2020-ci ilin 27 sentyabrından 10 noyabra qədər davam edən İkinci Qarabağ müharibəsi şanlı qələbəmizlə başa çataraq xalqımızın 30 ilik həsrətinə son qoydu. Fəqət, buna qəhrəman ordumuz - Vətənin qeyrətli övladları hər qarşı torpaq uğrunda can verməklə, qan tökməklə nail olundu. Düşmənə qarşı haqq savaşımızda Masallı rayonundan da çoxlu gənc müharibə meydanda rəşadət göstərərək şəhidlik zirvəsinə ucalıblar. Rayonda ölümü gözə alıb Vətən üçün, millətin xoşbəxt gələcəyi naminə canından keçən belə mərd, igid övladlarının xatirəsini hər zaman əziz tutur, adlarını böyük fəxrlə çəkirlər.
Rayonun əksər yerlərində olduğu kimi Şatıroba kəndində də şəhidlərin xatirəsinə abidə kompleksi tikilibdir. Vətən uğrunda canını fəda edən şəhid Natiq Əhmədovun adını daşıyan kənd tam orta məktəbinin qarşısında inşa olunan, öz möhtəşəmliyi ilə uzaqdan belə adamın diqqətini çəkən bu abidə kompleksinə hər bir şatırobalı müqəddəs and yeri kimi baxır. Onun açılış mərasimində şəhidlik zirvəsini fəth edən igid Vətən oğullarının xatirəsi bir dəqiqəlik sükutla yad edildi.
Masallı Rayon İcra Hakimiyyətinin başçısı Araz Əhmədov öz çıxışında 44 günlük haqq savaşımızda qəhrəmanlıq göstərən igidlərdən söhbət açdı. Bildirdi ki, Ali Baş Komandan İlham Əliyevin rəhbərliyi və qüdrətli ordumuzun şücaəti nəticəsində ölkəmizin ərazi bütövlüyü təmin edildi, həmçinin bütün şəhidlərin qisası alındı. Bununla ömrünü Vətənə bağlayanlar təkcə ailəsinə deyil, Vətəninə, millətinə başucalığı gətirməklə, şərəfli ölümləri ilə özlərinə ürəklərdə əzəmətli abidə ucaltdılar.
Kənd sakini, Qarabağ döyüşləri qazisi, məktəbin müəllimi Nurəli Səfərov vurğuladı ki, əlinə silah götürün haqq işimiz uğrunda düşmənə qarşı vuruşan hər kəsin qəlbi Vətən, torpaq sevgisi ilə döyünürdü. Məhz qazanılan qələbəmizin birinci səbəbi bu idi. İndi qeyrətli oğullar sayəsində qalib vətəndaş olmağın səadətini yaşamaq həqiqətən böyük xoşbəxtlikdir. Şair Zahir Sadıqov isə özünün «Vətən» şerini söylədi, abidə ziyarət olundu və ona tər güllərdən çələng hörüldü. Tədbir məktəblilərin ifasında vətənpərvərliyə, qəhrəmanlığa həsr edilən şerlərə davam etdi.
Məlumat üçün bildirim ki, açılış mərasiminə Masallı Rayon İcra Hakimiyyətinin başçısı cənab Araz Əhmədovla bərabər hüquq-mühafizə orqanlarının, müəssisə və təşkilat rəhbərləri, SHXÇDX Masallı rayon şöbəsinin əməkdaşları, rayonda fəaliyyət göstərə partiya nümayəndələri , şəhid ailələri, qonaqlar, müharibə veteranları, kənd sakinləri və jurnalistlər qatılmışdılar.
Zəfər ORUCOĞLU Azərbaycan Jurnalistlər Birliyinin üzvü.
