Uşaqlıq və məktəbəqədər yaş dövrü nəinki uşağın, həmçinin insan həyatının çox mühüm dövrüdür. Məhz bu dövrdə insanın sağlamlığı, onun xarakterinin və şəxsiyyətinin əsas cəhətləri formalaşır. Uşaqlıq dövründə qazanılan bilik, vərdiş və bacarıqlar böyük ölçüdə insanın bütün qalan ömrünü müəyyən edir.
Müasir dövr insanın qarşısında daha çox tələblər qoyur. Ona görə də uşağın inkişafı nə qədər tez başlansa, bir o qədər də həm məktəbdə, daha sonra karyera və ümumiyyətlə həyatda uğur qazanması asanlaşar. Məktəbqədər hazırlıq kiçik yaşlarından uşaqda ətraf aləmə maraq yaradır, biliklərə və qarşıya qoyulmuş tapşırıqlara müstəqil həll yolu axtarmağa meyl formalaşdırır.
Övladını bağçaya qoymaq istəyən valideynlər üçün iki seçim var: dövlət və özəl bağçalar. Ancaq bu seçimlərdən istifadə imkanı heç də hər valideynə qismət olmur. Dövlət bağçalarında yer olmur, özəl bağçalarda isə qiymət hər ailənin büdcəsinə uyğun deyil. Məlumdur ki, bağçalara qəbul elektron qaydada həyata keçirilir. Övladını bağçaya yazdırmaq istəyən valideyn elektron şəkildə müraciət etsə də valideynə ya “yer yoxdur”, ya da “gözləyin” cavabı verilir. Ancaq iddia olunur ki, boş qalmış yerlərə direktorlar müəyyən pul qarşılığında uşaq qəbul edirlər.
“Bağçalar indi də 30 il bundan əvvəlki qaydada idarə olunur, uşaq qəbulu həmişəki formada həyata keçirilir”
Məsələ ilə bağlı fikir bildirən təhsil eksperti Kamran Əsədov qeyd etdi ki, uşaqların qəbulu prosesi elektronlaşsa da, proses etibarlı deyil: “Yenə də nazirlikdə özünə qohum tapan şəxslər direktor vəzifəsinə düzəlir və elə bu qohumluq vasitəsilə də əvvəlki qaydada bağçaya uşaq qəbul edirlər. Elektron qaydada uşagını bağçaya yazdıranlar növbədə gözləyir, boş qalmış yerlərə direktorlar müəyyən pul qarşılığında uşaq qəbul edirlər. Elm və Təhsil Nazirliyi strategiyadan irəli gələn vəzifələri yerinə yetirə bilmir. Bağçalar indi də 30 il bundan əvvəlki qaydada idarə olunur, uşaq qəbulu həmişəki formada həyata keçirilir”.
Ekspert onu da əlavə etdi ki, hazırda ölkə üzrə 1693 uşaq bağçası və körpələr evi var. Onlardan 320-si paytaxtda yerləşir. Bu bağçaların tutumu 123 min yerlikdir. Amma bağça yaşlı uşaqların sayı 800 minə yaxındır: “Rəqəmlər problemdən xəbər verir. 800 min uşaq 320 bağçaya necə yerləşsin?!. Xüsusən paytaxtın Xırdalan, Masazır qəsəbələrində uşaqların bağçaya yerləşdirilməsində ciddi problemlər var. Çünki bu qəsəbələrdə əhali sıxlığı böyükdür, uşaq bağçalarının sayı isə azdır. Gələk, bəzi valideynlərin elektron qəbulda üzləşdiyi problemə. Bəri başdan deyim ki, elektron qəbul tənqid olunsa da, hazırda bu, ən optimal yoldur. Növbə sistemi var, müraciətlərə ardıcıllıqla baxılır. Bəli, yenə xahiş, rüşvət halları olur”.
Günel CƏLİLOVA
