Məlumdur ki, 27 oktyabr tarixindən Bakıda gediş haqqı 60 qəpik olmaqla yeni E1 ekspress marşrut xətti fəaliyyətə başlayıb. Yeni xətt üzrə avtobuslar metronun “Xalqlar Dostluğu” stansiyasından başlayaraq Qara Qarayev prospekti - “Koroğlu” metro stansiyası - Heydər Əliyev prospekti - Yusif Səfərov küçəsi - Neftçilər prospekti – “Azneft” dairəsi - Bibiheybət -Lökbatan Nəqliyyat Mübadilə Mərkəzi istiqamətində hərəkət edəcək.
Marşrut xətti üzrə sərnişin daşımaları “BakuBus” MMC-nin istismarında olan avtobuslarla icra ediləcək. İlkin mərhələdə daşımalara 10 ədəd avtobus cəlb ediləcək. Xətt üzrə avtobuslar səhər saat 06:30-dan axşam saat 18:30-a qədər fəaliyyət göstərəcək. Avtobuslar hərəkət sxemi üzrə bütün dayanacaq məntəqələri üzrə deyil, yalnız əvvəlcədən müəyyən edilmiş sərnişin tələbatı daha çox olan məntəqələrdə dayanacaq.
Ekspres marşrutun yaradılmasında məqsəd Bakıda yaşanan tıxacın qarşısını almaqdır. Ancaq ekspertlər bu mövzu ilə bağlı fərqli düşüncədədir. Onların fikrincə, ekspress marşrut xətti tıxacın qarşısını almayacaq, əskinə, tıxacın daha da uzanmasına səbəb olacaq.
Natiq Cəfərli: “Hansısa ekspress marşrutun paytaxtda tıxac problemini aradan qaldıracağı məntiqsiz yanaşmadır”
İqtisadçı-ekspert Natiq Cəfərli bildirdi ki, ümumiyyətlə, hansısa ekspress maşrutun paytaxtda tıxac problemini aradan qaldıracağı məntiqsiz yanaşmadır: “Çünki ayrıca bir infrastruktur yoxdur. Bir çox şəhərlərdə, məsələn, İstanbul şəhərində var, metrobus adlanır ki, müxtəlif istiqamətlərdə ayrıca yollar çəkilir. O yollar əsas yollardan arakəsmələrlə ayrılır və həmin metrobus yolunda doğrudan da avtobuslar sürətlə hərəkət edir. Bakı şəhərində belə bir infrastruktur yoxdur. İstər adını ekspress, istər adi avtobus qoysunlar, eyni yollarda hərəkət edəcək. Əgər bunu ayrıca zolaqların çəkilməsi ilə etməyə çalışacaqlarsa, bunun eksperimenti olub. Bakıda ayrıca avtobus zolaqlarını bir çox küçələrdə gördük, ancaq heç bir effekti olmadı. Çünki Bakının infrastrukturu, yolların eni, zolaqların sayı buna yetərli deyil”.
İlqar Hüseynli: “Ekspress avtobuslar fərqli küçələrlə hərəkət etməyəcək axı, eyni istiqamətdə, eyni küçələrlə hərəkət edəcəklər”
Sosial sahə üzrə ekspert İlqar Hüseynli bildirdi ki,ekspress avtobuslar fərqli küçələrlə hərəkət etməyəcəksə, eyni istiqamətdə, eyni küçələrlə hərəkət edəcəksə, onların tıxaca düşməyəcəyinə, hərəkət intervalında gecikmələr yaranmayacağına necə zəmanət verirlər? Və yaxud, ekspress avtobuslar digər ictimai nəqliyyatla eyni istiqamətdə, eyni vaxtda, tıxaca düşə-düşə hərəkət edəcəksə, niyə gediş haqqı 60 qəpikdir? Üstünlüyü nədir bu avtobusların?
Həmsöhbətimiz onu da əlavə etdi ki, ictimai nəqliyyatdakı problemləri həll etmək və şəhərdə dözülməz hal almış tıxacları aradan qaldırmağın sadə həll yolları var: “Lakin nədənsə, BNA da, bu işə məsul olan digər dövlət qurumları da məsələni köklü həll etməyə səy göstərməkdənsə, yenə də əlavə, kosmetik üsullara əl atırlar. Bu bilirsiz nəyə bənzəyir? Kasıb adam xarab olmuş hansısa əşyası üçün əvvəlcə Çin detalı alır, əşya bir müddət işləyir, yenə xarab olur, sonra Rusiya detalı alır, əşya yenə bir müddət işlədikdən sonra xarab olur. Halbuki, o adam ilk başda alman istehsalı detal alsaydı əşyası daha zəmanətli işləyəcəkdi. Bizim qurumlar da külli miqdarda vəsait sərf edərək bir ucdan müxtəlif ölkələrdən yeni avtobuslar alırlar. Amma bu avtobusların alınmasıyla ictimai nəqliyyatın problemləri həllini tapmır, əksinə, getdikcə daha da ağırlaşır. Yeni avtobuslara, hansısa eksperimentlərə bu qədər vəsait sərf edincə, metrobus xətləri çəksinlər, ictimai nəqliyyat üçün xüsusi zolaqlar ayırsınlar, avtobusların hərəkət yoluna digər nəqliyyat vasitələri daxil olmasın, avtobuslar dayanacaqlara sərbəst daxil olub çıxa bilsinlər, ictimai nəqliyyat şəhərin bütün istiqamətlərini əhatə etsin. Bununla şəhərdə rahat ictimai nəqliyyat sistemi təşkil etmək mümkündür. Nə qədər ki, bu işlər görülməyib, keyfiyyətli icitmai nəqliyyat olmayacaq”.
Günel CƏLİLOVA
