2022-ci il 27 oktyabr tarixindən xüsusi təyinatlı, o cümlədən qəza-bərpa və xilasedici nəqliyyat vasitələri istisna olmaqla, yüklə birlikdə kütləsi 8 tondan artıq olan yük avtomobillərinin səhər saat 07:00-dan axşam 22:00-dək, yanacaq daşıyan yük avtomobillərinin isə səhər saat 06:00-dan axşam saat 00:00-dək Bakı şəhərinə girişi və şəhərdaxili hərəkətinin qadağan edilməsi nəzərdə tutulub.
Bu qadağa, görəsən, paytaxtda hakim olan tıxac probleminin həllinə nə dərəcədə təsir göstərəcək?
İlqar Hüseynli: “Tıxacın yaranmasına səbəb olan amillərdən biri də yük maşınlarının şəhərdə sərbəst hərəkət etməsidir”
Sosial sahə üzrə ekspert İlqar Hüseynli bildirdi ki, yük maşınlarının şəhərə girişinin məhdudlaşdırılması təcrübəsi əksər xarici ölkələrdə tətbiq olunur: “Məlumdur ki, son zamanlar paytaxt ərazisində uzun-uzadı tıxac yaşanır. Tıxacın yaranmasına səbəb olan amillərdən biri də yük maşınlarının şəhərdə sərbəst hərəkət etməsidir. Xüsusi nəqliyyat vasitələri var ki, onların şəhərə girişinə icazə verilməlidir. Bura dərman preparatı daşıyan, bəzi ərzaq məhsulları daşıyan nəqliyyat vasitələri daxildir”.
Həmsöhbətimiz onu da əlavə etdi ki, Bakı şəhərinin infrastrukturu, yolların keyfiyyəti nəqliyyat vasitələrini daşımaq üçün uyğun deyil: “Onu da nəzərə almaq lazımdır ki, paytaxt ərazisində tikinti işləri həyata keçirilir. Tikinti işlərinin başa çatması üçün lazım olan materiallar yük maşınları vasitəsilə daşınır. Yük maşınların şəhərə girişinin qadağan olunması bu kimi işlərin ləngiməsinə səbəb olacaq. Həmçinin, yükdaşıma şirkətlərinin maşınları günün istənilən vaxtında şəhər ərazisində hərəkət edir. Yük maşınlarının şəhərdə sərbəst hərəkəti yolda nəqliyyat sıxlığına səbəb olurdu. Bu səbəbdən tətbiq edilən yeni qadağa qismən də olsa tıxacın qarşısını alar”.
Eldəniz Cəfərov: “Yeni qərarla da yük avtomobillərinin saat 10-a qədər Bakı şəhərinə daxil olması yenə effektiv olacaq”
Nəqliyyat məsələləri üzrə ekspert Eldəniz Cəfərov bildirdi ki, yeni qərarla da yük avtomobillərinin saat 10-a qədər Bakı şəhərinə daxil olması yenə effektiv olacaq. Əvvəlki qərar da effektiv idi, az da olsa həm sıxlığın qarşısı alınırdı, həm də qəzaların sayı azalırdı: “Yük avtomobillərinin şəhər içində hərəkəti bir qədər çətin olur. Digər nəqliyyat vasitələrinin də hərəkətinə maneçilik törədir. Piyadaların hərəkətinə maneçilik törədir”.
Günel CƏLİLOVA
