"Bakıda bəzi məktəb və 125 uşaq bağçasının istilik sistemində problemlər aşkarlanıb". Bunu Bakı Şəhəri üzrə Təhsil İdarəsinin (BŞTİ) müdir müavini Orxan Kərimov ümumi təhsil müəssisələrinə payız-qış mövsümünə hazırlıqla bağlı təşkil edilən mediatur zamanı deyib.
O, payız-qış mövsümünə hazırlığa və məktəblərin istiliklə təminatına diqqətin artırılmasının vacibliyini bildirib. O.Kərimov aparılan monitorinqlər nəticəsində bir sıra məktəblərdə müəyyən problemlərin aşkar olunduğunu, həmin məktəblərin bir çoxunda təmir-bərpa işləri aparıldığını və digərlərində hazırda müvafiq tədbirlərin davam etdirildiyini nəzərə çatdırıb. Paytaxtdakı 125 uşaq bağçasının da istilik sistemində müəyyən problemlərin aşkarlandığını bildirən müdir müavini problemlərin aradan qaldırılması üçün zəruri işlərin görüldüyünü deyib.
Elşən Qafarov: “Hazırda ümumtəhsil və məktəbəqədər təhsil müəssisələrində istilik problemi mövcuddur”
Bakıda bəzi məktəb və 125 uşaq bağçasının istilik sistemində problemlərin olması barədə fikir bildirən təhsil eksperti Elşən Qafarov “Bakı-Xəbər”ə açıqlamasında qeyd etdi ki, məktəbəqədər təhsil müəssisələri uzun müddət rayon icra hakimiyyətlərinin tabeliyində olduğu üçün həmin təhsil müəssisələrində bir sıra problemlər yaranıb: “İstilik problem tək məktəbəqədər təhsil müəssisələrində deyil, bütün təhsil müəssisələrində yaşanır. Məlumdur ki, məktəbəqədər təhsil müəssisələri cari ilin yanvarın 1-dən Təhsil Nazirliyinin balansına verilsə də, təhvil prosesi aprel-may ayında həyata keçdi. Təhsil müəssisələrində istilik probleminin hansı səviyyədə olması ilə bağlı monitorinq yay aylarında aparılmalı idi. Aşkar olunan çatışmazlıqlarda oktyabr ayına qədər də həll olunmalı idi. Bəllidir, noyabrın 15-dan ölkədə qış rejimi başlayır. Problemlər bundan sonra üzə çıxacaq”.
Həmsöhbətimiz onu da əlavə etdi ki,hazırda ümümtəhsil və məktəbəqədər təhsil müəssisələrində istilik problem mövcuddur. Problemi həll etmək üçün istilik sistemi təhsil müəssisələrinə noyabrın 15-də deyil, həmin ayın 1-dən verilməlidir.
Elçin Əfəndi: “Aidiyyatı qurumlar bu məsələni dərhal nəzarətə götürməlidir ki, uşaqlar dərsə və ya bağçaya gedən zaman soyuq otaqlarda oturmasın”
Təhsil eksperti Elçin Əfəndi bizimlə söhbətində bildirdi ki, Bakı şəhər Təhsil İdarəsinin tabeliyində olan orta ümumtəhsil məktəbləri və məktəbəqədər təhsil müəssisələrinin istilik sistemi ilə təmin olunması birbaşa “Azəristiliktəchizat” ASC-in ixtiyarında olan məsələdir. Onlar bu prosesi həyata keçirməlidir ki, istiliklə bağlı problem olmasın: “Məlumdur ki, ölkədə qış rejimi noyabrın 15-dən başlayır. 10 gün ərzində “Azəristiliktəchizat” ASC bu sahədə mövcud olan bütün problemləri həll etməlidir. Aidiyyatı qurumlar bu məsələni dərhal nəzarətə götürməlidir ki, uşaqlar dərsə və ya bağçaya gedən zaman soyuq otaqlarda oturmasın”.
Həmsöhbətimiz onu da əlavə etdi ki, Bakı Şəhər Təhsil İdarəsinin tabeliyində olan 130-ya yaxın təhsul müəssisəsi birbaşa “Azəristiliktəchizat”in nəzarətindədir. Digər təhsil müəssisələrinin istiliklə təmin məsələsi ya qazanxanalar həyata keçirməli, ya da fərdi qaydada bu iş edilməlidir.
Günel CƏLİLOVA
