Bakıda yüzə yaxın qəzalı vəziyyətdə olan bina yaxın vaxtlarda mərhələli şəkildə söküləcək. Bu barədə Bakı Şəhər İcra Hakimiyyətinin başçısı Eldar Əzizov media nümayəndələrinə açıqlamasında bildirib ki, paytaxtda hər ikinci sakin SSRİ vaxtı tikilmiş, tipik çoxmənzilli binalarda yaşayır.
Ona görə də Bakıda köhnə binalar sökülüb əvəzində yeniləri inşa ediləcək. Söküntü sovet dövründə tikilmiş bütün yaşayış binalarına şamil olunacaq. Söküləcək binalar beşmərtəbəli və doqquzmərtəbəlidir.
Maraqlıdır, paytaxt ərazisində söküləcək hansı binalardan söhbət gedir, ümumiyyətlə köhnə tikililərin sayı nə qədərdir? Söküntü prosesi əmlak bazarında qiymətə necə təsir edəcək?
Nüsrət İbrahimli: “Köhnə binaların sökülməsində məqsəd tikinti sektorunu gücləndirməkdir”
Daşınmaz əmlak məsələləri üzrə ekspert Nüsrət İbrahimov bildirdi ki, köhnə binaların sökülməsi üçün Nazirlər Kabinetinin qərarı olmalıdır. Bu isə Bakı Şəhər İcra Hakimiyyətinin başçısının dediyi fikirdir: “Köhnə binaların sökülməsində məqsəd tikinti sektorunu gücləndirməkdir. Bakıda 9 mərtəbəli evin yeri hansısa bir şirkət rəhbərinin xoşuna gəlir. Hesablayır ki, onun yerində yeni tikili olsa daha rentabelli olar və baha satılar. Bundan sonra Bakı Şəhər İcra Hakimiyyətinə müraciət edir, aralarında razılaşdırırlar və həmin bina sökülür. Prosedur belə formalaşıb. Bunun da əsas məqsədi ölkədə tikinti sektorunu inkişaf etdirməkdir. Tikinti sektoru inkişaf edəndə özü ilə bir çox sahəni də inkişaf etdirir”.
Nüsrət İbrahimov Bakıda sovet dövründən tikilən binların həddindən artıq dayanıqlı olduğunu vurğulayıb: “Dövlət köhnə binaları deyil, diqqətini "Kubinka”, "Sovetski”, "Xutor” kimi tanınan yerlərə versin. Yuxarıdan baxanda həmin yaşayış mərkəzləri çox pis görsənir. Həmin ərazilər sökülüb, yerində yeni binalar və evlər tikilməlidir”.
Elnur Fərzəliyev: “İstismar müddəti bitmiş binaların sökülməsi əmlak bazarına müsbət təsir göstərəcək”
Əmlak eksperti Elnur Fərzəliyev bildirdi ki, paytaxt Bakı və ətrafında ümumi olaraq 11 min istismar müddəti bitmiş köhnə, çoxmənzilli yaşayış binaları var, hansı ki, onlar iki, üç, dörd və beşmərtəbəli binalardır: “Fövqəladə Hallar Nazirliyinin apardığı monitorinq nəticəsində onlardan 100-ə yaxını qəzalı bina kimi qeydə alınıb. Əlbəttə ki, nazirlik ümumi olaraq istismar müddəti bitmiş binaların monitorinqi aparsa, qəzalı binaların sayı nisbətən çox olar. Lakin bu o demək deyil ki, bir binanın istismar müddəti bitibsə, mütləq qəzalıdır, mütləq sökülməlidir. Digər, xüsusən də Mərkəzi Avropa ölkələrə baxsaq görərik ki, paytaxt şəhərlərdə 17-18-ci əsrlərdə tikilmiş binalar var ki, orada hazırda da insanlar yaşayır. Həmin binalar həm tarixi abidə kimi qorunur, həm də lazım gələndə təmir-bərpa işləri aparılır”.
Ekspert hesab edir ki, qəzalı və köhnə binalar söküldükcə həmin binalara maraq artır: “Bunun əsas səbəblərindən biri də odur ki, həmin binalar sökülür, yerinə yeni tikili binalardan mənzil təklif edilir və vətəndaşın mənzilinin qiyməti daha çox olur. Köhnə bina sökülərkən burada mənzillərin orta qiyməti təxminən 70-80 min manat olur. Lakin həmin bina sökülüb yerində yenisi tikilirsə, mənzil sahibinə tikinti şirkəti tərəfindən üç il kirayəhaqqı ödənilir. Daha sonra mənzilinin əvvəlki sahəsindən daha geniş mənzil təklif edilir ki, bunun da qiyməti təxminən 130 min manata qədər bahalaşır. Ona görə də söküntü gedən binalarda qiymətlər ucuzlaşmaq əvəzinə bahalaşır”.
Həmsöhbətimiz onu da əlavə etdi ki, istismar müddəti bitmiş binaların sökülməsi əmlak bazarına müsbət təsir göstərəcək: "Qəzalı binaların sökülərək yerində yeni binaların tikilməsi şəhərin görünüşünə də müsbət təsir edəcək. Hər yeni bina tikiləndə ölkəmizdə fəaliyyət göstərən tikinti materialları istehsal edən zavodların, fabriklərin gəlirləri artır, yeni iş yerlərinin açılmasına səbəb olur. Danılmaz faktdır ki, binalar tikilib qutardıqdan sonra da onların təmirində istifadə olunan materiallar, mebellər, aksesuarlar yenə yerli bazarlardan alınır. Bu da iqtisadi baxımdan müsbət amildir”.
Günel CƏLİLOVA
