Bu gün cəmiyyətdə mövcud olan ciddi problemlərdən biri də valideynlərin bir çoxunun ali məktəbdə təhsil alan övladlarının təhsil haqqını ödəməkdə çətinlik çəkməsi ilə bağlıdır. Elə ali məktəb var ki, valideynlərin vəziyyətini başa düşür və təhsil haqqının hissə-hissə ödənilməsinə şərait yaradır. Amma bu xeyli ali məktəblərdə belə deyil, valideyndən tələb olunur ki, illik təhsil haqqını ilin başında birdəfə ödəsinlər. Eləsi var borca-xərcə düşür, bəziləri banklara üz tutur, bəziləri də çarəsiz vəziyyətdə qalıb universitet rəhbərlərinin insafa gələcəyini gözləyir.
Uzun müddətdir ki, bu sahədə mövcud olan problemlər müzakirə olunurdu, amma nədənsə, rəsmən buna cavab verilmirdi. Çünki çox adamların müraciətlərinə universitetlər “ nazirliyin qərarı belədir, gərək təhsil haqqı tam ödənilsin” kimi, cavablar verirdilər. Nəhayət Elm və Təhsil Nazirliyindən məsələ ilə bağlı açıqlama gəlib.
Trend-in məlumatına görə, Milli Məclisin Elm və Təhsil komitəsinin son iclasında “Təhsil haqqında” qanuna dəyişikliyin müzakirəsi zamanı Elm və Təhsil Nazirliyinin Aparat rəhbərinin müavini Yaqub Piriyev “nazirliyin Kollegiyasının təhsil haqqının hissə-hissə ödənilməsi ilə bağlı qərarı var, amma bu bizdən asılı deyil, bu, universitetlərin rəhbərliyindən asılıdır” - deyib.
Belədirsə, universitetlər niyə qərarı icra etmirlər, tələbədən təhsil haqqını tam ödəməyi tələb edirlər? Nə üçün universitetlər təhsil haqqının hissə-hissə ödənilməsinə imkan vermirlər? Nazirliyin qərarının havada qalmasını necə anlamaq olar?
“Təəssüf ki, bizim bəzi universitetlərin rəhbərləri...”
Azərbaycan Gənc Alim, Doktorant və Magistrlər Cəmiyyətinin sədri, fəlsəfə doktoru İlqar Orucov “Bakı-Xəbər”ə şərhində bildirdi ki, nazirliyin qərarı məcbiri xarakter daşımır: “Nazirliyin qərarı tövsiyə xarakterlidir. Bilirsiz ki, universitetlərin maliyyələrini idarə etmələri ilə bağlı sərbəstliyi var. Bu qərarın tövsiyə xarakterli olmasından bir çox universitetlər sui-istifadə edir. Açığı, məndə bir neçə belə fakt var ki, bəzən universitetlərdə təhsil haqqının hissə-hissə ödənilməsinə şərait yaradılır. Amma təəssüf ki, qeyd edilən faktlar da mövcuddur. Düşünürəm ki, universitet tələbəyönümlü olmalıdır. Tələbə yoxdursa universitet də olmayacaq. Sadəcə olaraq, təəssüf ki, bizim bəzi universitetlərin rəhbərləri tələbəyə yanaşmanı məhz bu formada ifadə edirlər. Birmənalı olaraq o fikirdəyəm ki, tələbənin təhsil haqqı ödəməsi ilə bağlı ona mümkün qədər şərait yaratmaq lazımdır. Zatən təhsil haqları kifayət qədər yüksəkdir”.
İ.Orucovun sözlərinə görə, hətta pandemiya dönəmində təhsil haqqının bir neçə dəfəyə ödənilməsi ilə bağlı rəsmi tövsiyə var idi və bir çox universitetlər buna əməl etsə də, etməyənlər də oldu. “Hesab edirəm ki, universitet rəhbərləri belə həssas məsələyə humanist yanaşıb təhsil haqlarının hissə-hissə ödənilməsinə şərait yaratmalıdır. Təbii ki, dünyada gedən proseslər, iqtisadi böhran Azərbaycan ailəsinin büdcəsinə təsir göstərib. Nəzərə alsaq ki, bizim ali məktəblərin təhsil haqları da kifayət qədər yüksəkdir, bu baxımdan valideynlərin vəziyyəti nəzərə alınmalıdır”- deyə İ.Orucov vurğuladı.
İradə SARIYEVA
