Ölkədə, demək olar ki, bir çox taksi şirkəti tərəfindən müştərilərə göstərilən xidmətinin keyfiyyəti günü-gündən aşağı düşür. Belə ki, müştəri ilə kobud rəftar, çağırış yerinə gec gəlmək və yaxud müştərini bir neçə on dəqiqə ilə gözlətmək, pik saatlar olmasa belə özlərindən qiymət artımı kimi hallara yol verildiyi üçün taksi şirkətlərindən şikayətlərin sayı artıb.
Elə bu səbəbdən də bu günlərdə Rəqəmsal İnkişaf və Nəqliyyat Nazirliyinin təşkilatçılığı ilə nəqliyyat sahəsinə dair məsələlərlə bağlı müzakirə aparılıb. Müzakirə zamanı taksi xidməti sahəsində mövcud vəziyyətin ürəkaçan olmadığı deyilib. Rəqəmsal inkişaf və nəqliyyat nazirinin müavini Rəhman Hümmətov qeyd edib ki, taksi xidməti sahəsində əsas problem tənzimləmənin zəif olmasıdır: "Bu da haqsız rəqabətə və xidmət keyfiyyətinin aşağı olmasına imkan yaradır".
Qeyd edək ki, uzun zamandır taksi sektorunda keyfiyyətin aşağı olması müzakirə edilir. Ancaq bu sahədə hələ ki, hər hansı bir irəliləyiş yoxdur.
Maraqlıdır, taksi sahəsində yaşanan problemlər necə həll olunmalıdır?
“Qanunla taksi xidməti keyfiyyətinin artırılması və qiymət məsələsi tənzimlənməlidir”
Sosial sahə üzrə ekspert Elxan Əliyev qeyd etdi ki, Azərbaycanda taksi fəaliyyəti ilə bağlı xaotik vəziyyət yaranıb. Səbəb bəzi insanların daha çox qazanc əldə etmək məqsədilə ikinci iş kimi taksi fəaliyyəti göstərməsidir: “Bu, həssas sahədir, müəyyən qayda-qanun yaratmaq lazımdır. Bəzən olur ki, sürücü çağırış yerinə gedərkən yolüstü tamah məqsədilə başqa bir müştəri götürür və sifariş verən müştərini gözlədir. Bunlar taksi xidməti ilə bağlı neqativ hallardır. Bəzi şirkətlər var ki, rəqabət məqsədilə qiymətləri əslində olduğundan az göstərərək müştəriləri cəlb edir. Nəticədə xidmətin keyfiyyəti aşağı düşür, sürücü də, müştəri də narazı qalır. Hesab edirəm ki, qanunla xidmətin keyfiyyətinin artırılması və qiymət məsələsi tənzimlənməlidir”.
Ekspert hesab edir ki, taksi fəaliyyətini tənzimləmək üçün dövlət qurumları hərəkətə keçməlidir: “Sürücünün onlayn qaydada işə götürülməsi mümkün deyil əslində. Nədənsə, taksi şirkətləri bunu həyata keçirirlər”.
Həmsöhbətimiz onu da əlavə etdi ki, hələlik bu sahədə pərakəndəlik, kor-koranəlik hökm sürür: “Nizam-intizamsız sürücülər taksi xidmətlərində çalışır. Bu gün belə sürücülər kifayət qədərdir. Hamısı “pisdir” də demək olmaz. Ali savadlı, qabiliyyətli taksi sürücülərimiz mövcuddur. Digərləri də onlardan örnək götürməlidir. Bəzən texniki cəhətdən yararsız avtomobillər taksi xidmətlərində fəaliyyət göstərir. Xidmətin rəhbəri də, əməkdaşı da pul qazanmaq marağındadır. Xidmətin keyfiyyəti baxımından Azərbaycanda olan taksi şirkətlərinin hamısında problemlər mövcuddur. Onu da deyim ki, taksi sektorunda problemin yaranmasına səbəb olan amillərdən biri də şirkətlərlə bağlıdır. Nöqsanlar əsasən sürücülərdən alınan faizlərlə bağlıdır. Hazırda operator şirkətlər sürücünün qazandığının 20 faizinə qədərini tələb edir ki, bu çox böyük rəqəmdir. Düşünürəm ki, bu rəqəm daha aşağı olmalıdır. Bununla bağlı taksiləri istismar edən şirkətlərə sanksiyaların təbliğ edilməsi çox vacibdir”.
Günel CƏLİLOVA
