Oktyabr ayının 26-da Türkiyənin Bursa vilayətində Qarabağ Zəfərinin ikinci ildönümü münasibətilə “Şuşa günləri” silsilə tədbirləri keçirilib. Bursanın Keles rayonunda Milli Qəhrəman Məzahir İzzət oğlu Rüstəmovun adını daşıyacaq parkın təməlinin açılış mərasimi olub.
Parkın ərsəyə gəlməsi Keles bələdiyyəsi və Türkiyədə fəaliyyət göstərən və başqanı olan Hüsyn Gözəloğlu Gələcəyin İnsanları Məkanı, Gələcəyin İmkanları Məkanı ‘‘Azerbaycan Denince‘‘ Dernegi-GİM AZDER dərnəkləri tərəfindən həyata keçiriləcək.
Mərasimdə çıxış edən Keles Bələdiyyəsinin sədri Mehmet Keskin, Hüseyn Gözəloğlu Azərbaycanda fəaliyyət göstərən İctimai-Siyasi Proseslər Beynəlxalq Araşdırmalar Mərkəzinin (İSBAM) sədri Samir Adıgözəlli və digərləri inşa olunacaq parkın Türkiyə-Azərbaycan qardaşlığı üçün əhəmiyyətini vurğulayıblar.
Bələdiyyə sədri təməli atılan parkın 2023-cü ilin bahar aylarında istifadəsinə veriləcəyini deyib.
Siyasi partiyaların təmsilçilərinin, deputatların və ictimaiyyət nümayəndələrinin də iştirak etdikləri mərasimdə Bursa folklor rəqsləri ifa edilib.Məzahir İzzət oğlu Rüstəmov kimdir?
Rüstəmov Məzahir İzzət oğlu 2 mart 1960-cı ildə Bakı şəhərində ziyalı ailəsində dünyaya gəlmişdir. 1978-ci il Bakı Dövlət Universitetinin tarix fakültəsinə daxil olmuşdur. 1983-cü ildə təhsilini başa vurur. 1986-cı ildən Azərbaycan Memarlııq və İnşaat Mühəndisləri İnstitutunun fəlsəfə kafedrasında baş laborant vəsifəsində işləməyə başlayır. 1990-cı ildə Dövlət Mətbuat Nazirliyində «Xarici ölkələrlə kitab əlaqəsi şöbəsi»nin müdiri vəzifəsində çalışmışdır. 1992-ci il 23 martda könüllü olaraq Milli Orduya yazılır. Məzahir Şınıx cəbhəsinə gəlir və komandir müavini vəzifəsinə təyin edilir.
Mutudərə olduqca mühüm strateji yer olduğundan ermənilər buranı işğal etmək istəyirdilər. Buna görə də Məzahir bütün bilik və bacarığından istifadə edərək yalnız döyüşçü kimi deyil, həm kəşfiyyatçı, həm də hərb müəllimi kimi fəaliyyət göstərmişdir. Məzahirin kəşfiyyatçılığı nəticəsində düşmənin bir çox döyüş nöqtələri məhv edilmişdir.Məzahir cəsur komandir olaraq müdafiəni layiqincə yerinə yetirirdi. 1992-ci il 6 avqust ermənilər Mutudərəyə güclü hücum etdilər… Məzahirin komandirliyi ilə döyüşçülər kəndin müdafiəsinə qalxdılar. Son nəfəsinəcən vuruşan komandir bu döyüşdə həlak oldu…
Ailəli idi, Təhminə adında qızı var.Hazırda Təhminə xanımın iki övladı var - Murad ,Məryəm.
Uzun illərdir Türkiyənin Bursa şəhərində yaşayan həmyerlimiz Hüseyn Gözəloğlunun xahişiylə yuxarıda söz açılan mərasimin işıqlandırılması üçün Milli Qəhramanımız Məzahir Rüstəmovun ailəsiylə tanış oldum. Təpədən dırnağa ziyalılıq mücəssəməsi olan bu nurçöhrəli valideynlərin hər kəlməsi örnəkdir. Hər iki valideynin lentə aldığımız çıxışlarından bəzi nümunələri diqqətinizə çatdırmaq istətdim.
İzzət Rüstəmov...
...BİR OVUC TORPAQ GÖTÜRÜB ÜZÜMƏ SÜRTDÜM
Türkiyə Prezidentinin atdığı addımlar bir daha dünyaya göstərdi ki Azərbaycan tək deyil. Azərbaycanın qəhramanlarının şərəfinə ucaldılan abidələr,açılan parklar Azərbaycan Türkiyə münasibətlərinin daha da güclənəcəyinə nümunədir. Məzahirin ruhu indi şaddır, onun şəhid olduğu torpaq artıq azad olub. Onun arzuları,ideyaları çox idi. Azərbaycanı güclü görmək, Azərbaycanı qüvvətli görmək, müstəqil görmək. Məzahirin döyüşdüyü səngərə baxdıq,orda abidə qoyulub. Mən səngərə əyilib Məzahirin qanı qarışan torpaqdan bir ovuc götürüb üzümə sürtdüm,sanki içimə bir rahatlıq gəldi. 44 günlük müharibə bütün dünyaya birmənalı şəkildə sübut etdi ki Azərbaycan xalqı güclüdür,onun güclü ordusu var və yerdə qalan torpaqlarını da mütləq mənfur düşmənlərdən təmizləyəcək.
Rəfiqə xanım....Övladın hamısı əzizdir, ancaq ilk övladın yeri bir az başqadır.O da nədir Ailə ,həyat,övlad nədirsə məhz ilk nübarınla bilirsən Məzahir mənim ilkim idi. ? Məzahirin itkisi çox ağırdır,elə bil ürəyimi söküb aparır. 31 il ötüb ,ancaq yenə də yolunu gözləyirəm. Onun adına nə olursa parkmı,abidəmi elə istəyirəm gedib orda qalım. Gecəni orda keçirim. Balamın döyüşdüyü Mutudərədə abidə qoyulub. Qar yağanda özümdən asılı olmayaraq qaçıb o abidənin üstünü örtmək istəyirəm sanki Məzahirim üşüyürmüş kimi.... Hüseyn müəllimdən eşidən də ki Türkiyə kimi böyük dövlətdə Məzahirimin adına abidə açmaq istəyir o qədər sevindim ki ,elə bildim yuxudu gördüklərim. Ancaq sonra bu yuxu deyil həqiqət olduğunu gördüm və fürsətdən istifadə edib Hüseyn Gözəloğluna da, Bursa bələdiyyəsinə bir sözlə zəhməti keçən hər kəsə ana kimi təşəkkür edirəm., hər birisini bağrıma basıb qucaqlayıram.
ANANIN KÖVRƏK MƏQAMLARI
Bayaq dedim 31 il keçib ,mən hələ da axşam saat yeddidə dayanıb balkondan boylanıram ki Məzahir işdən qayıdacaq,hər səhər saat səkkizdə qapının ağzında dayanıram ki Məzahirimi yola salıram,elə bilirəm ki arxaya boylanıb gedir. Düz 31 ildir mən gecəli-gündüzlü Məzahirimi yola salıram,qarşılayıram. Xiyabana gedirəm.,,Məzahir salam ,anan ölsün necəsən,üşümürsən ki?’’ deyib qayıdıram. Məzahir ailəmizdə ikinci İzzət olub. Qardaşları Çingizə,Oktaya dayaq idi. İndi onlar da Məzahirsiz bizim qədər ağırlıq çəkirlər. Mənə görə Məzahir bu evdə mənimlə bərabər hərlənir,hara baxıramsa onu görürəm. Yemək çəkəndə birinci ona çəkib,,Ay Məzahir sən yeməyini ye sonra o birilərinə çəkərəm‘‘ deyirəm. Bəlkə də bütün şəhid anaları belədir. Mənə təsəlli yalnız odur ki Məzahirimin qanı tökülən torpaqlar işğaldan azaddır və bilirəm ki balamın ruhu hər zaman dolaşan o məkanda artıq onun da ,döyüşən igid oğulların da ruhu şaddır.
PS....Bu nurçöhrəli ziyalı, müdrik insanlardan heç ayrılmaq istəmirdim... Rəfiqə xanım sadəcə danışırmıdı...səsiylə,nəfəsiylə sanki Məzahirinə həm də illər öncə olduğu kimi lay-lay çalırdı.. Həm də elə yanğıyla,elə şirin-şirin ki mənim də ruhuma hopdu...həm də əbədi...
Dağda lalama dəymə
Gözü alama dəymə.
Nə edirsən et,fələk,
Tək Məzahirimə dəymə.
.......
Ocağın sacı göynər
Ağzımda acı göynər.
Oğul ,adın gəlincə,
Burnumun ucu göynər......
Hazırladı Jalə CƏFƏROVA Filologiya üzrə fəlsəfə doktoru
