Azərbaycanda oğul yetişdirən ailələr bir həqiqətə inanıb. Hərbi xidmət kişilik məktəbidi və o məktəbi hər kəs keçməlidi. Ata-analar yeniyetmə oğlunun ərköyünlüklərinə belə əsgər olandan sonra düzələcəyi ümidilə baxıblar. Ancaq indi bəzən fərqli fikirlər də səslənir. Belə ki, evin tək uşaqlarının cəbhəyə göndərilməməsi müzakirə edilib.
Milli Məclisin İctimai birliklər və dini qurumlar, Mədəniyyət, Elm və təhsil, Səhiyyə, Ailə, qadın və uşaq məsələləri komitələrinin birgə iclasında məlum məsələ müzakirə edilib. Ancaq bu fikir cəmiyyət arasında narazılığa səbəb olub.
Məlumdur ki, son illər ölkəmizdə təkuşaqlı ailələrin sayı artır. Ekspertlər hesab edir ki, belə bir məsələ qanuniləşərsə gələcəkdə təkuşaqlı ailələrin sayı daha da artacaq. Bu isə sonrakı uşaqların dünyaya gəlməsi üçün problemlər yarada bilər.
Rasim İsgəndərov: “18 yaşı tamam olan kişilər vətənə borcunu verməlidir”
Hərbi ekspert Rasim İsgəndərov bildirdi ki, Konstitusiyada qeyd edilir ki, 18 yaşı tamam olan kişilər vətənə borcunu verməlidir: “Səfərbərlik xidmətində hər il hesablamalar aparılır. Məlum olub ki, indi ailədə uşaqların sayı əvvəlkindən çox fərqlənir. Əvvəllər bir evdə 5-6 uşaq olurdu, indi ailədə bir, ya iki övlad var. Çox vaxt da iki uşaqdan biri oğlan olur. Belə olduğu halda, çağırış resursu ola bilsin ki, yetəri qədər olmasın. Misal üçün, 10 min əsgər çağırılmalıdırsa, əgər biz tək uşaq, tək oğul məsələsini ortaya qoysaq, bu zaman səfərbərlik xidməti o sifarişi yerinə yetirə bilməyəcək. Hazırda bunun qanunda öz əksini tapmamasının səbəbi da ailələrin az uşaqlı olması ilə bağlıdır. Səfərbərlik xidməti əsgər sifarişini yerinə yetirə bilsə, ondan sonra bu məsələyə baxıla bilər. Yerlərdə isə bildiyim qədər, komandirlər biləndə ki, evin tək uşağıdır, çalışırlar bunu nəzərə alsınlar”.
Aytəkin Kamranqızı: “Ailədə bir övlad da olsa, 2 övlad da olsa Azərbaycanımız üçün öz hərbi vəzifəsini yerinə yetirməyə borcludur”
Sosioloq Aytəkin Kamranqızı bildirdi ki, hazırda bir oğula sahib olan ailələrin sayı on minlərlədir: “Azərbaycan gənclərinin özləri də bu qərarı dəstəkləməzlər. Çünki bu qərarda bir diskriminasiya məsələsi də var. “Niyə mənim qohumum vətəni qoruyur, amma mən qoruya bilmirəm” deyə cavanlarımız bunu fikirləşər”.
Sosioloqun sözlərinə görə, istənilən halda hər bir şəxsiyyət unikaldır, onun təkrarı və bənzəri yoxdur. Ailədə bir övlad da olsa, 2 övlad da olsa Azərbaycanımız üçün öz hərbi vəzifəsini yerinə yetirməyə borcludur.
Günel CƏLİLOVA
