Azərbaycana elektrik mühərrikilə hərəkətə gətirilən təzə avtomobillərin idxalı gömrük rüsumundan azad edilir. Nazirlər Kabineti bununla bağlı “Azərbaycan Respublikasının xarici iqtisadi fəaliyyətin mal nomenklaturası, idxal gömrük rüsumlarının dərəcələri və ixrac gömrük rüsumlarının dərəcələri”ndə müvafiq dəyişiklik edib. Zavod buraxılış tarixindən 3 ilədək ötmüş elektrikli minik avtomobillər 15 faiz idxal gömrük rüsumundan azad edilir.
Nazirlər Kabinetinin 2017-ci il 17 noyabr tarixli 500 nömrəli Qərarı ilə təsdiq edilmiş "Azərbaycan Respublikasının xarici iqtisadi fəaliyyətin mal nomenklaturası, idxal gömrük rüsumlarının dərəcələri və ixrac gömrük rüsumlarının dərəcələri"ndə dəyişiklik edilməsi barədə" Nazirlər Kabinetinin qərarı ilə zavod buraxılış tarixindən 3 ilədək ötmüş elektrik minik avtomobilləri, həmçinin, elektrik mühərrikli avtomobillər üçün ikinci və üçüncü səviyyə elektrik enerji doldurucuları idxal gömrük rüsumundan azad edilib.
Qeyd edək ki, baş nazir Əli Əsədov Nazirlər Kabinetinin 2017-ci il 17 noyabr tarixli 500 nömrəli Qərarı ilə təsdiq edilmiş "Azərbaycan Respublikasının xarici iqtisadi fəaliyyətin mal nomenklaturası, idxal gömrük rüsumlarının dərəcələri və ixrac gömrük rüsumlarının dərəcələri"ndə dəyişiklik edilməsi barədə qərar imzalayıb.
Maraqlıdır, elektrik minik avtomobillərinin idxal rüsumundan azad edilməsi ölkəmizdə həmin avtomobillərin daha geniş yayılmasına, ənənəvi yanacaqla çalışan avtomobillərin isə bazarı tərk etməsinə səbəb olacaqmı?
“İnsan sağlamlığına verilən dəyər, ekosistemin yaxşılaşdırılması və köhnəlmiş avtomobil parkının yenilənməsi qarşıya qoyulan məqsədlərdəndir”
Nəqliyyat məsələləri üzrə ekspert Eldəniz Cəfərov qeyd etdi ki, elektriklə çalışan avtomobillərin gömrük rüsumundan azad olunması Nazirlər Kabineti yanında Biznes mühiti və beynəlxalq reytinqlər üzrə Komissiyanın “Yol xəritəsi” əsasında həyata keçirilən addımlardan biridir: "Məlumdur ki, ötən ilin dekabr ayında komissiyanın alt quruplarında Azərbaycanda ekoloji təmiz nəqliyyat vasitələrinin ölkəmizə idxalı və ölkə daxilində istismarının stimullaşdırılması ilə bağlı “Yol xəritəsi” hazırlandı. Bu plana əsasən, yanvar ayının 1-də artıq ölkəmizə idxal olunan ekoloji təmiz nəqliyyat vasitələri, o cümlədən də elektrik mühərrikli avtomobillər gömrük və vergidə ƏDV-dən azad edildilər. Daha sonra oktyabr ayının 1-dən etibarən bu növ avtomobillərə ayrılan kredit şərtlərinin sadələşdirilməsi oldu. İndiki mərhələdə isə elektrik mühərrikli avtomobillər gömrük rüsumundan azad edildi. Gömrük rüsumundan azad edilmə təbii ki, ölkəmizə bu növ avtomobillərin idxalını sürətləndirəcək, vətəndaşların marağını daha da artıracaq”.
Ekspert hesab edir ki, adıçəkilən nəqiyyat vasitələrinin gömrük rüsumundan azad edilməsi məqsədlərdən biri həm atmosferə buraxılan zərərli qazların miqdarını azaltmaq, insan sağlamlığına verilən dəyər, ekosistemin yaxşılaşdırlması və köhnəlmiş avtomobil parkının yenilənməsidir: “Məlumdur ki, elektrik mühərrikli avtomobillər atmosferə karbondioksid CO2 qazını buraxmır və ona görə də bu avtomobillər ekoloji təmiz nəqliyyat vasitələri sayılırlar. Elektrik mühərrikli avtomobillərin sayı artdıqca ənənəvi yanacaqla işləyən avtomobillərin sayında azalma olacaq. Ölkəmizdə 2026-cı ilə qədər avtomobillərin utilizasiyası proqramı da həyata keçiriləcək və burada əsas məqsəd kimi ölkəmizdə artıq metalloma çevrilmiş, ekoloji cəhətdən zərərli olan nəqliyyat vasitələrinin utilizasiyası reallaşacaq. Beləliklə də, 2030-cu ilə qədər həqiqətən də biz qarşıda olan hədəfə çata biləcəyik”.
Günel CƏLİLOVA
