Bakı MDB məkanında ən sürətlə inkişaf edən və böyüyən paytaxt şəhəridir. Əslində, inkişafına, əhalisinin artım sürətinə görə paytaxtımızı meqapolis də hesab etmək olar. Təbii ki, Bakının inkişafı ilə bərabər, böyük şəhərlərə xas olan ənənəvi ictimai problemləri də yarandı. Bunlardan biri də paytaxtın tıxac problemidir.
Həmin problemin yaranma səbəblərini araşdıran bir çox mütəxəssislər bu qənaətdədirlər ki, burada obyektiv və subyektiv səbəblər mövcuddur. Təbii ki, obyektiv səbəbləri aradan qaldırmaq üçün işgüzarlıq, insanlarda şəhər mədəniyyətinin inkişafı, vətəndaşların öz şəhərlərinə məhəbbəti ciddi amillərdəndir.
Bu faktı da qeyd etmək lazımdır ki, tıxac problemi insanlarda əsəb, stress və yorğunluq yaradan çox ciddi faktorlardandır. Gündəlik bu problemlə üzləşənlərin işgüzarlığı, işinin səmərəsi aşağı olur və insanlarda qocalmanı sürətləndirir.
Tıxac problemini yaradan obyektiv səbəblərdən biri də firma maşınlarının günün istənilən vaxtında dükan və marketə mal paylamasıdır. Bu problemin həll olunması ilə bağlı zamanla müxtəlif təkliflər səslənsə də, firma maşınları sərbəst şəkildə marketin qarşısında saatlarla dayanaraq, uzun-uzadı tıxacın yaranmasına səbəb olur.
“Çörəkdən başqa digər ərzaq məhsulları axşam vaxtı marketlərə paylanılarsa şəhərdə tıxacın qarşısı alınar”
Sosial sahə üzrə ekspert Elxan Əliyev qeyd etdi ki, firma maşınlarının girişi ilə bağlı müəyyən addımlar atılmalıdır: “Firma maşınları günün istənilən saatı şəhərə daxil olur, problem yaradır. Gündəlik zəruri ərzaq məhsulları istisana olmaqla, digər məhsulların şəhərə gətirilməsi ilə məşğul olan firmalar buna nəzarət etməlidir. Yollarda sıxlığın yaranmasında böyük pay sahibi firma maşınlarıdır. Bütün mağaza və marketlər yolun qırağında yerləşir. Firma maşınları da iritutumludur, yolun hərəkət hissəsində saxlayır, irad bildirəndə də deyirlər ki, bəs mən maşını harada saxlayım? Yaxşı olar ki, firma maşınları dükan və marketə malı axsam saat 8-dan sonra paylasın. İş saatı bitəndən 2 saat sonra edərlərsə, şəhərdə tıxacın qarşısı qismən də olsa alınar. Tıxac böyükdən tutmuş kiçiklərə qədər hər kəsin narahatlığına səbəb olur. Bu səbəbdən də tıxacın qarşısını almaq üçün hər xırda detalı belə dəyərləndirmək lazımdır. Firma maşınlarını istənilən saatda yollara buraxmaq düzgün deyil. Çörəkdən başqa digər ərzaq məhsulları axşam vaxtı marketlərə paylanılarsa şəhərdə tıxacın qarşısı alınar”.
Günel CƏLİLOVA
