Elm və Təhsil Nazirliyi tərəfindən "Ümumi təhsil müəssisələrində şagird davranış qaydaları" və "Valideyn-məktəb münasibətlərinin tənzimlənməsi üzrə təlimat" hazırlanıb. Hər iki sənəd hazırlanarkən şagirdlər, müəllimlər, o cümlədən valideynlər arasında keçirilən sorğuların nəticələri nəzərə alınıb, beynəlxalq və özəl təhsil müəssisələrinin təcrübələri araşdırılıb.
Təlimatda qeyd edilib ki, təhsilverənlər və məktəb rəhbərliyi şagirdin ümumi davranış problemləri ilə əqli gerilik və ya xüsusi ehtiyaclardan (təhsil, psixi və emosional inkişafın ləngiməsi, fiziki çatışmazlıq) irəli gələn davranışları fərqləndirməyi bacarmalıdırlar.Həmçinin, dərs alanlar məktəbli geyiminə əməl etməlidir. Yəni çox dar geyim, hündürdaban ayaqqabı, dizdən yuxarı olan ətək, zinət əşyası və bahalı saat kimi aksesuarlar, qeyri-adi saç düzümü və saç rəngi, uzun və rəngli dırnaqlar, makiyaj, saqqala da icazə verilmir. Bu qaydalar müzakirəyə çıxarıldıqdan sonra müəllimlərində geyimi də gündəmə gəlib. Xatırladaq ki, 2014-cü ildə “Müəllimlərin etik davranış qaydaları” təsdiq olunub. Ancaq müəllimlər bu qadağaya əməl etmir. Düzdüz, bəzi özəl təhsil müəssisələrində müəllimlərdə şagirdlər kimi vahid geyim formasında təhsil müəssisəsinə gəlir. Ancaq bu qayda bütün məktəblərdə icra edilmir.
Kamran Əsədov: “Tədris prosesində intizamı qorumaq üçün müəllimlərin də vahid qaydaya riayət etməsi mütləqdir”
Təhsil eksperti Kamran Əsədov bildirdi ki, tədris prosesində intizamı qorumaq üçün müəllimlərin də vahid qaydaya riayət etməsi mütləqdir. 2014-cü ildə “Müəllimlərin etik davranış qaydaları” təsdiq olunub. Hesab edirəm ki, Azərbaycanda da dünyanın bir sıra ölkələrindəki kimi müəllim formaları tətbiq edilə bilər və edilməlidir. Biz şagirdlərimizə bu qədər qadağalar qoyuruqsa, mütləq şəkildə tədris prosesində iştirak edən hər kəs üçün bunu etməliyik”.
Nizami Hüseynov: “Məktəb geyimini nümayiş etdirmək yeri deyil ki, zinət əşyaları ilə gəlsinlər, müəllim ciddi geyimdə olmalıdır”
Təhsil eksperti Nizami Hüseynov bildirdi ki, digər peşələrdə olduğu kimi, müəllimlər üçün də vahid geyim olmalıdır: “Bizim bir çox məktəblərimizdə müəllimlərimiz vahid geyimdə çıxış edirlər. Bizim elə nümunəvi məktəblər var və gözə də xoş gəlir, xoş təəssürat yaradır. Məsələn, digər peşə sahələrində vahid geyim var, bəs müəllimin niyə geyimi olmasın, niyə fərqlənməsin? İndi məsələ ondadır ki, bu, birmənalı qarşılanmır. Bəziləri deyir müəllimin vahid geyimə nə ehtiyacı, bəziləri bir başqa mövqedədir. Ona görə bizdə hələ ki, müəllim geyimi ilə bağlı heç bir rəsmi nə göstəriş, nə də sənəd var. Ümumiyyətlə, müəllim daha ciddi geyinsə yaxşı olar. Amma ümumi baxımdan müəllimin şübhəsiz ki, geyimi daha klassik olmalıdır. Müəllimin geyimi toy, ziyafət geyimi kimi cəzbedici, cəlbedici olmamalıdır. Uşaqların diqqətini yayındırmamalıdır. Sosial fərqlər, bərabərlik yaratmamalıdır. Məktəblərdə müəllimlərimizin əksəriyyəti qadındır. Məktəb geyimini nümayiş etdirmək yeri deyil ki, zinət əşyaları ilə gəlsinlər. Müəllim ciddi geyimdə olmalıdır. İstər qadın, istər kişi. Onun müəllimliyi onun mimikasında, psixologiyasında, jestlərində, geyimində, davranışında hiss olunmalıdır ki, o müəllimdir. Bu məsələyə bizdə rəsmi yanaşma yoxdur. Amma tövsiyyələr hamı tərəfindən qəbul olunur ki, müəllim şübhəsiz ki, ciddi geyinməlidir. Yəni küçədəki, toydakı, yasdakı, ziyafətdəki geyimdə məktəbə gələ bilməz. Daha ciddi, daha rəsmi geyimdə olmalıdır”.
Günel CƏLİLOVA
