Paytaxtda 1000-ə yaxın yaşayış binasının söküləcəyi barədə məlumat yayılıb. Xəbərə görə, bu, Bakı şəhərinin 2020-2040-cı illəri əhatə edən Baş planında öz əksini tapıb.
Məlumatda qeyd olunur ki, Dövlət Şəhərsalma və Arxitektura Komitəsinin hazırladığı Baş planda ərazilərin zonalaşdırılması, yeni mühəndis-kommunikasiya sistemləri, nəqliyyat infrastrukturunun yenilənməsi kimi mühüm dəyişikliklər nəzərdə tutulub.
Iddia olunur ki, istismar müddəti bitmiş binalar söküləndən sonra onların yerində çoxmərtəbəli binalar inşa olunacaq. Bu isə şəhərdə sıxlığın olmasına səbəb olacaq. Yollar daha da daralacaq, tıxacın uzunluğu artacaq, tikinti bumu isə şəhər sakinlərinin narahatlığına səbəb olacaq. Ekspertlər hesab edir ki, söküləcək binaların yerində çoxmərtəbəli bina inşa etmək əvəzinə yolları genişləndirmək, həmin ərazidə məktəb və bağça tikmək olar. Beləliklə, paytaxt ərazisində sıxlıq müşahidə olunmaz.
Qəzalı halda olan binanı söküb yerində çoxmərtəbəli bina inşa etmək hansı problemi həll edir?
“Çoxmərtəbəli binalar salınarkən normativ qaydalar nəzərə alınmadığı üçün şəhərdəki, yollardakı sıxlıq problemi həll olunmayacaq”
Əmlak məsələləri üzrə ekspert Elnur Fərzəliyev bildirdi ki, şəhərdə aparılacaq bütün tikinti işləri Bakının baş planına əsasən aparılmalıdır: “Əgər istismar müddəti başa çatmış 5 mərtəbəli bina sökülüb yerinə 16 mərtəbəli bina tikilirsə, bu hansısa problemin aradan qaldırılmasına zərrə təsir etməyəcək. Köhnə, qəzalı vəziyyətdə olan binalar söküldükdən sonra plana əsasən iş aparılmalıdır. Vacib deyil ki, sökülmüş binanın yerinə mütləq şəkildə yeni bina tikilsin. Bəzi binaları söküb yolu genişləndirmək, yeni avtomobil yolları salmaq, avtomobil parkları qurmaq olar. 5 mərtəbəli binanın yerinə 16 mərtəbəli bina tikməklə daha çox sıxlığa, tıxaca, yol darlığına şərait yaradılmış olacaq. Bakı şəhərində küçələrdə, yollarda, məktəblərdə, bağçalarda yaranmış sıxlığın səbəbi plansız şəkildə aparılan tikintilərdir. Bu gün Bakı şəhərində məktəb, dövlət bağçası çatışmazlığı var. Elə komplekslər var ki, onların özünə ayrıca məktəb, bağça lazımdır. Bu gün məktəblərdə bir sinifdə 35-40 uşağın olması tikilən komplekslərə qarşılıq məktəblərin inşa edilməməsinin nəticəsidir. Şəhərdə durmadan əhali sayı artır, ancaq bu saya məktəb, dövlət bağçası uyğun gəlmir. Çoxmərtəbəli binalar tikildikcə məktəblər inşa edilməlidir, yol genişləndirilməli, avtomobil parkları yaradılmalıdır. Ancaq bu işlər heç bir normalar qorunmadan kor-koranə aparılır. Qəzalı halda olan binanı söküb yerində çoxmərtəbəli bina inşa etmək hansı problemi həll edir? Hansı qəzalı bina sökülərkən yerində inşa ediləcək çoxmərtəbəli binada yaşayacaq sakinlərin tələbləri nəzərə alınıb? Hansı kompleks salınarkən yaxınlığında məktəb, bağça, avtomobil parkı, poliklinika inşa edilib? Mən son illərdə belə bir kompleks işin şahidi olmamışam. Varsa da çox azdır”.
Ekspert hesab edir ki, çoxmərtəbəli binalar salınarkən bu normalar nəzərə alınmadıqca şəhərdəki, yollardakı sıxlıq problemini aradan qaldırmaqdan söhbət belə gedə bilməz.
Günel CƏLİLOVA
