İnsan həyatının ən gözəl anlarını özündə təcəssüm edən bu kəlmələr Vəliəhəd Şakir oğlu Vəliyevin toy məclisində dillərdən düşmürdü. Lənkəranda boy-başa çatan Vətən sevdalı gənc İkinci Qarabağ müharibəsinin qəhrəmanıdır. Əvvəlcə şəhid olduğu haqda məlumat yayılan, daha sonra isə əsir düşdüyü müəyyənləşən Vəliəhəd dövlətimizin başçısı cənab İlham Əliyevin səyləri nəticəsində erməni əsirlikdən və girovluqdan azad olunmuşdu. Vətənə dönməyin xoşbəxtliyini yaşayan qazimizin toy şənliyi keçirilib. Məclisə gələn mötəbər qonaqlar arasında Azərbaycan Respublikasının İnsan Hüquqları üzrə Müvəkkili Səbinə Əliyeva və Lənkəran Şəhər İcra Hakimiyyətinin başçısı Taleh Qaraşov da olub.
Səbinə Əliyeva və Taleh Qaraşovun şənliyindəki iştirakı böyük məmnunluqla qarşılanıb. Məclisdə buna ali siyasi rəhbərliyin yürütdüyü siyasət nəticəsində vətəndaşla məmur arasındakı qarşılıqlı səmimi münasibətlərə inam və hörmətin təzahürü kimi dəyər verilib. Hər iki mötəbər qonaq qazimizi təbrik edib, ona can sağlığı və ailə səadəti arzulayıb.
Ali Baş Komandan cənab İlham Əliyevin və Birinci vitse-prezident Mehriban xanım Əliyevanın şəhid ailələrinin üzvlərinə, qazilərimizə və Vətən müharibəsi iştirakçılarına olan həssas yanaşmasından, onları daim diqqətdə saxlamasından söz salan qonaqlar onu da bildiriblər ki, şəhidlərimizin canı, qazilərimizin qanı bahasına qazanılan Zəfərə görə onlara borcluyuq. İstər şəhid ailələrinin, istərsə də qazilərimizin daim yanındayıq, onların sevincinə şərik olub, kədərlərinə üzülürük.
Yüksək əhval-ruhiyyə ilə keçən toy şənliyində qazimizin yanında olan icra başçısı və Ombudsman rəqs edib, ailənin sevincinə şərik olub, sonda xatirə şəkilləri çəkdiriblər.
Zəfər ORUCOĞLU Azərbaycan Jurnalistlər Birliyinin üzvü
