3-4 noyabr tarixlərində Cənubi Koreyanın Tequ şəhərində İpək Yolu və Mərkəzi Asiya üzrə 2022 Keimyung Beynəlxalq konfransı keçirilib. Azərbaycan Milli Xalça Muzeyinin mətbuat xidmətindən baki-xeber.com-a verilən məlumata görə, Keimyung Universitetinin təşkilatçılığı ilə “Xalça toxuculuğu: İpək Yolunun tarixi və gözəlliyi” mövzusunda keçirilən konfransda ölkəmizi Azərbaycan Milli Xalça Muzeyinin direktoru, sənətşünaslıq üzrə fəlsəfə doktoru Şirin Məlikova təmsil edib. O, ABŞ, İtaliya, Cənubi Koreya, Avstraliya, Pakistan, Monqolustan, Özbəkistan, Qırğızıstan və Qazaxıstandan 20 tədqiqatçının qatıldığı beynəlxalq tədbirdə “Azərbaycanda xalça toxuculuğu: əsrlərdən baxış” adlı məruzə ilə çıxış edib.
Şirin xanım Azərbaycanda xalçaçılıq sənətinin yaranması və inkişaf tarixi, qədim dövrlərdən bu günə qədər yaşadılan ənənələr barədə məlumat verib. Müxtəlif texnikalarla toxunan xalçaların özünəməxsus cəhətləri, ornamentləri və onların daşıdığı simvolik mənalardan danışıb. Əsrlər boyu ölkəmizin hər bir bölgəsində toxucuların əsrarəngiz xalçalar yaratdıqlarını, onların bir qisminin bu gün dünyanın ən böyük muzeylərində saxlanıldığını, mötəbər sərgilərdə nümayiş olunduğunu, həmin sənət nümunələrinin cəmiyyətin dünyagörüşünün və bədii zövqünün orijinallığını əks etdirdiyini vurğulayıb. Ölkəmizdə xalçaçılıq sənətinin qorunması, təbliği, inkişafı məqsədilə Azərbaycan Milli Xalça Muzeyinin yaradıldığını bildirib, onun zəngin, çoxşaxəli fəaliyyətini, həyata keçirdiyi layihələri, son illər dövlət səviyyəsində bu sahəyə göstərilən yüksək diqqət və qayğını diqqətə çatdırıb.
Onun çıxışı konfrans iştirakçıları tərəfindən böyük maraqla qarşılanıb.
Qeyd edək ki, Şirin Məlikova Keimyung Universitetinin kitabxanasına Azərbaycan Milli Xalça Muzeyinin nəşrlərini hədiyyə edib.
İradə SARIYEVA
