“Bakı Beynəlxalq Avtovağzal Kompleksində hələ də tam qayda-qanun yarada bilmirik. O qədər səy göstəririk, lakin orada xoşagəlməz vəziyyət hələ də hökm sürür”. Bunu rəqəmsal inkişaf və nəqliyyat nazirinin müavini Rəhman Hümmətov bildirib. Nazir müavininin sözlərinə görə, rayonlarda vəziyyət daha da çətindir.
Onun dediyinə görə bu vəziyyəti kökündən dəyişməyin yeganə yolu icazə sisteminin bərqərar olmasıdır: “Avtobuslar birmənalı şəkildə avtovağzaldan-avtovağzala getməlidir. Bunun başqa yolu yoxdur. Biz Daxili İşlər Nazirliyinə vəziyyətlə bağlı müraciət etdik, avtovağzalın qarşısında vəziyyətin yoluna qoyulması üçün xeyli köməklik göstərdilər. Digər yerlərdə də oxşar vəziyyətdir”.
Qeyd edək ki, paytaxtda və bölgələrdə avtovağzal kompleksi inşa olunsa da, hələ də sərnişinlər rayonlararası gediş-gəlişdə taksi xidməti göstərən minik avtomobillərinə, eləcə də aztutumlu mikroavtobuslara üstünlük verirlər. Onların fəaliyyəti qeyri-qanuni sərnişindaşıma hesab edilsə də, hər gün rayonlara, eləcə də əks istiqamətə xeyli sayda sərnişin daşınır.
Onu da bildirək ki, heç bir texniki yoxlamadan keçməyən və bəzi hallarda sərnişindaşıma tələblərinə cavab verməyən avtobuslar, taksilər bölgələrə qanunsuz reyslər həyata keçirir. Təbii ki, bu da öz növbəsində avtovağzallarda qanuni fəaliyyət göstərən avtobusların reysə çıxmasına mane olur, daşıyıcıların rentabelliliyinə ciddi zərbə vurur.
“Qanunsuz sərnişindaşıma sərnişinlər üçün daha rahat hesab olunsa da, onların təhlükəli olması çox təəssüf ki, nəzərə alınmır”
Nəqliyyat məsələləri üzrə ekspert Elməddin Muradlı bildirdi ki, qanunsuz sərnişindaşıma səbəbindən avtovağzallar boş qalıb: "Bu gün qanunsuz sərnişindaşıma qanuni sərnişindaşımadan dəfələrlə çoxdur. Pandemiya dövründə qanunsuz sərnişindaşıma daha çox sərnişin cəlb edə bildi. Çünki, həmin dövrdə rayonlararası sərnişindaşıma dayandırılmışdı. Onlar artıq öz müştərilərini toplayıblar. Qanunsuz sərnişindaşıma sərnişinlər üçün daha rahat hesab olunsa da, onların təhlükəli olması çox təəssüf ki, nəzərə alınmır. Sərnişinlər qanunsuz sərnişindaşıma xidmətlərindən istifadə edirsə, bilməlidirlər ki, onların həyatı sığortalı deyil. Qəza baş verərsə onlara sığorta ödənilməyəcək. Amma qanuni sərnişindaşıma xidmətindən istifadə edən sərnişin sığortalı olur. Onu daşıyan sürücü və avtomobil tibbi və texniki müayinədən keçir. Çox təəssüf ki, insanlar bəzən zaman qazanmaq üçün qanunsuz sərnişindaşımaya üz tutur".
E.Muradlının sözlərinə görə, qanunsuz sərnişindaşımadan ən böyük ziyanı dövlət büdcəsi çəkir: “Qanunsuz sərnişindaşımaya qarşı mübarizə tədbirləri gücləndirilməlidir. Qanunsuz sərnişindaşıma ilə məşğul olanların arxasında dayanan qüvvələr var. Onlar lazım gələndə qazilərdən sui istifadə edirlər. Buna son qoyulmalıdır".
Ekspert hesab edir ki, onlayn bilet sistemi rayonlararası sərnişindaşımada tətbiq edilməlidir: "Məlumdur ki, b gün ucqar kəndlərin hamısında artıq internet var. Bakıya gəlmək üçün sərnişin rayon mərkəzinə gəlib bilet alıb qayıdır. Bir də səhəri gün Bakıya gəlmək üçün avtovağzala gəlir. Sərnişin iki dəfə əziyyətə düşür. İşğaldan azad edilmiş rayonlara bilet satışının onlayn həyata keçirilməsi göstərdi ki, sərnişinlər bu xidmətdən yararlana bilirlər. Deməli bunu bütün ölkə üzrə tətbiq etmək problem olmaz. Bu qanunsuz sərnişindaşımanın da qarşısını alacaq".
Günel CƏLİLOVA
