Çox zaman səki ilə gedərkən, avtomobil idarə edərkən və ya yolu keçdikdə ətrafımızdakı avtomobillərdən yüksək səsli musiqi sədaları eşidirik. Bəzi sürücülər, xüsusilə gənclər, meyxana, ritmik mahnılar səsləndirir, maşının isə pəncərələrini açıq qoyub, ətrafdakılara maneçilik törədirlər. İnsanlar belə vəziyyətdən şikayətlənsələr də, həmin sürücülər üçün bunun əhəmiyyəti olmur. Onlar bu addımla sanki özlərini təsdiq etdiklərini düşünür.
Ekspertlər də yol mədəniyyətinə kölgə salan belə hadisələrə, sürücülərin bu tip özbaşınalıqlarına qarşı ciddi addımlar atılmalı olduğunu deyir.
Onu da qeyd edək ki, yüksək səslə musiqi dinlənilməsi ilə bağlı məsuliyyət tədbirləri İnzibati Xətalar Məcəlləsinin 521-ci maddəsində öz əksini tapıb. Lakin burada bəzi incəliklər var. Belə ki, həmin maddədə qeyd olunub ki, mənzillərdə, yaşayış evlərinin girişlərində və həyətlərində, küçələrdə, istirahət yerlərində və digər ictimai yerlərdə gecə vaxtı saat 24-dən 7-dək maqnitofonları və digər aparatları gur səslə oxutmağa, məişət səs-küyünə qarşı mübarizə tələblərini başqa üsulla pozmağa görə fiziki şəxslər yüz əlli manatdan iki yüz manatadək məbləğdə, vəzifəli şəxslər iki min manatdan iki min beş yüz manatadək məbləğdə cərimə edilir.
Aytəkin Kamranqızı: “Sürücülərin yüksək səslə musiqiyə qulaq asması ətrafdakıları narahat edirsə, bunun qarşısını almaq lazımdır”
Sosioloq Aytəkin Kamranqızı bildirdi ki, yol nəqliyyat mədəniyyətinə uyğun olaraq, nəqliyyat vasitələrində səsgücləndiricilərdən müvafiq qaydada istifadə olunur: “Məsələn, adi çox yüksək səslə olan siqnallar da qadağan olunur. Mikrofon formasında səsgücləndiricilərin istifadə edilməsi də ekoloji təhlükəsizliyin pozulması sayılır. Bunlar insanlar tərəfindən bilə-bilə edildiyi üçün daha mənfi hərəkətlər sayılır. Yol nəqliyyat mədəniyyətinin əsas göstəricisi qaydalara riayət etməkdirsə, o biri insanlara və cəmiyyətə ziyan verməməkdir. Ətrafa, insanlara dəyən zərəri həm iqtisadi, həm maddi cəhətdən hesablamaq çətindir. Lakin əgər başqa sürücülərin yüksək səslə musiqiyə qulaq asması ətrafdakıları narahat edirsə, bunun qarşısını almaq lazımdır. Bu səslər həmin sürücülərin özlərinə də maneədir, diqqətlərini yayındırır. İnzibati qaydada buna cərimələr də müəyyən olunub. Düşünürəm ki, nəqliyyat mədəniyyəti artdıqca insanlar maariflənəcək və belə hallara yol verməyəcək”.
Elməddin Muradlı: “İctimai yerlərdə, məhəllələrdə, yolda yüksək səslə musiqi səsləndirmək asayişin pozulmasına səbəb olur”
Nəqliyyat eksperti Elməddin Muradlı qeyd etdi ki, bu yeni qərar deyil: “İnzibati Xətalar Məcəlləsində illərdir ki, bu öz əksini tapıb. Vətəndaşlar hüquq-mühafizə orqanlarına müraciət etdikdə bu cəza minlərlə şəxsə tətbiq olunur. Maarifləndirmə üçün bu məsələni bir daha diqqətə çatdırmaq istəyirik ki, ictimai yerlərdə, məhəllələrdə, yolda yüksək səslə musiqi səsləndirmək asayişin pozulmasına səbəb olur. Bu məsələ sürücülərin üzərində daha çox fokuslanıb. Gecə 12-dən sonra bəzi insanlar yüksək musiqi səsləndirməklə əhalini narahat etməsin. Şəhərin mərkəzi küçələrində yaşayan insanlar bundan daha çox əziyyət çəkir. Mütəmadi olaraq sosial şəbəkələrdə insanların bu mövzuda nə qədər əziyyət çəkməsi ilə bağlı rəylər yazılır. Bununla bağlı bir sıra tədbirlərin görüləsini istəyirlər”.
Günel CƏLİLOVA
