Günün pik saatlarında Bakının küçə və prospektlərində, xüsusilə şəhərin mərkəzində yaranan tıxaclar paytaxtın yollarının əsas probleminə çevrilib. Hətta sürücülər tıxacların avtomobillərə ziyan vurduğunu da qeyd edirlər.
Bakının bitməyən tıxac probleminin həlli ilə bağlı müxtəlif təkliflər səslənir. Bu günlərdə Bakı Nəqliyyat Agentliyinin Mətbuat katibi Mais Ağayev tıxacsız Bakı üçün insanları şəxsi avtomobillərdən imtina etməyə çağırıb. O qeyd edib ki, ictimai nəqliyyatın hərəkət etdiyi şəhər tıxacsız olur: “Bu cür olmasını istəyirsinizsə, şəxsi avtomobillərdən istifadədən imtina edib ictimai nəqliyyatın xidmətindən yararlanın. Daha rahat və tez mənzil başına çatmağın başqa alternativi yoxdur”.
Bu çağırış ictimaiyyət arasında narazılığa səbəb olub. Məlumdur ki, günün pik saatlarında, nəinki yerüstü nəqliyyat, elə yeraltı nəqliyyatda da sıxlıq yaşanır. Insanlar metroya girməkdə çətinlik çəkir. Bu danılmaz faktdır. Həmçinin, paytaxtda uzun illərdir tramvay və trolleybus işləmir. Avtobusların da durumu hər kəsə bəllidir. Sərnişinlər saatlarla dayanacaqda avtobusun gəlməsini gözləyir. Belə olan halda sərnişin istədiyi ünvana necə getsin? Piyada?
“Bakı dünyada yerüstü sərnişindaşımada yalnız avtobusların qaldığı yeganə paytaxt şəhəridir”
Sağlam Cəmiyyət Hərəkatının rəhbəri Elçin Bayramlı bildirdi ki, BNA rəsmisinin çağırışı çox gülüncdür: “Necə yəni avtomobildən istifadə etməyin? Bəlkə on kilometrlərlə yolu piyada gedib-gələk? Paytaxtda sərnişindaşıma sistemi bərbad haldadır. Şəxsi maşından imtina ediləcək şəhərdə gərək çoxsaylı nəqliyyat sistemləri olsun. Bakıda tramvay və trolleybus, həmçinin, elektrik qatarları müvəffəqiyyətlə məhv edilib. Yerüstü sərnişindaşımanın son nümayəndəsi olan avtobuslar isə yox kimi bir şeydir. BNA sanki qəsdən bu sahəni daha da bərbad hala saldı. Belə şəhərdə hər kəs özünə maşın almağa məcburdur. Ona görə də, mən hələ uzun illər öncə “Hərəyə 1 maşın alaq, əziyyətdən qurtulaq” kampaniyası elan etmişəm. Son aylarda isə Bakının sərnişindaşıma sistemində problemlər daha da artıb, tıxaclar çoxalıb. Avtobusların sayı azalıb, marşrutların intervalı çoxalıb. Metroda artıq acınacaqlı vəziyyət yaranır. İnsanlar saatlarla küçələrdə qalır. Həddən artıq sıx şəkildə vaqonlarda, avtobuslarda əziyyətlə gedirlər”.
E.Bayramlının sözlərinə görə, artıq şəhərkənarı ərazilərdə də tıxaclar yaranır: “Özü də təkcə işə gedib-gəlmək saatlarında deyil, adi vaxtlarda da. Müvəqqəti tədbirlər problemi aradan qaldırmır. Problemin həllinə fundamental yanaşılmalı, kompleks şəkildə həll edilməlidir. Əhalinin Bakıya cəmləşməməsi, əksinə, paytaxta toplaşmış region əhalinin bölgələrə qayıtması üçün sosial-iqtisadi tədbirlər görülməlidir. Digər şəhərlərdə fabrik və zavodlar tikilməli, bəzi ali məktəblər başqa şəhərlərə köçürülməlidir. Bakı dünyada yerüstü sərnişindaşımada yalnız avtobusların qaldığı yeganə paytaxt şəhəridir. Vaxtilə qəsdən məhv edilmiş nəqliyyat sistemləri- tramvay, trolleybus və elektrik qatarları bərpa edilməlidir. Metro stansiyalarının sayı sürətlə artırılmalıdır. Ən əsası, Bakıda xaotik şəkildə sıx-sıx bina tikintisinə son qoyulmalıdır. Mərkəzi hissələrdə tikinti tam dayandırılmalıdır, hətta bəzi yeni çoxmərtəbəli binalar sökülməlidir”.
Günel CƏLİLOVA
