"Məktəblərdə İntizam Şurası yaradılacaq". Bunu Elm və Təhsil Nazrliyinin Ümumi və məktəbəqədər təhsilin təşkili və idarə olunması şöbəsinin müdiri Elnur Əliyev deyib.
Şöbə müdiri qeyd edib ki, Şuranın yaradılması və tərkibində valideynin iştirakı məcburi olacaq.
Məktəblərdə İntizam Şurasının yaradılması məsələsi müəyyən suallar doğurur.
İndiyə qədər valideyn komitələri vardı, fəaliyyət göstərirdi, bunun nə nəticəsi oldu? Məktəblərdə gündə bir qurum yaratmağın nə mənası var ki? Məktəbin direktorunun fəaliyyəti, məktəbin idarəçiliyi normal şəkildə olsa, təhsil sistemində qayda-qanun yaradılsa bütün problemlər həll olunar.
Məktəblərdə İntizam Şurasına valideynlərin də cəlb ediləcəyi vurğulanır. Valideyn iş-gücünü atıb niyə gedib məktəbin işi ilə məşğul olmalıdır? Valideynin başqa işi yoxdurmu, o niyə məktəbin işinə müdaxilə etməlidir? Bütün bu problemlərin hamısını məktəbin müəllimi, rəhbərliyi, Elm və Təhsil Nazirliyi həll etməlidir.
Vüsalə Ağabəyli: "Təhsilin düzgün və səmərəli təşkili təmin olunmasa hər gün bir komissiya, hər gün bir imtahan və ya hər gün bir şura yaratsalar da heç bir önəmi olmayacaq"
Şuranın yaradılması məsələsinə münasibət bildirən filologiya üzrə fəlsəfə doktoru, dosent Vüsalə Ağabəyli bizimlə söhbətində bildirdi ki, valideynin prosesə cəlb edilməsi normal görsənmir, bu özü suallar doğurur: "Əvvəla, valideyn məktəbin pedaqoji və ya texniki heyətinin üzvü deyil, şura tərkibində valideyn fəaliyyətini necə tənzimləyəcəklər, bu aydın deyil. Həm də məktəb özü-özlüyündə tədris, tərbiyə və təşkilati işləri ümumiləşdirən bir müəssisədir, İntizam Şurasını da özü təşkil edə bilər. Digər tərəfdən isə, son illər müəllimlərin məqsədyönlü şəkildə itirilmiş nüfuzu təhsildə bu cür boşluqlara səbəb olur. Əgər diqqət edirsizsə, son dövrlər sanki müəllimlər hədəfə götürülüb, ictimaiyyətin və şagirdin gözündən salınır. Təbii ki, mən yaxşı müəllimləri nəzərdə tuturam, bacarıqlı müəllimi, təşkilatçı müəllimi, vicdanlı müəllimi. Təhsilin düzgün və səmərəli təşkili təmin olunmasa, hər gün bir komissiya, hər gün bir imtahan və ya hər gün bir şura yaratsalar da heç bir önəmi olmayacaq. Hər bir vəzifə sahibinin öz səlahiyyətini layiqincə yerinə yetirməsinə Elm və Təhsil Nazirliyi tərəfindən ciddi nəzarət olunmalıdır".
V.Ağabəylinin sözlərinə görə, hər hansı bir məsələ ictimailəşəndən sonra məktəb direktorunu və ya kimisə vəzifədən azad etmək çıxış yolu deyil. O vurğuladı ki, təhsil mühiti peşəkar kadrlara həvalə edilməli və onların doğru fəaliyyəti izlənməlidir.
Elşən Qafarov: “...Həm bir qədər düşündürücüdür, həm də maraqlıdır”
Tanınmış təhsil eksperti Elşən Qafarov da məsələyə münasibət bildirdi. E.Qafarov hesab edir ki, məktəblərdə İntizam Şurasının yaradılması maraqlı məsələdir. “Məktəblərdə İntizam Şurasının yaradılacağı ilə bağlı Elm və Təhsil Nazirliyinin nümayəndəsinin verdiyi məlumat həm bir qədər düşündürücüdür, həm də maraqlıdır. Məsələ burasındadır ki, nazirlik doğrudan da məktəblərdə nizam-intizam qaydalarının bərqərar olması üçün müəyyən addımlar atmaq istəyir. Bu müsbət haldır. Amma İntizam Şurasının yaradılması bir qədər düşündürücüdür. Əvvəla, təhsilin idarəetmə orqanlarında çalışan bizim bəylər və xanımlar bir şeyi bilməlidir ki, hər bir məktəb qanunvericilik əsasında idarə olunmalıdır. O cümlədən də bütün müəssisələr, bütün cəmiyyət. Çünki Azərbaycan Respublikası hüquqi dövlətdir və əsas qanunu konstitusiyadır. Konstitusiyanın 42-ci maddəsinə uyğun olaraq "Təhsil Haqqında" və "Ümumtəhsil haqqında" qanunlarımız var. Hər iki qanunun 15-16 maddəsində konkret göstərilib ki, ümumtəhsil müəssisələrində bütün münasibətlər, o cümlədən də intizam məsələləri və yaradılacaq hər hansı qurumlar ancaq təhsil müəssisələrinin özünün nizamnaməsi əsasında mümkündür. Dövlət müstəqilliyimizin 31 ilini tamamladıq 32-ci ilə keçdik. Hələ də bizim dövlət ümumtəhsil məktəblərimizin nizamnamələri yoxdur. Bunu görməmək mümkün deyil. Nə qədər şuralar yaradılırsa-yaradılsın, heç bir irəliləyiş olmayacaq. Bu birmənalı şəkildə belədir. Necə ki, məktəblinin dostunu gətirdilər, məktəblərdə agentura sistemi yaratdılar. İntizam Şurasının da nizam-intizam qaydasının yaxşılaşdırılmasına heç bir töhfəsi olmayacaq. Elm və Təhsil Nazirliyi, o cümlədən ümumi və məktəbəqədər təhsilin təşkili və idarə olunması şöbəsinin müdiri cənab Elnur Əliyev doğrudan da orta məktəblərdə nizam-intizam qaydalarının bərqərar olmasını istəyirsə, ilk növbədə məktəblərin nizamnamələrinin qəbul edilməsini həyata keçirməlidir. Məktəblərin nizamnamə əsasında fəaliyyət göstərməsinin təmin olunması ilə bağlı konkret addım atılmalıdır”.
E.Qafarov hesab edir ki, məktəblərdə nizam-intizam qaydalarının həyata keçirilməsi üçün məktəb rəhbərliyi kadrları düzgün seçməli, məktəbi idarə edən direktorlar, direktor müavinləri yüksək nüfuza malik şəxslər olmalıdır. Digər tərəfdən, yeni korpuslar tikmək hesabına şagird sıxlığının azaldılması və sair amillərin də nizam-intizam qaydalarının tənzimlənməsinə dəstək olacağını deyən mütəxəssis hesab edir ki, bununla bağlı dövlət proqramı hazırlanmalıdır.
İradə SARIYEVA
