“Azərbaycanın daşıyıcı şirkətlərinin yeni marşrut xətlərinə marağı yoxdur. Son vaxtlar çalışırıq ki, yeni marşrut xətlərini ancaq müsabiqə yolu istifadəyə verək. Qarabağ istiqamətində marşrut xətləri üçün müsabiqələr keçirilib, hazırda isə cənub bölgəsi üçün də müsabiqələr keçirilir. Bu müsabiqələri tam şəffaf şəkildə keçirmək bizim vəzifəmizdir. Ancaq şirkətlər tərəfdən maraq yoxdur. Biz bunu təbliğ etməyə çalışırıq".
Bu fikirləri rəqəmsal inkişaf və nəqliyyat nazirinin müavini Rəhman Hümmətov nəqliyyatla bağlı problemlərin ictimai müzakirəsində deyib.
Şirkətlər bu müsabiqələrə niyə maraq göstərmir?
“Sərnişindaşıma şirkətlərinin hər iki istiqamət üzrə keçirilən müsabiqələrə maraq göstərməməsinin səbəblərindən biri sərnişin potensialının aşağı olmasıdır”
Liberal İqtisadçılar Mərkəzinin rəhbəri Akif Nəsirli “Bakı-Xəbər”ə şərhində bildirdi ki, ümumiyyətlə, aidiyyəti qurumların nəqliyyat üzrə keçirdiyi tenderlərin nəticələri əksər hallarda şübhəli görsənir. “Birinci, bu tenderlərin, müsabiqələrin şəfafflığına şübhə edirəm. Azərbaycanda əksər tender və müsabiqələr eyni şəkildə keçirilir. Bu prosesə müdaxilələrin, məmurların təsirlərinin çox olması müsabiqələrin şəffaf keçirilməsinə mane olur. Yəqin ki, sərnişindaşıma şirkətlərinin də bir qismi bu müsabiqələrin şəffaflığına şübhə edir. Bu öz yerində. Bu iki istiqamətdə keçirilən müsabiqələrə marağın olmamasının özəl səbəbləri var. Məsələn, Qarabağ istiqamətində marşruta maraq olmamasının səbəbi həmin bölgədə hələ yaşayışın olmamasıdır, cəlbedici görsənməməsidir. Bu səbəbdən bu yöndə keçirilən müsabiqəyə meyl yoxdur. Qarabağa gedənlər ildə bir-iki dəfə oranı görmək üçün gedirlər və qayıdırlar. Üstəlik, Qarabağ istiqamətində marşrut xətləri üçün müsabiqələrə marağın bu şəkildə olması oradakı təhlükəli vəziyyətlə də bağlı ola bilər. Çünki düşmən o ərazilərə 1 milyondan çox mina basdırıb. Bu təhlükə də şirkətlərin prosesə yaxınlaşmasına mane ola bilər. O ərazilərdə hələ məskunlaşma da yoxdur, məskunlaşmadan sonra bu ərazilərə hərəkət çoxalar. Məşkunlaşma baş verəndə, ora səfər edənlərin sayı çoxalanda daşıyıcı şirkətlərdə də maraq oyanacaq”.
A.Nəsirlinin sözlərinə görə, hazırda cənub bölgəsinə böyük avtobuslarla səfər edənlərin sayı azdır. Bu istiqamətə sərnişin daşınmasının əsasən kiçik tutumlu avtomobillərlə münasib qiymətə həyata keçirildiyini deyən A.Nəsirli qeyd etdi ki, bu səbəbdən də daşıyıcı şirkətlər müsabiqəyə maraqsız yanaşır: “Ona görə də tenderdə, müsabiqdə iştirak etməli olan potensial şirkətlər bunu ölçüb-biçirlər və görürlər ki, həmin istiqamətə sərnişin tapa bilməyəcəklər. Çünki yüngül, kiçik tutumlu maşınlar daha operativ şəkildə həmin bölgəyə sərnişin daşıyır. Digər tərəfdən, cənub bölgəsinə sərnişindaşıma şirkətlərinin marağı var idi. Çünki insanlar o bölgəyə kütləvi gedirdilər və ordan da İrana keçib alış-veriş edirdilər. İrana quru yolun, keçidin bağlanması həmin istiqamatə sərnişinlərin axınına ciddi təsir edib. Bu gün cənub istiqamətinə sərnişin baxımından azalma var, bu da daşıyıcı şirkətlərin diqqətindən yayınmır. Sərnişindaşıma şirkətlərinin hər iki istiqamət üzrə keçirilən müsabiqələrə maraq göstərməməsinin səbəblərindən biri sərnişin potensialının aşağı olmasıdır. Onun da səbəblərini qeyd etdim”-deyə A.Nəsirli vurğuladı.
İradə SARIYEVA
