Məlumdur ki, əkinə yararlı torpaqlarda ev, yaşayış, iaşə obyekti tikmək olmaz. Belə torpaqlarda ev tikənlər qanunvericiliyin tələbinə uyğun formada cəzalandırılır. Ancaq buna baxmayaraq, bu gün hələ də əkinə yararlı torpaqlarda tikinti işləri həyata keçirilir.
Əmlak Məsələləri üzrə Dövlət Komitəsi belə vətəndaşları 500 manat məbləğində cərimə edir. Vətəndaşlar bu cərimə ilə razı olmadıqlarını dilə gətiriblər. Maraqlıdır, həmin torpağı vətəndaşa satan, tikintiyə icazə verən qurum, yoxsa torpaqda ev tikən vətəndaş cərimələnməlidir?
“Cərimələrin olması yaxşı qarşılanmır, çünki elə evlər var ki, 10-15 ildir tikilib, bunu hansı formada cərimələmək olar?!”
Əmlak məsələləri üzrə ekspert Elnur Fərzəliyev bildirdi ki, vətəndaşların cərimələnməsi düzgün deyil: “Əslində həmin əmlakı vətəndaşa satan qurumlar cərimələnməlidir, yaxud da tikintiyə icazə verən qurumlar. Məlumdur ki, hazırda Bakı və Abşeronda ən çox alqı-satqı prosesləri çıxarışı olmayan həyətlər üzərində gedir. Çünki onların qiymətləri çox aşağıdır. Həmçinin, çıxarış olmadığına görə də onlar notarial alqı-satqı edə bilmirlər. Düşünürəm ki, vətəndaşı cərimələməkdənsə, həmin ərazilərə çıxarış vermək lazımdır. Həm vətəndaş məmnuniyyəti olar, həm də vətəndaş mülkiyyət üzərində öz hüquqlarını bərpa etmiş olar. Bu gün çox böyük ərazilər var ki, yaşayış təyinatlı deyil. Bu gün o əraziləri sökmək də mümkün deyil. O qədər böyük ərazilərdə qəsəbələr salınıb ki, vətəndaşı oradan köçürmək, kompensasiya vermək və yeni evlərlərə köçürmək üçün 100 milyonlarla vəsait lazımdır. Bilirik ki, həmin əraziləri artıq əkin sahəsi kimi də istifadə etmək mümkün deyil, çünki yaşayış əraziləridir. Mütləq şəkildə bunların təyinatı dəyişilib yaşayış məntəqələrinə çevrilməlidir ki, həmin ərazilərdə vətəndaşlara çıxarış verilə bilsin. Cərimələrin olması yaxşı qarşılanmır, çünki elə evlər var ki, 10-15 ildir tikilib. Bunu hansı formada cərimələmək olar?! Çox ərazilər var ki, məsələn, Yasamal, Papanin, Bakının mərkəzində yaşayış massividir, yüz ildən artıqdır ki, vətəndaşlar yaşayıb. Onlara çıxarış belə verməyiblər. Bu problemlər aradan qalxmalıdır. Digərləri, başa düşürük ki, təyinatları fərqlidir, amma bunlara niyə çıxarış verilmir? Burada itirən isə iki tərəfdir: vətəndaş və dövlətin büdcəsi. Əlavə edim ki, bu cərimələr yalnız bir dəfə olur. Amma tərəfdarıyam ki, vətəndaşları hansısa formada nəinki 500 manat, hətta 3000 manatadək cərimələsinlər, amma qarşılığında vətəndaşa çıxarış versinlər. Təbii ki, burada heç bir vətəndaş narazı qalmaz və düşünər ki, ola bilər yanlış ərazidə tikmişəm, ona görə dövlət məni cərimələyir, amma qarşılıq olaraq çıxarış verir”.
Günel CƏLİLOVA
