Oktyabrın 26-sı səhər saatlarında Yasamal rayonunun Yeni Yasamal yaşayış massivində magistral su kəmərində qəza baş verib. Əhaliyə içməli suyun verilişi dayandırılıb. Paytaxtın Yeni Yasamal massivinin Əsəd Əhmədov küçəsindən keçən magistral su xəttinin partlaması ilə əlaqədar olaraq yolun hərəkət istiqamətinin çökməsi səbəbindən həmin küçə və prospektin digər paralel küçə və prospektlərlə hərəkət istiqamətlərində yollar məhdudlaşdırılıb.
“Azərsu” ASC-nin rəsmiləri bildiriblər ki, qəza “+ 52 Alatava” və “+ 82 Qərb” mərkəzi su anbarlarını əlaqələndirən 1400 mm-lik magistral su kəmərində baş verib. Magistral kəmərdə qəza ilə əlaqədar Yasamal və Səbail rayonlarının bəzi ərazilərinə içməli suyun verilməsində məhdudiyyətlər yaranıb.
Qəzanın baş vermə səbəbi ilə bağlı müxtəlif fikirlər səslənir. Iddia olunur ki, çoxmənzilli binalar inşa edilərkən su və kanaliziasiya sistemləri ona uyğun hesablanmır. Bəzi ərazilərdə çoxmənzilli yeni binalar inşa edilərkən kanalizasiya və su xətlərinə qoşulma köhnə xətlərin üzərindən həyata keçirilir. Nəticədə isə bu cür xoşagəlməz hallar yaşanır.
Elçin Bayramlı: “Binaların təminatına su xəttinin gücü çatmır, nəticədə yarım əsrdən artıq yaşı olan borular təzyiqə davam gətirmir”
Sağlam Cəmiyyət Hərəkatının rəhbəri, sosioloq Elçin Bayramlı bildirdi ki, problemin əsas səbəbkarı, Bakı Şəhər İcra hakimiyyəti başda olmaqla, "Azərsu" Açıq Səhmdar Cəmiyyəti, Dövlət Şəhərsalma Arxitektura Komitəsi və Azərbaycan Avtomobil Yolları Dövlət Agentliyidir: “Şəhərin, küçələrin salınması, binaların tikilməsi bir-biri ilə koordinasiyalı şəkildə aparılmalı idi. Ərazilərdən keçən magistral su xətlərinin vəziyyəti araşdırılmalı idi. Heç bir standarta fikir vermirlər. Saysız-hesabsız binalar tikilib. Binaların təminatı üçün su xəttinin gücü çatmır. Nəticədə yarım əsrdən artıq yaşı olan borular təzyiqə davam gətirmir, partlayır. Problemin həll yolu yoxdur, gecdir. Şəhərin infrastrukturunu, sistemini düzəlməkdən ötrü Bakı şəhəri sökülüb yenidən tikilməlidir. Minlərlə xətt, borular həddən artıq yüklənib. Kompleks və fundamental problemdir. Borunu dəyişməklə, xətti yeniləməklə problemə çarə tapılmır. Milyardlarla vəsait, vaxt, böyük enerji lazımdır. Belə hadisələrlə tez-tez bütün kommunal sistemlər üzrə qarşılacağıq. Kommunal təchizat şəhərin öhdəsindən gələ bilmir. Təkcə qəzanın nəticələrini deyil, səbəblərini aradan qaldırmalıyıq”.
Ramil Qasımzadə: “Kanalizasiya sistemləri artan yük təzyiqinin altında tab gətirə bilmir”
Əmlak məsələləri üzrə ekspert Ramil Qasımzadə bildirdi ki, bir çox çoxmənzilli binaların həyətində su anbarları mövcuddur. Yəni “Azərsu” ASC tərəfindən su anbarlara vurulur, anbarlar vasitəsilə də MTK özü bu anbardan sakinlərə çatdırır. Bu onunla əlaqədardır ki, fasiləsiz su təminatını həyata keçirmək üçün davamlı olaraq gün ərzində də anbara su yığılır, ondan sonra supaylama həyata keçirilir: “Təəssüflər olsun ki, bəzi çoxmənzilli binaların isə anbarları mövcud deyil. Onlar birbaşa olaraq “Azərsu”nun su şəbəkəsinə qoşulub. Bir çoxları da paytaxtda köhnədən, hətta sovetlər dövründə inşa edilən su şəbəkələridir ki, onlar artıq təzyiqin qarşısında tab gətirə bilmirlər. Xüsusilə kanalizasiya sistemləri artan yük təzyiqinin altında tab gətirə bilmir. Köhnə çoxmənzilli binalar var ki, bəzi ərazilərdə su təzyiqi çatmır. Bu halların qarşısının alınması üçün, təbii ki, həmin qəsəbələr salınarkən, yeni binalar inşa olunarkən, çoxmənzilli binalar sökülüb, yerində yeniləri tikilərkən mütləq həmin kommunikasiya xətlərinin yenilənməsi həyata keçirilməlidir. Təəssüflər olsun ki, bizdə bir çox hallarda bunlar yerinə yetirilmir və nəticədə belə qəza halları baş verir”.
Günel CƏLİLOVA
