Ümüdvar Vaqif oğlu Məmmədov öz nəcib, xeyirxah əməlləri hesabına Astara rayonunda böyük hörmət sahibidir. Onun öz xalqı üçün gördüyü işlərin sayı bilinmir. O, uzun illərdir sahibkarlıq fəaliyyət ilə məşğul olur. Ümüdvar Vətən müharibəsində də fəal iştirak etmişdir. Belə ki, haqq savaşımız başlanan andan sahibkarlıq fəaliyyətini dayandıraraq ehtiyatda olan zabit kimi düşmənə qarşı zəfər gününə qədər döyüşübdür. Xocavənd, Füzuli, Qubadlı və Zəngilan rayonlarının azad olmasında əsl qəhrəmanlıq nümunəsi göstəribdir. Müzəffər Ali Baş Komandan cənab İlham Əliyevin Sərəncamları əsasında Xocavəndin, Füzulinin, Qubadlının, Zəngilanın azadlığına görə, “Şücaətə görə” və “Vətən müharibəsi iştirakçısı” medallarına layiq görülübdür.
Müharibədən sonra sahibkarlıq fəaliyyətini davam etdirən elin sevimli oğlu gənc nəslin fiziki cəhətdən sağlam böyüməsində idmanın əvəzsiz rol oynadığını nəzərə alaraq rayonun Çay-oba kəndində şəxsi vəsaiti hesabına açıq və qapalı mini futbol, voleybol meydançalarının inşasına başlayıb, Zəfər gününün ikinci ilində tikinti işlərinə yekun vurubdur. Geniş ərazidə müasir standartlara uyğun salınmış idman meydançalarına süni ot örtüyü döşənib, işıq sistemi qurulub, qoruyucu məhəccərlərlə əhatəyə alınıbdır.
Bu günlərdə idman meydançaların açılışı oldu. Tədbirdə Astara Rayon İcra Hakimiyyətinin başçısı Qəzənfər Ağayev, AFFA-nın Kütləvi Futbol Departamentinin rəhbəri Fərrux İsmayılov, rayonun hüquq-mühafizə orqanlarının, idarə, müəssisə və təşkilatlarının rəhbərləri, şəhid ailələri, müharibə veteranları, ictimaiyyət nümayəndələri iştirak edirdilər
Açılışda icra başçısı belə bir təşəbbüsə görə Ümüdvar Məmmədova təşəkkür edərək demişdir:- Gənc nəslin sağlam böyüməsi üçün idmanın əhəmiyyəti böyükdür. Müzəffər Ali Baş Komandanın rəhbərliyi, qəhrəman əsgər və zabitlərin fədakarlığı ilə 30 il işğalda olan torpaqlarımız azad edildi. Xalqımıza qələbə sevincini yaşadan, müharibədə şücaəti ilə fərqlənən oğullardan biri də Ümüdvardır. Qələbəmizdə fiziki cəhətdən sağlam gənclərin böyük rolunu görərək idman meydançasının salınmasını zəruri hesab etmiş və bu işi uğurla başa çatdırıb. Əminəm ki, bura gənclərimiz üçün əvəzedilməz məkanlardan birinə çevriləcəkdir.
Sonda Vətənin müqəddəsliyinə tapınıb bu yolda şəhid olan qəhrəmanların bizlərə əmanət etdiyi övladlarına hədiyyələr verildi, şəhid ailələri, qazilər və Vətən müharibəsi iştirakçıları üçün ziyafət süfrəsi təşkil olundu.
Zəfər ORUCOĞLU
Azərbaycan Jurnalistlər Birliyinin üzvü
