"Yaxın vaxtlarda ali təhsil müəssisələrinin akkreditasiyasına başlanacaq". Bunu elm və təhsil naziri Emin Əmrullayev AzTV-nin canlı yayımında deyib. Nazir xatırladıb ki, oktyabrda ali təhsil müəssisəsinin akkreditasiyası üzrə qiymətləndirmə meyarları təsdiqlənib:
"Bu, əsasən məzmun və tədrislə bağlı meyarlardır. İstər tələbələrlə iş, istərsə də həmin təhsil müəssisəsinin elmi-tədqiqat fəaliyyəti buraya aiddir. Bununla bağlı müstəqil ekspertlər tərəfindən qiymətləndirmələr həyata keçirilir. Həmçinin, ali təhsil müəssisələrinin akkreditasiya hesabatı hər bir Azərbaycan vətəndaşı üçün əlçatan olacaq".
Ali təhsildə akkreditasiyasa hansı dəyişikliklərə səbəb olacaq? Ümumiyyətlə, bunun ali təhsilə nə kimi təsiri olacaq?
“Ali təhsil müəssisələrində akkreditasiyanın aparılması həm daxildə rəqabətliyi artıracaq, həm də ali təhsil sisteminin beynəlxalq rəqabətliyinə təkan vermiş olacaq”
Elm və Təhsil nazirliyi yanında İctimai Şuranın üzvü, Azərbaycan Gənc Alim, Doktorant və Magistrlər Cəmiyyətinin sədri, fəlsəfə doktoru İlqar Orucov “Bakı-Xəbər”ə açıqlamasında qeyd etdi ki, ali təhsil müəssisələrinin akkreditasiyasının keçirilməsi olduqca vacibdir: “Prosesə Təhsildə Keyfiyyət Təminatı Agentliyi nəzarət edir. Vahid mərkəzdən akkreditasiyanın həyata keçirilməsi ali təhsil müəssisələrində həm təhsil proqramlarının səviyyəsini, həm də ali təhsil sisteminin inkişafını müəyyən edəcək. Onu da deyim ki, bu proses dövlət qurumları ilə yanaşı beynəlxalq təhsil qurumları tərəfindən də dəyərləndiriləcək”.
Ekspertin fikrincə, ali təhsil müəssisələrində akkreditasiya keçirilən zaman təhsil proqramlarını vəziyyəti də müəyyən olunacaq. Ümumiyyətlə, ali təhsil müəssisələrində akkreditasiya komplesk yanaşmalarla ortaya qoyulacaq: “Bu proses Nazirlər Kabinetinin akkreditasiya ilə bağlı qaydalarına uyğun şəkildə həyata keçiriləcək”.
Həmsöhbətimiz onu da əlavə etdi ki, ali təhsildə rəqabətlilikdən danışılırsa mütləq şəkildə indiqatorlar müəyyən edilməli, qiymətləndirmənin hansı prinsip əsasında həyata keçirilməsi seçilməlidir: “Ali təhsil müəsssisələrində akkreditasiyanın aparılması həm daxildə rəqabətliyi artıracaq, həm də ali təhsil sisteminin beynəlxalq rəqabətliyinə təkan vermis olacaq. Artıq universitetlər keyfiyyət təminatına önəm vermiş olacaqlar”.
Ekspertin sözlərinə görə, akkreditasiyanın keçirilməsi ali təhsilin inkişafına səbəb olacaq.
Günel CƏLİLOVA
