Məlum olduğu kimi, ötən həftə Elm və Təhsil Nazirliyi tərəfindən “Valideyn-məktəb münasibətlərinin tənzimlənməsi üzrə təlimat” hazırlanaraq ictimai müzakirələrə çıxarılıb.
Sözügedən layihədə qeyd olunur ki, məktəb heyətinin üzvləri ilə iş saatlarında və ya təyin olunmuş vaxtda əlaqə saxlanmalı, axşam saatları, istirahət və bayram günləri məktəb heyətinin üzvlərini ciddi səbəb olmadan narahat etməkdən çəkinilməlidir. Valideynlər “Şagirdlərin məktəbdaxili nizam-intizam qaydaları” ilə tanış olmalı və onu dəstəkləməlidirlər. Həmçinin, öz övladının cəlb olunduğu situasiyalar da daxil olmaqla, nizam-intizam məsələlərinə dair məktəb heyətinin peşəkar mühakimə və qərarlarına hörmət etməlidirlər.
Valideynlər bayram günləri və axşamlar müəllimə zəng edə bilməz, əgər edərsə, bu hal şagirdin xeyrinə olmayacaq, ona cəza verilə bilər. Bu isə narazılığa səbəb olub.
“Müəllimə zəng edəcəksə, səhəri gün qırmızı, sarı və yaxud hansısa inzibati tənbeh tətbiq olunan o rənglərdən biri ilə cəzalandırılacaq”
Təhsil eksperti İlqar Orucov bildirdi ki, müəllimlərə qeyri-iş günlərində və axşam vaxtı zəng etmək düzgün deyil: “Bu, müəllimin istirahət zamanına girmək, müdaxilə etməkdir. Amma o demək deyil ki, kimsə müəllimə zəng edəcəksə, səhəri gün qırmızı, sarı və yaxud hansısa inzibati tənbeh tətbiq olunan o rənglərdən biri ilə cəzalandırılacaq. Əslində bu cəza məsələsi deyil. Sadəcə, biz bu nümunələri cəmiyyətə aşılamalıyıq”.
Ekspertin sözlərinə görə, Avropada kimsə gedib istirahət günü və ya axşam saatlarında kiməsə zəng edib narahat edə bilməz. Bu, ən azından, cəmiyyətdə ədəbsizlik sayılır: “Bu təkcə müəllimlərlə bağlı deyil, ümumilikdə cəmiyyət anlamalıdır ki, insanın istirahət günüdürsə, mənim o şəxslə özəl və ya şəxsi münasibətim yoxdursa, yalnız işgüzar əlaqə varsa, mən nədən o insana zəng etməliyəm? Misal üçün, nümunəvi davranışları olan Almaniyada işdən sonra kimisə narahat etmək olarmı? Əlbəttə, xeyr. Əgər əvvəlcədən iş zamanında işgüzar münasibət zamanı həftəsonu görüş üçün razılıq əldə etməmisinizsə, onda qarşı tərəf sizin zənginizə cavab verməyəcək, cavab versə belə, o sizə elə soyuq tərzdə münasibət göstərəcək ki, siz onu narahat etməyinizə bir baxımdan peşman olacaqsınız. Ümumilikdə, mən bunu təkcə məktəblə əlaqələndirməzdim. Eyni zamanda hesab edirəm ki, cəmiyyətdə həqiqətən də insanlar davranışlarla bağlı normaları bilməlidir”.
Günel CƏLİLOVA
