Məlumdur ki, “Sədərək” ticarət mərkəzinin girişində və çıxışında şlaqbaumlar quraşdırılıb. Ticarət mərkəzinin girişinə quraşdırılan şlauqbaum vasitəsilə nəqliyyat vasitələrinin əraziyə daxil olması üçün hər kəsdən 50 qəpik pul tələb olunur.
Ancaq bunun qarşılığında sürücülərə hər hansı bir qəbz verilmir. Adıçəkilən ticarət mərkəzinə daxil olmaq üçün yığılan pulun şəffaflığına necə nəzarət olunur? Qeyd etdiyimiz kimi, ödənişə görə qəbz verilmir. Belə olan halda yığılan vəsaitin hesabatı necə aparılır?
Əkrəm Həsənov: “Qəbz verilmirsə, məlum məsələdir ki, heç bir halda uçot da aparılmır”
Hüquqşunas Əkrəm Həsənov qeyd etdi ki, “Sədərək” Ticarət Mərkəzinin ərazisinə daxil olan avtomobillərdən 50 qəpik giriş haqqı tələb edilsə də, bunun müqabilində sürücülərə heç bir qəbz verilmir. Hər gün yüzlərlə avtomobilin əraziyə daxil olduğu nəzərə alınsa, kifayət qədər məbləğin ortaya çıxdığı aydın olar: “Ümumiyyətlə, ticarət mərkəzi özəl ərazidirsə, daxil olan avtomobillər icarə haqqı verməlidirlər. Belə halda tərəflər arasında şifahi icarə müqaviləsi bağlanmış olur. Avtomobil sürücülərindən alınan 50 qəpik icarə haqqıdır. Vergi Məcəlləsinə görə, icarə haqqına 14% dərəcəsi ilə vergi nəzərdə tutulur. Sahibkar bu vergini ödəməli, müqabilində avtomobil sahiblərinə qəbz verməlidir. Qəbz verilmirsə, məlum məsələdir ki, heç bir halda uçot da aparılmır”.
Elxan Əliyev: “Ticarət mərkəzinə nəqliyyat vasitəsilə daxil olmaq istəyən vətəndaşlardan pullar yığılır, bunun heç bir vergisi, hesabatı yoxdur”
Sosial sahə üzrə ekspert Elxan Əliyev bildirdi ki, “Binə” və “Sədərək” ticarət mərkəzlərinə nəqliyyat vasitəsilə daxil olmaq istəyən vətəndaşlardan yığılan pulların heç bir vergisi, hesabatı yoxdur. Sürücülərə qəbz verilmir. Sürücü ərazidən çıxanda əl uzadanlara 50 qəpik verir ki, oradan çıxsın. İnsanlar buna dəfələrlə etiraz etsələr də, nəticəsi olmayıb: “Sədərək” ticarət mərkəzi özü üçün post qurub, gələn-gedəndən 50 qəpik pul alır. Yoldan keçənlərdən yol vergisi alırlar və bunun heç bir rəsmiyyəti yoxdur. Sanki havaya atılan pullardır və bu pullar birbaşa ticarət mərkəzi rəhbərliyinə çatır. Onu da qeyd edim ki, qanunvericiliyə görə, parkinqlərdən istifadə 15 dəqiqə ərzində ödənişsizdir. 15 dəqiqə ərzində həmin yeri tərk edirsənsə, səndən heç kim ödəniş almamalıdır. Amma hazırkı vəziyyətdə, dəqiqəsindən asılı olmayaraq, ora giriş edirsənsə, mütləq pul ödəməlisən. Bunun sistemi, qanun-qaydası niyə yoxdur?”
Günel CƏLİLOVA
