həyata keçirərik".
Ekspertlər də imtahanlarda yazı işlərini yoxlayan ekspertlərin, markerlərin sayının az olduğunu etiraf edir. onların fikrincə, bu işlə məşğul olanlara lazımi səviyyədə əmək haqqı verilmir. Bu səbəbdən də təhsil işçiləri marker olmaqda maraqlı olmur. Mütəxəssislərin fikrincə, imtahanlarda yazı işlərini yoxlayan ekspertlərə normal əmək haqqı verilərsə bu sahədə kadr çatışmazlığı yaşanmaz. Marker sayının az olmasının nəticəsini də abituriyentlər çəkir.
“Bu gün müəllimlərin böyük əksəriyyəti repetitor fəaliyyəti ilə məşğul olur, bu səbəbdən də onlar mütəxəssis kimi DİM-lə əməkdaşlıq etməkdə maraqlı deyil”
Təhsil eksperti Kamran Əsədov qeyd etdi ki, marker azlığı mütəxəssis çatışmazlığı ilə bağlıdır: “ Ölkədə, ümumiyyətlə, bu sahədə kadr çatışmazlığı yaşanır. Təəssüf ki, ali və orta ixtisas təhsili müəssisələri mütəxəssis hazırlığını lazımi səviyyədə icra etmir. Ona görə də bu cür problemlər yaranır. Marker çatışmazlığının əsas səbəbi bu sahə üçün mütəxəssis hazırlığının lazımi səviyyədə olmamasıdır”.
Həmsöhbətimiz onu da əlavə etdi ki, bu gün müəllimlərin böyük əksəriyyəti repetitor fəaliyyəti ilə məşğul olur. Bu danılmaz faktdır. Bu səbəbdən də müəllimlər mütəxəssis kimi DİM-lə əməkdaşlıq etməkdə maraqlı deyil: “Tədris ili boyunca repetitorluqla məşğul olanları markerlik cəlb etmir. Məlumat üçün deyim ki, DİM-in cəlb etdiyi mütəxəssislər, müəllimlər işə görə yaxşı əmək haqqı alırlar. Lakin bu daimi deyil, mövsümidir deyə, müəllimlər daimi işlərini – repetitorluğu bir kənara qoyub DİM-də vaxt itirmək istəmirlər. Bu səbəblərdən imtahanlarda problem yaşanır.
Həmçinin, müəllimlər markerlik etsələr, tədris proqramı pozulacaq, repetitorlara da bu sərf etmir. Müəllimlər DİM-də vaxt itirmək istəmir. İkincisi, ali məktəblərdə kurrikulum proqramının xüsusiyyətləri fənn kimi tədris olunmadığından ali məktəb tələbələri bunu bilmir. Onlara bunu öyrədən də yoxdur. Ona görə imtahanlarda da kurrikulum standartları ilə qiymətləndirməni bacarmırlar. İmtahan modelləri də mütəmadi dəyişdiyindən, onları mənimsəmək də çətindir. Problemdən çıxış yolu ali məktəblərin sırf markerlik üzrə mütəxəssis hazırlamasıdır”.
Günel CƏLİLOVA
