Bakının 12 rayonunda komissiya üzvləri və mütəxəssislərlə birgə qəzalı binalara baxış keçirilib. Ekspert qrupunda Fövqəladə Hallar Nazirliyinin mütəxəssisləri, memar və tikinti mütəxəssisləri yer alıb. Rayonlar üzrə məlumatlar toplanaraq Bakı Şəhər İcra Hakimiyyətində fəaliyyət göstərən komissiyaya təqdim olunub və komissiya da öz növbəsində qəzalı binalar barədə məlumatları Nazirlər Kabinetinə göndərib.
Yaxın günlərdə Bakının Nərimanov rayonu ərazisində iki binanın sökülməsi barədə qərar açıqlanacaq. Bunlar Nərimanov rayonu ərazisində yerləşən Fətəli xan Xoyski 212 və 214 ünvanlarında yerləşən binalardır. Qeyd edək ki, Bakıda yerləşən digər qəzalı binalarla bağlı da müvafiq qərarların mərhələli şəkildə veriləcəyi bildirilir.
Onu da qeyd edək ki, son illər paytaxtın hər yerində köhnə binaları yeniləri əvəz edir. Bakıda kütləvi şəkildə söküntü işləri gedir. O da məlumdur ki, Bakının baş planı hələ hazır deyil. Maraqlıdır, baş plan hazır olandan sonra paytaxt ərazisində aparılan tikinti işləri gələcəkdə hansı problemlərə yol açacaq?
“Binalar yeni baş plana uyğun olmasa məcburi sökülməlidir, yenidən bir tikinti bumu yaranacaq və büdcəyə çox böyük zərər dəymiş olacaq”
Əmlak məsələləri üzrə ekspert Elnur Fərzəliyev bildirdi ki, paytaxtda yeni binaların tikintisinə, təxminən, 2000-ci illərdə start verilib: “Bu illərə qədər, təxminən, 22 il ərzində 2 minə yaxın çoxmənzilli yaşayış binası tikilib vətəndaşlara təhvil verilib. Yeni tikili binaların böyük əksəriyyəti pərakəndə və plansız şəkildədir. Paytaxtda yaşanan tıxacların səbəbi pərakəndə şəkildə tikilmiş çoxmənzilli yaşayış binalarıdır. Köhnə yaşayış massivləri, yəni beşmərtəbəli binaların həyətlərində artıq yeni binalar tikiblər. Halbuki, o həyətlər sakinlərin istirahəti üçün nəzərdə tutulub. Burda əsas problem ondan ibarətdir ki, bu gün binalar tikilir, insanların sayı artır, amma orta məktəblərin sayı artmır”.
Ekspertin sözlərinə görə, bu gün Bakı şəhərində minlərlə istismar müddətini bitirmiş çoxmənzilli yaşayış binası var. Yüzdən artıq bina qəzalı kimi qeydə alınıb ki, bu binalar ən qısa müddətdə sökülməlidir: “Başqa bir tərəfdən, şəhərin mərkəzində olan bir çox fərdi həyət evlərindən ibarət yaşayış massivləri var ki, onların sökülməsi təqdirəlayiqdir. Çünki orada artıq bütün normativlər pozulub. Hansısa bir yanğın və yaxud təbii fəlakət baş verərsə, həcmi daha böyük ola bilər. Həmçinin, şəhərin də xarici görünüşünə xələl gətirən bir görüntüdür. Bakının baş planı sonuncu dəfə 1986-cı ildə hazırlanıb. Bütün tikilən binalar, binalararası məsafələr, orta məktəblər, xəstəxana və poliklinikalar, yol kənarındakı səkilər, onların enləri, hətta avtobus dayanacaqları belə 1986-cı ildəki insanların sayına uyğun hesablanıb, salınıb. Amma Bakının əhalisi 1986-cı ildən bu yana 3 dəfəyə qədər artıb, şəhər daha çox içindən tikilib, zatən normativlər pozulub. Digər tərəfdən, Bakının baş planı hazırlanır. Bu da, təxminən, 2040-ci ilə nəzərdə tutulur. Mən onunla razı deyiləm. 2040-cı ilə hələ 18 il var. 18 il ərzində sökülməli binalar sökülüb tikiləcək. Əgər bu bu binalar yeni baş plana uyğun olmasa məcbur sökülməlidir. Yenidən bir tikinti bumu yaranacaq və büdcəyə çox böyük zərər dəymiş olacaq”.
Günel CƏLİLOVA
