Məşhur meyxanaçı Rəşad Dağlının İsgəndər adlı şəxsi qətlə yetirməsi neçə gündur sosial medianın ən çox müzakirə olunan mövzusuna çevrilib. Xüsusən də yeniyetmələr, gənclər Rəşad Dağlının törətdiyi cinayətin bütün detallarını müzakirə edir, onun haqlı, yoxsa haqsız olması haqda fikir bildirirlər.
Onu da qeyd edək ki, son dövrlər sosial şəbəkələrin Azərbaycan seqmentində gənclər meyxanaçıların hansısa toyda, məclisdə söylədiyi deyişmələrdən müəyyən tabu xarakterli hissələri seçib paylaşırlar. Söhbət narkotiki, cinayəti, eləcə də cənub qonşumuz İranın radikal islami "dəyərlərini" təbliğ edən meyxana mətnlərindən gedir. Belə ki, “çək nəşəni, qoy tüstüsü dağlarə yayılsın", "pey...r sənin nəsil-nəcabətindi"... kimi meyxana parçalarına indi sosial şəbəkələrdə tez-tez rast gəlinir.
Mütəxəssislər yaranmış təhlükənin fərqinə vararaq həyəcan təbili çalırlar. Hətta bu məsələ ilə bağlı sərt mövqe bildirirlər.
“Narkotik və cinayəti təbliğ edən meyxanaçılar araşdırılmalı, onlar haqqında sərt tədbirlər görülməlidir”
Sosioloq Aytəkin Kamranqızı bildirdi ki, gənclər arasında narkotiki, cinayəti təbliğ edən bir vasitəyə çevrilməsinin əsas günahkarı mühitdir: “Son zamanlar sosial şəbəkədə, xüsusilə də “Tik Tok”adlı platformada narkotiki, cinayəti təbliğ edən meyxanalar geniş yayılır. Həmin meyxanalara bir dəqiqə qulaq asmaq kifayət edir ki, insan nəsə pis iş görsün. O meyxalarda açıq söyüş, təhqir, narkotikin verdiyi həzz haqqında fikirlər səslənir. Təbii ki, narkotikə, cinayətə sövq edən meyxanalara qulaq asan yeniyetmə və gənclər də nəzarətsiz qaldıqları üçün hazırda xoşagəlməz vəziyyət yaranıb”.
Həmsöhbətimiz hesab edir ki, narkotik və cinayəti təbliğ edən meyxanaçılar araşdırılmalı, onlar haqqında sərt tədbirlər görülməlidir. Bu işdə yük tək hüquq-mühafizə orqanlarının üzərinə düşməməlidir. Sosial, elmi araşdırma mərkəzləri bu işlə məşğul olmalıdır.
Meyxana el sənətidir, meyxana demək, sözü-sözə calayıb fikrə çevirmək istedad tələb edir. Amma... Bu gün toylarımızda insanları şənləndirmək, toyu daha da rəngarəng etmək üçün meyxanaçılar dəvət edilir. Gecə yarıya qədər söz güləşi gedir. Qalib də olur, məğlub da. Bu, məsələnin bir tərəfi. Son vaxtlar toylarda narkotik vasitələri, narkomaniyanı təbliğ edən meyxanalar deyilir. Qocalı-cavanlı hamı çırtıq çalıb onlara dəstək olur. Ancaq kimsə “Burda uşaqlar var, onlara o zəhrimarı belə tanıtmayın”,- deyib irad bildirmir. Demək ki, günahkar özümüzük, demək ki, siqaretin girdabına düşən uşaqlarımıza “nəşə”ni də “tərifləməklə” sevdiririk. Ozü də harda - toylarda, gələcək ailənin təməlinin atıldığı bir gündə”.
Günel CƏLİLOVA
